1 Abakai 8 - Baibuli I Leb Kumam 2013

Kotero Sanduku me Isikan i Tempulo

¹ Di do Abaka Sulumani bin oko lwongo joadongo me Isirael kede jotel me ikekon, jotel me ude me joakwari me Isirael, pi gin bino bute Yerusalem tetekeny kikwany Sanduku me Isikan ka Rwot ki Sion, Bomba ka Daudi, di kiko tere i tempulo.

² Jo dedede me Isirael bin oko cokere but Abaka Sulumani i kare me Ebaga me Kimere i duwe me Etanim, en duwe me kanyaare.

³ Kakame joadongo me Isirael otieko cokere kede, josaseredoti oko tingo Sanduku me Isikan

⁴ di kiko tere i tempulo. Jolebi kede josaseredoti bin oko da kobo i tempulo Eema me riamo kede jamini mege kacil dedede.

⁵ Abaka Sulumani kede jo dedede me Isirael kame oudo ocokere bute oko cungo i nyim Sanduku me Isikan, di gin kiko mino giayala angola me romini kede twonin atot tot kalikame marere.

⁶ Di do josaseredoti oko tingo Sanduku me Isikan kiko tere kabedo mere, i Kabedo Kacil Kalamo, i dud bwom cerubim.

⁷ Pien oudo cerubim nogo oyaro bwom gi i kabedo me Sanduku me Isikan, tetekeny bwom gi nogo oudo umo wi Sanduku me Isikan kede atekai me tinge da.

⁸ Atekai nogo oudo bocoboco twatwal, kame ka dano moro oudo ocungo i nyim Kabedo Kacil Kalamo, en ekaruno neno wi gi; do likame oudo kokaruno neno gi i ooko mere. Atekai nogo pwodi tie kunono tuno tin.

⁹ Gimoro ace oudo likame tie i yi Sanduku nono kwanyo kenekene kide abatal are nogo kame bin oketo iye i moru me Sinai, i kare kame bin Rwot otimo kede isikan kede jo me Isirael, di gin bin kiyai ki Misiri.

¹⁰ Kakame josaseredoti oudo tie donyo kede ooko me kabedo kacil, edou oko umo yi tempulo pukupuk,

¹¹ omio josaseredoti likame oko karuno timo tic gi; pien meny me deyo ka Rwot oudo oromo yi tempulo dedede.

¹² Di do Sulumani oko lego be, “Rwot in itieko waco be in ibino bedo i edou acol cucucuc.

¹³ Ango atieko gero nin ot me deyo, kakame in ibino bedo iye pi kare lung.”

Yamo ka Sulumani but Jo

¹⁴ Di do abaka oko lokere but jo di eko lamo winyo ne jo dedede kocokere me Isirael, di gin dedede kitie cungo.

¹⁵ En ewaco be, “Pak bed but Rwot, Rubanga me Isirael, en ngat kame kede teko mere etieko cobo timo gikame bin en ecikere iye di ewaco kede doge but papa na Daudi be,

¹⁶ ‘Cako i kare kame ango bin akwanyo kede jo na me Isirael ki Misiri, ango pwodi likame ayero bomba moro me ekeko me Isirael kame poore ger iye ot, kakame kobino wora iye. Do ango ayero Daudi pi bedo ngapug me jo na.’

¹⁷ “Papa na Daudi oudo tie kede tam me gero ot me woro Rwot, Rubanga me Isirael.

¹⁸ Do Rwot bin oko waco ne be, ‘In itimo ber pi bedo kede tam me mito gero nango ot me wora,

¹⁹ akadi kamanono da, in en kalikame ibino gero ot nono, do wodi kame in ibino nywalo en kame bino gero nango tempulo.’

²⁰ “Aso, Rwot nataman otieko cobo cikere mere, pien ango nataman atieko lunyo wang papa na Daudi bala abaka me Isirael, doko atieko gero ot me woro Rwot, Rubanga me Isirael.

²¹ Ango atieko timo i ot ka Rwot kunono kabedo me Sanduku me Isikan kame kide abatal me isikan ka Rwot tie iye, isikan kame bin en etimo kede joakwari wa i kare kame gin kiyai kede ki lobo me Misiri.”

Ilega ka Sulumani

²² Di do Sulumani oko ot di en eko cungo i nyim alutari i nyim jo dedede me Isirael, di en eko tango cinge malo.

²³ En eko lego be, “Okwe Rwot, Rubanga me Isirael, likame tie Rubanga moro kame cal bala in, i malo arabo piny i dud lobo! In igwoko isikan ni doko in inyuto amara ni kalikame lokere but jotic ni kame lubo kop ni kede cuny gi lung.

²⁴ In itieko gwoko isikan ni kame bin imio but ngatic ni papa na Daudi; in bin icikere di iwaco kede dogi, di tin in iko mine ecobere kede teko ni.

²⁵ Pi manono, Okwe Rwot, Rubanga me Isirael, ango akwai igwok cikere ni but ngatic ni papa na Daudi, cikere kame bin in iwaco iye be, ‘In likame ibino bedo abongo ngat kame lunyo wangi bala abaka me Isirael, kenekene ikwae ni poore gwok yote me kuo gi, di gin kiko luba bala kame in itimo.’

²⁶ Pi manono, Okwe Rubanga me Isirael, mi kop kame in bin icikere iye but ngatic ni papa na Daudi cobere.

²⁷ “Do in, Okwe Rubanga, kom ateteni ibino bedo i lobo kan? Akadi malo lung likame romi, kara do benyo benyo kame ot noni kame ango atieko gero bino romi kede?

²⁸ Ango akwai, Okwe Rwot Rubanga na, tim ber iwiny kwac na kede ingangai na, ango ngatic ni; ango abako doga buti iwiny kwac na kame akelo buti tin.

²⁹ Gwok ot noni iceng kede iwor, kabedo noni kame in itieko yamo i kome be, ‘Kobino wora i kanono.’ Ango akwai iwiny kwac na ka ango aloko nyima tetu ot noni di ako ilega.

³⁰ Winy ingangai na kede me jo ni me Isirael ka gin kiloko nyim gi tetu kabedo noni di kiko ilega. Okwe winy wa i malo kabedo ni; winy kwac wa di iko sasiro wa.

³¹ “Ka dano moro otimo dub but dano ocelu di oko mine be elairo, di oko kele lairo i alutari nin i ot noni,

³² Okwe Rwot winy i malo di iko ngolo kop i dierediere me jotic ni. Mi alola but ngat kame tie kede raco di iko dwoko ne rac mere i wie, do mi ngat kame li kede raco moro bed kiber bala kame poore ne.

³³ “Ka jokwor oko bwono jo ni me Isirael pien gin kitimo dub buti, di do gin kiko bobo lokere buti, di kilwongo nyingi, kede di kikwai di kibako dog gi buti i ot noni,

³⁴ winy kwac gi i malo. Sasiro dub ka jo ni me Isirael, di iko bobo dwoko gi i lobo kame bin in imio joakwari gi.

³⁵ “Ka malo oko cegere di kot oko bedo li pien gin kitimo dub buti omio in iko mino gin alola, di do gin kiko swilaro ki dub gi di kiko loko nyim gi tetu kabedo noni di kiko ilega di kilwongo nyingi,

³⁶ tim ber iwiny kwac gi i malo. Sasiro dub ka jotic ni, jo me Isirael. Pwony gi yongayo me kuo aber kame poore kilubi, di iko mino kot cwei i lobo noni kame in itieko mino jo ni pi doko mergi.

³⁷ “Ka kec opoto i piny arabo aumpuli, amoto ceng owango cam i poti, arabo obonyo amoto ekutele, arabo ka jokwor ka jo ni oluko gi i bomba gi moro, arabo ka aumpuli moro amoto tuo moroni omako gi,

³⁸ tim ber iwiny kwac gi. Ka ngatamoroni kenekene kikom jo ni me Isirael, arabo jo ni dedede me Isirael, kame tie kede cwercuny, oko lego di kirieo cing gi tetu ot noni,

³⁹ tim ber iwiny kwac gi i malo kabedo ni. Sasiro gi di iko konyo gi. Tim negi gikame poore kede yote me kuo gi, gikame in ingeo kame tie i cuny gi, pien in keni en kame ingeo gikame tie i cuny dano acelacel.

⁴⁰ Manono bino mino gin kilwori pi kare dedede kame gin kibedo kede i lobo nono, lobo kame in bin imio joakwari wa.

^41-42 “Iepone acel nono, ka ngakumbor moro, kalikame obedo dano ni me Isirael, oko bino ki piny abor pien ewinyo iruo me nyingi, twer ni kede teko ni, di en eko bino lego buti i ot noni,

⁴³ tim ber iwiny kwac mere i malo kabedo ni. Tim ne gikame en ekwai pire, tetekeny jo dedede me wi lobo ngei di gin kiko bedo kede lworo buti, bala jo ni me Isirael. Di do gin kiko bino ngeno be ot noni kame ango atieko gero obedo meri.

⁴⁴ “Ka jo ni bino ot yi kede jokwor gi, karamoroni kenekene kame in ibino cwano gi iye, di gin kiko lego buti di kiloko nyim gi tetu bomba noni kame in itieko yero, kede tetu ot noni kame ango atieko gero nin,

⁴⁵ tim ber iwiny ilega kede ingangai gi i malo, di iko mino gi kibwon jokwor gi.

⁴⁶ “Ka gin kiko timo dub buti, pien likame tie dano moro kalikame timo dub, di in cunyi oko wang negi di iko mino gi i cing jokwor gi, tetekeny koter gi tenge bala mabus i lobo me jokwor gi, kakabor amoto kiyapiyapi;

⁴⁷ ka i lobo kame kotero gi iye kunono bala mabus, di wi gi oko yabere di kiko swilaro, di kiko bako dog gi buti di kiwaco be, ‘Wan otieko dubo, doko otimo gi kalikame poore; wan otimo gikarac’, tim ber iwiny kwac gi.

⁴⁸ Ka gin kiko swilaro kede cuny gi dedede kede kuo gi lung i lobo me jokwor gi kunono, jo koudo otero gi bala mabus, di gin kiko lego buti di kiloko nyim gi tetu lobo noni kame bin in imio but joakwari gi, kede bomba noni kame in itieko yero, kede ot noni kame ango atieko gero nin,

⁴⁹ tim ber iwiny kwac gi kede ingangai gi i malo kabedo ni, di iko mino gi gikame kikwao.

⁵⁰ Sasiro jo ni ki dub gi kame kitimo buti kede ki turo cik gi dedede; di iko mino jokwor gi bed kede mwolo but gi, tetekeny kur kiter gi kirac

⁵¹ pien gin kibedo jo ni amaki, jo kame in bin ikwanyo ki Misiri, ki peko aliet bala mac me calaro nyonyo.

⁵² “Okwe Rwot Rubanga, cik yiti iwiny ingangai na kede me jo ni me Isirael, winy kwac gi i kabedo moroni kenekene kame gin kikwai iye.

⁵³ Pien in itieko poko gin kikom jo dedede me wi lobo, pi gin bedo jo ni amaki, bala kame in bin icikere kede kibut ngatic ni Musa, i kare kame bin in ikwanyo kede joakwari wa ki Misiri.”

Ilega ka Sulumani me Ajikini

⁵⁴ Aso, kakame Sulumani bin oko tieko kede mino ilega kede ingangai noni dedede but Rwot, en eko yai di eko cungo i nyim alutari kakame oudo eriondiko iye di etango cinge malo;

⁵⁵ en ecungo di eko lamo winyo ne jo dedede me Isirael kame bin ocokere kunono. En ewaco kede dwan amalo be,

⁵⁶ “Pak bed but Rwot, en ngat kame etieko mino jo mege me Isirael oudo wei di lubere kede gi dedede kame en bin ecikere iye. Gi dedede kame en bin ecikere iye likame tie moro akadi acel kalikame oko cobere i ekite kame en bin ewaco ne ngatic mere Musa.

⁵⁷ Ango akwao Rwot Rubanga wa ebed kede wa, bala kame en bin ebedo tie kede joakwari wa; ango akwae kur ewek wa arabo ejal wa,

⁵⁸ do emi cuny wa bed i kome, pi lubo yote mege dedede, kede pi gwoko cik mege, iswilia mege kede pwony mege, kame en bin eciko ne joakwari wa.

⁵⁹ Ango akwao be iceng kede iwor Rwot Rubanga wa bed yutuno kope na nogi kame ango abako kede doga bute. Doko akwae ekony jo mege me Isirael kede abaka gi, di lubere kede mit gi me ceng acelacel.

⁶⁰ Manono bino mino jo dedede me wi lobo ngeo be Rwot en Rubanga, doko likame tie moro apat.

⁶¹ Pi manono, wun poore igenunu Rwot Rubanga wa kede cunyu lung, di ilubunu iswilia kede cik mege, bala kame tin itienu timo.”

Kwero Tempulo

⁶² Di do Abaka Sulumani kede jo dedede kame bin tie kede en, oko mino giayala but Rwot.

⁶³ Sulumani oko mino bala giayala me nywak but Rwot doke tutumia ot are kiwie are (22,000), kede romini tutumia tol acel kede ot are (120,000). Aso, abaka kede jo dedede me Isirael oko bin kwero ot ka Rwot kamano.

⁶⁴ Cenge nono da abaka oko kwero cuny diakal kame oudo tie i nyim ot ka Rwot. En emio giayala awanga kede giayala me alos kede kakamio me giayala me nywak kanono. En etimo kamanono pien alutari me nyonyo buronsi kame oudo tie i nyim Rwot oudo titidi twatwal likame eromo giayala nogi dedede.

⁶⁵ Aso, Sulumani kede jo me Isirael dedede oko tedo ebaga pi ceng kanyaare. Twon ekodet me jo en kame bin tie kunono, jo kame bin owok cako ki Lebo Kamat tuno i esamai me ikor me Misiri.

⁶⁶ I ceng me kanyauni mere Sulumani oko peruno jo, di jo oko dok i miere gi. Gin dedede bin kiko pwono abaka, di kiko dok i miere gi di kilelo, doko cuny gi di yom twatwal pi bero dedede kame Rwot otimo ne ngatic mere Daudi kede jo mege me Isirael.