1 Abakai 6 - Baibuli I Leb Kumam 2013

Sulumani Ogero Tempulo

¹ Sulumani bin oko cako gero ot ka Rwot i duwe me Sib, manono en duwe me are, i mwaka me tol ongwon kede ot kanyauni, ingei jo me Isirael yai ki Misiri. I kare nono oudo Sulumani otieko bedo i apugan pi mwakini ongwon.

² Ot kame Sulumani bin ogero ne Rwot oudo boro mere tie mita ot are kiwie kanyaare, laco mere mita kanyangon, kede boro mere malo oudo tie mita tomon kiwie adek kede dul.

³ Agola me kadonyo i ot oudo boro mere tie mita ongwon kede dul, kede laco mere mita kanyangon bala me ot nono.

⁴ En bin etimo ne ot nono dirisan kame oudo diding i ooko do kilac ki yie.

⁵ En bobo eko mino kogero gedo moro i kom apama me ot nono rimaro en i ooko; di en eko popoko agolai iye.

⁶ Dier ot me agola acelacel me piny oudo laco mere tie mita are kede dul moro atitidi, agola me goropa me diere oudo laco mere noko mita adek, di do me goropa me adek mere oudo laco mere tie mita adek kede dul moro atitidi. Rom me laco me apama me ot i agola kodokakin i wi ocelu oudo titidi lo kame en edokakin i wie, tetekeny dier ot me agolai nogo oudo buto i wi apama di likame atekai kame gango gi donyo i apama me ot.

⁷ Ot nono bin kogero kede kide kame oudo koiko i kabedo kame kokunyo gi iye, tetekeny mor moro me enyondo, le arabo lilim likame oudo tie i tempulo i kare kame bin kogere kede.

⁸ Ekeko kame donyo i goropa me diere oudo tie i bad tetu piny me ot. Dano oudo yito malo di elubo kayito kame oto i goropa me diere, di eko kobo ki goropa me diere eko ot i me adek.

⁹ Aso, Abaka Sulumani bin oko tieko gero ot ka Rwot; en eko galao wi ot i yie kede atekai kede ibaon abatal me seda.

¹⁰ En bin eko gero agolai rimaro ot nono lung, agola acelacel oudo boro mere malo kalamo mita are momot, di oriamakino en i kom ot ka Rwot kede ibaon me yen seda.

¹¹ Rwot oko waco ne Sulumani be,

¹² “I kom kop kame mako ot kame in itie gero noni, ka in ilubo iswilia na di itimo gikame ango awaco, doko di igwoko cik na i yore me lubo gi, ango abino moko cikere na kedi, cikere kame bin ango atimo but papa ni Daudi.

¹³ Ango abino bedo i diere me jo na me Isirael, doko likame abino weko gi.”

¹⁴ Aso, Sulumani bin oko tieko gero ot ka Rubanga.

Jamini kame Koketo i yi Tempulo

¹⁵ Apama me ot nono i yie oudo komwono kede ibaon abatal me seda, cako ki piny tuno malo i wi ot, di oko mwono dier ot kede ibaon abatal me saipuras.

¹⁶ Agola me yie, kame oudo kolwongo be Kabedo Kacil Kalamo bin oko gero i tielo me ot kede ibaon abatal me yen seda, cako ki piny tuno malo i wi ot. Boro mere oudo tie mita kanyangon.

¹⁷ Agola adwong mere kame bin tie i nyim Kabedo Kacil Kalamo oudo boro mere tie mita tomon kiwie kanyauni.

¹⁸ Ibaon me seda me yi ot bin kotubuso kede cal me opokini kede ature; apama me yi ot lung oudo komwono kede ebao seda, omio kide kame kogero kede apama oudo likame neeno.

¹⁹ I tielo me ot nono bin oko gero iye agola me keto Sanduku me Isikan.

²⁰ Agola me yie noni oudo boro mere tie mita kanyangon, laco mere mita kanyangon, kede boro mere malo da mita kanyangon, di omwone dedede kede saabu kame kojililo kiber. Alutari oudo komwono kede ibaon abatal me seda.

²¹ Yi ot oudo komwono kede saabu kame kojililo kiber, di oko rino eriko me saabu kakame kodonyo kede i agola me yie, kame oudo komwono da kede saabu.

²² Ii ot lung oudo komwono kede saabu tetekeny ebed di eber, kiton alutari kame oudo tie i Kabedo Kacil Kalamo.

²³ I Kabedo Kacil Kalamo kunono bin oko timo iye cerubim are kede ebao me yat olibeti, acelacel kikom gi oudo boro mere malo buco romo mita ongwon kede dul.

^24-26 Gin are nogo oudo kirorom doko kicacal. Acelacel oudo tie kede bwome are, bwom gi acelacel oudo kalamo mita are momot, tetekeny yai ki amidi me bwom cerubim acel tuno i amidi me bwom cerubim ocelu oudo buco romo mita ongwon kede dul.

²⁷ Sulumani bin oko keto cerubim nogo i Kabedo Kacil Kalamo; oudo koyararo bwom gi tetekeny bwom cerubim acel oudo tuno i apama me tetucel, di bwom cerubim ocelu da ko tuno i apama me tetu ocelu; bwom gi icegun kame orieo tetu cuny ot oudo riamo.

²⁸ Cerubim nogo da bin komwono kom gi kede saabu.

²⁹ Apama me agola adwong kede me agola me yie oudo kotubuso gin dedede kede cal me cerubim, tugo, kede ature.

³⁰ Dier ot dedede da oudo komwono kede saabu.

³¹ Ikekon kame donyo Kabedo Kacil Kalamo oudo tie are kame kotimo kede ibaon me yat olibeti; ebao me ari me wi ekeko malo kede ipirin mege oudo nget gi tie kany.

³² Ikekon nogo oudo kotubuso kede cal me cerubim, tugo kede ature, di oko mwono gi kede saabu.

³³ Ekeko kame donyo i agola adwong da ipirin mege oudo kotimo kede ebao me olibeti; epir acelacel oudo ngete tie ongwon.

³⁴ Ikekon are nogo oudo kotimo kede ebao me yat saipuras di koromo dolo gi;

³⁵ doko oudo kotubuso gi kede cal me cerubim, tugo, kede ature, di oko mwono gi kiber kede saabu.

³⁶ Diakal me tempulo bin oko gero kede apama kame konapo kide mege irotin adek i buli wi eroto acel me ebao me yat seda.

³⁷ Acakini me tempulo bin kocako gero i duwe me are, en duwe me Sib, i mwaka me ongwon me apugan ka Sulumani.

³⁸ I duwe me kanyauni, en duwe me Bul, i mwaka me tomon kiwie acel me apugan ka Sulumani, en kame kotieko gero kede tempulo atwal atwala bala kame oudo koiko kede. Gere otero ne Sulumani mwakini kanyaare.