1 Abakai 5 - Baibuli I Leb Kumam 2013

Sulumani Oikere pi Gero Tempulo

¹ Kakame bin Abaka Kiram me Taya owinyo kede be oudo kotieko wiro Sulumani pi lunyo wang papa mere bala abaka, en eko cwano jotic mege bute, piento en bin ebedo adieru me Daudi.

² Sulumani oko cwano kop but Kiram be,

³ “In ingeo be papa na Daudi oudo likame oko karuno gero ot ne Rwot Rubanga mere pi yi atot atota kame oudo tie ne kede jokwor mege kame oudo oluke, tuno kakame Rwot omie ebwono gi kede.

⁴ Do nataman Rwot Rubanga na otieko mina anapakin i bad dedede; likame tie ngakwor moro arabo gimoro arac.

⁵ Pi mano, ango nataman atie kede tam me mito gero ot ne Rwot Rubanga na bala kame oudo Rwot owaco ne papa na Daudi be, ‘Wodi kame ango abino keto lunyo wangi bala abaka, bino gero nango ot.’

⁶ Aso, mi cik but jotic ni wek kiot Lebanon di kiko tongo nango yen seda. Jotic nango bino timo tic karacel kede jotic nin, di ango ako bino culo gi gimoroni kenekene kame in ibino waco; pien in ingeo be likame tie ngatamoro kikom wan kame ngeo tongo yen bala jo me Sidon.”

⁷ Kakame Kiram owinyo kede kop kame Sulumani owaco, en eko lelo twatwal, di eko waco be, “Pak bed but Rwot tin, en ngat kame etieko mino Daudi awobi ariek pi bedo abaka me twon jo kame rom kano.”

⁸ Kiram oko cwano ne Sulumani kop be, “Ango atieko udo kop kame in icwao buta; mit ni amako ebao me yen seda kede saipuras, ango abino cobo dedede.

⁹ Jotic nango bino kelo gi yai ki Lebanon tuno i nam; gin kibino twetweo gi karacel di kiko mino nam molo gi kakame in inyuto. Ango abino mino kogonyo gi i kunono pi in tero gi. Gikame in ibino timo nango en in mino cam but jo me oda.”

¹⁰ Aso, Kiram oko mino Sulumani ibaon me yen seda kede saipuras kame oudo en emito dedede.

¹¹ Sulumani da oko mino Kiram engano kame romo ipukoi tutumia ot are (20,000) pi jo me ode camo, kede pipan tutumia are (2,000) me mo kame kojililo kiber. Sulumani obedo mino gi nogi but Kiram buli mwaka.

¹² Aso Rwot bin oko mino Sulumani rieko bala kame oudo etieko cikere kede. Anapakin oudo tie i dierediere ka Kiram kede Sulumani, di gin bin kiko timo isikan.

¹³ Abaka Sulumani bin oko rwako jo tutumia ot adek (30,000) i Isirael lung pi bedo jo kame komio timo tic tetek.

¹⁴ En eko popoko gi i ikodeta me tutumia tomon tutumia tomon kame lere alea i timo tic, di eko cwano gi Lebanon. Ekodet acel bin bedo Lebanon pi duwe acel di eko dok bedo paco pi duwete are. Adoniram en kame bin en eketo pi bedo ngadwong gi.

¹⁵ Sulumani oudo bobo da tie kede jomuk kide tutumia ot kanyauni (80,000) i piny kobedo mori mori, kede jo tutumia ot kanyaare (70,000) kame yeo gi;

¹⁶ medo i kom jo nogo, oudo bobo tie jo tutumia adek kede tol adek (3,300) kame kwao jo kame bin timo tic nono.

¹⁷ Abaka bin oko ciko gi pi muko kide adongo abeco me keto i acakini me ot.

¹⁸ Jotic ka Sulumani kede me ka Kiram kede jo me bomba me Gebal oko iiko kide kede ibaon me gero ot ka Rwot.