1 Abakai 4 - Baibuli I Leb Kumam 2013

Jodongo me Apugan ka Sulumani

¹ Abaka Sulumani bin oko bedo abaka me Isirael lung.

² Jodongo me apugan mere bin ige: Asaria wot ka Sadoki en oudo ngasaseredoti;

³ Elikorep kede Akija, awobe ka Sisa en oudo ikalanin; Yekosapat wot ka Akilud en kame oudo wandiko kope dedede kame timere;

⁴ Benaya wot ka Yekoyada en kame oudo tie ngadwong me isirikalen; Sadoki kede Abiata en oudo obedo josaseredoti;

⁵ Asaria wot ka Natan en oudo obedo ngatel me jodongo me apugan; Sabud wot ka Natan en oudo obedo ngasaseredoti, doko en oudo ngawot abaka;

⁶ Akisar en oudo ngadwong me paco me abaka; Adoniram wot ka Abuda en kame oudo tie ngadwong me jo kame kodio timo tic tetek.

⁷ Sulumani bin tie kede jopug tomon kiwie are me apugan mere i Isirael lung. Ngat acelacel kikom gi oudo tero cam ne abaka kede jo me ode, pi duwe acel lung, buli mwaka.

⁸ Nying jopug nogo kede adulion kame oudo gin kipugo ige: Ben Kur oudo pugo piny kobedo mori mori me Epuraimu;

⁹ Ben Deker oudo pugo bomban me Makas, Salabim, Bet Semes, Elon kede Bet Kanan;

¹⁰ Ben Kesed oudo pugo bomban me Arubot kede Soko kede adul me Keper dedede;

¹¹ Benabinadab oudo pugo Napat Dor. En bin enyomo Tapat nyar ka Sulumani;

¹² Bana wot ka Akilud, oudo pugo bomban me Tanak, Megido, kede adul dedede me Bet San, i nget bomba me Saretan, pipiny me Jeserel, kede cako ki Bet San tuno Abel-mekola, ape ot tuno i bad tetuca me bomba me Yokomeam;

¹³ Ben Geber oudo pugo bomba me Ramot Gilead kede calere ka Yair, dano me ekeko ka Manase, kame oudo tie Gilead. Ben Geber en kame bin pugo da adul me Arugob kame oudo tie Basan, kame oudo tie kede bomban adongo ot kanyape kame kocelo doko irutei gi oudo kocego kede alorito me nyonyo buronsi;

¹⁴ Akinadab wot ka Ido oudo pugo Makanaim;

¹⁵ Akimas oudo pugo adul me Naputali; en oudo enyomo Basemat nyar ka Sulumani;

¹⁶ Bana wot ka Kusai oudo pugo adul me Aser kede bomba me Bealot;

¹⁷ Yekosapat wot ka Parua oudo pugo adul me Isakar;

¹⁸ Simei wot ka Ela oudo pugo adul me Benjamin;

¹⁹ Geber wot ka Uri oudo pugo adul me Gilead, piny me Abaka Sikon me jo Amor kede Abaka Og me Basan. Ngapug acel oudo tie i lobo me Yuda.

Lonyo i kare me Apugan ka Sulumani

²⁰ Jo me Yuda kede Isirael oudo tot bala asinge me dog nam; gin bin kiko cam kede amata di kiko bedo kede yomcuny.

²¹ Sulumani bin oko pugo ajakanuto dedede cako ki ecilet me Eupurate tuno i lobo me jo Pilistia, ape tuno i ikor me Misiri. Gin bin kibedo culo esolo bute di kitimo ne tic pi kare me kuo mere lung.

²² Giacama kame oudo mitere ne Sulumani pi ceng acelacel oudo tie ipukoi ot adek me alos kame konungo kiber kede ipukoi ot kanyape me alos kalikame konungo;

²³ twonin tomon kame kopito oko cwe, doke ot are kame oudo kokwao akwa, romini tol acel, atil, amiem, imaleta, kede gwen kocwe.

²⁴ Sulumani oudo pugo lobo dedede me bad tetu tim me ecilet me Eupurate, cako ki Tipisa ape tuno Gasa. En oudo epugo abakai dedede me bad tetu tim me ecilet me Eupurate, doko oudo etie kede anapakin kede pinye me kio dedede.

²⁵ I kare me kuo ka Sulumani lung, Yuda kede Isirael oudo tie kede anapakin, cako ki Dan tuno Beereseba. Jo me diakal acelacel oudo tie kiber di kitie kede olok kede yen me epigi.

²⁶ Sulumani bobo da oudo tie kede ude tutumia ot ongwon (40,000) me asigiran kame wao cabalan mege, kede cuo tutumia tomon kiwie are (12,000) kame ringo kede asigiran.

²⁷ Jopug tomon kiwie are nogo en kame bin tero giacama ne Abaka Sulumani kede jo kame bin camo ki paco mere. Ngapug acelacel oudo tero gi nogo i duwe kame kopoko ne; likame tie gimoro kame oudo gin kimio rem.

²⁸ Ngapug acelacel da oudo tero mawele kede lum ne asigiran kakame oudo kimitere iye bala kame oudo kociko negi.

²⁹ Rubanga oudo omio Sulumani rieko adwong twatwal, ngec kede niang atut tut kalikame wacere.

³⁰ Manono oko mino rieko ka Sulumani oudo kato me jo dedede me bad tetu kide, kiton me jo me Misiri.

³¹ En oudo eriek elo jo dedede; oudo eriek elo Etan dano me ot ka Esera, kede Keman, Kalikol, kede Darada, awobe ka Makol. Nyinge bin oko bedo iruo i pinye me kio dedede.

³² En bin ecweo kope me agole tutumia adek (3,000), kede were tutumia acel kede kany (1,005).

³³ En ewaco kop i kom yen, cako ki yen seda kame tie Lebanon tuno i emompir kame dongo i wi apama. En ewaco kop i kom leini kede winy, leini kame liao alia kede aporogon dedede me nam.

³⁴ Abakai dedede me wi lobo kame bin owinyo kop i kom rieko ka Sulumani, bin oko cwano jo pi ot winyo kope me rieko mere nono.