1 Abakai 3 - Baibuli I Leb Kumam 2013

Sulumani Olego be mie Rieko

¹ Sulumani bin oko nyomo nyar ka Parao abaka me Misiri di manono oko mino gin kiribakin. En eko tero nyar ka Parao nono i Bomba ka Daudi tuno en tieko gero paco mere me abaka kede ot ka Rwot kede apama me cel me Yerusalem.

² I kare nono oudo jo pwodi mio giayala gi i kabedere atot apapat me woro Rwot, pien likame oudo pwodi kogero ne Rwot ot.

³ Sulumani oudo maro Rwot, doko oudo elubo gikame papa mere Daudi owaco ne, do kenekene eda oudo emio giayala angola kede me odok angwe kur i kabedere atot apapat.

⁴ Ceng moro acel abaka oko ot Gibeon pi mino giayala mere kunono, pien kanono oudo en kabedo adwong kame komio iye giayala. Sulumani oudo obedo mino giayala awanga kame romo tutumia i wi alutari nono.

⁵ Iwor nono Rwot oko neeno but Sulumani i lek i Gibeon kunono di eko waco ne be, “Penya gikame apoore mini.”

⁶ Di Sulumani oko waco be, “In itieko nyuto amara adwong kalikame lokere but papa na Daudi, ngatic ni, piento en ebedo lubi di etie kede genere, kuo kopoore, kede cuny aber. Doko in itieko meede kede nyuto ne amara adwong noni kalikame lokere, di iko mino wode nataman obedo i kom mere me ajakanut.

⁷ Okwe Rwot Rubanga na, in itieko mino ango ngatic ni adoko abaka kawang papa na Daudi, bed bala ango pwodi atie dano atitidi kalikame ngeo epone me telo jo.

⁸ Ango ngatic ni atie do i diere me jo kame in iyero, twon jo kame tot tot kalikame marere.

⁹ Pi mano, ango ngatic ni akwai imia abed kede rieko me pugo jo ni, tetekeny angei poko gikaber kede gikarac; pien ngai kame karuno pugo twon jo ni nogi?”

¹⁰ Cuny Rwot oko bedo yom pien Sulumani openyo gi noni.

¹¹ Rubanga oko waco ne be, “Pien in ipenyo gi noni, di likame iko kwano kuo me kare alac arabo abar piri, amoto to me jokwor ni, do in ikwao piri niang, pi ngeno poko gikaber,

¹² ango nataman abino timo bala kame in iwaco. Ateteni ango abino mini rieko kede niang; likame tie ngatamoro kame cal bala in, kotieko bedo tie i kare kokato arabo kame bino bedo tie i kare me anyim.

¹³ Ango bobo da abino mini gi kalikame in ikwao, gin en abar kede wor pi kare me kuo ni lung; likame tie abaka moro kame kobino poro kedi.

¹⁴ Ka in ibino lubo yote na, di igwoko iswilia na kede cik na, bala kame bin papa ni Daudi otimo, ango abino medo kare me kuo ni.”

¹⁵ Di do Sulumani oko cei; eko niang be oudo eleko. En bin eko ot Yerusalem di eko ot cungo i nyim Sanduku me Isikan ka Rwot. En eko mino giayala awanga kede giayala me nywak, di eko tedo ebaga ne jotic mege dedede.

Sulumani Ongolo kop Atek

¹⁶ Ceng moro acel mon are kame oudo obedo imalayan oko bino but abaka di gin kiko cungo i nyime.

¹⁷ Dako acel oko waco be, “Adwong na, ango kede dako ni wan obedo i ot acel; ango ako nywalo atin di eda etie i ot kanono.

¹⁸ Di do i ceng me adek ingei ango nywal, eda eko nywalo atin. Wan dedede oudo otie karacel; likame oudo dano moro ace tie kede wan i ot kunono, wan nogi jo are kenekene en kame oudo otie i ot.

¹⁹ Di do iwor acel dako noni oko buto i kom atin awobi mere di eko neke.

²⁰ En eko yai i dier iwor di eko kwanyo atin nango i ngeta di ango ngatic ni anino. En eko pielo atin nango i ngete, di en eko pielo mere oto i ngeta.

²¹ Kakame ango ayai kede odiko pi doto atin na, ako neno be oudo etieko to; do kakame ango ako nene kede kiber odiko, ako neno kakaler be en likame atin kame oudo ango anywalo.”

²² Do dako ocelu ca oko waco be, “Li gire, atin akuo ni obedo mera, do oto en meri.” Dako me agege oko gamo be, “Li gire, atin oto en meri, do akuo en mera.” Aso, di gin kiko donyo piem i nyim abaka.

²³ Di do abaka oko waco be, “Wun ngat acelacel tie waco be atin akuo en mere, do me ka ngat ocelu en oto.”

²⁴ Aso, abaka oko waco be, “Kelunu na epima,” di oko kelo ne epima.

²⁵ Abaka oko waco be, “Pokunu atin akuo no i diere, di ikounu mino dako acelacel dul mere.”

²⁶ Do dako kame atin mere oudo kuo oko waco ne abaka be, “Li gire, ango akwai adwong na, mi atin akuo no but dako no; ateteni kur ineke!” En ewaco kamano pien oudo ewinyo lito atek i cunye pi wode. Do dako ocelu ca oko waco be, “Pok in atin nono di do wan dedede oko kei.”

²⁷ Di do abaka oko waco be, “Kur inek atin no! Mie but dako me agege. En ebedo toto me atin nono.”

²⁸ Jo me Isirael dedede oko winyo kite kame abaka oudo ongolo kede kop nono di gin kiko bedo kede wor adwong bute, pien gin kiniang be Rubanga oudo otieko mine rieko me ngolo kop kakare.