1 Abakai 22 - Baibuli I Leb Kumam 2013

Enabi Mikaya Okwenyaro Akab

¹ Siria kede Isirael oko bedo mulem abongo yi moro pi mwakini adek kolubo.

² Do i mwaka me adek mere abaka Yekosapat me Yuda oko ot but Abaka me Isirael.

³ Abaka me Isirael oko waco ne jotic mege be, “Benyo, ingeunu be Ramot Gilead obedo merwa, do di likame tie gimoro kame wan otie timo pi game ki cing abaka me Siria?”

⁴ Akab oko penyo Yekosapat be, “Ibino ot keda suro Ramot?” Yekosapat oko dwoko be, “Ango kede in wan jo acel; isirikalen nango obedo megi, doko da asigiran nango obedo megi.

⁵ Do ber kong peny tam ka Rwot.”

⁶ Di abaka me Isirael oko coko inabin aromo bala tol ongwon karacel, di eko penyo gi be, “Aoti asur Ramot arabo aweki?” Gin kiko dwoko ne be, “Oti isure, pien Rwot bino mine i cingi.”

⁷ Do Yekosapat oko penye be, “Benyo, likame doko tie enabi moro ace kame otwero penyo tam ka Rwot kibute?”

⁸ Akab oko dwoko be, “Tie pwodi acel kodong kame otwero penyo tam ka Rwot kibute, en Mikaya wot ka Imila; do cunya dage, piento en emurao nango kope areco kenekene.” Yekosapat oko dwoko be, “Abaka, likame ipoore yamo kamano.”

⁹ Akab oko lwongo ngatic acel di eko waco ne be, “Oti iom Mikaya wot ka Imila awakawaka.”

¹⁰ Abaka Akab kede Abaka Yekosapat me Yuda oudo tie bedo i komini gi me pug di kingapo ikanson gi me ajakanut; oudo kitie i laru me canyo atie i nget erute me Samaria. Inabin oudo tie waco negi gikame Rwot owaco.

¹¹ Esedekia wot ka Kenana oko timo cal me tung le me nyonyo ayon, di eko waco be, “Rwot owaco be, ‘Ibino suro jo me Siria di iko muducaro gi bala le atie kede tunge kacal kamagonogi.’ ”

¹² Inabin apat dedede oudo tie yamo kop acel nono be, “Oti isur Ramot, ibino bwono yi; Rwot bino mine i cingi.”

¹³ Ngaor koudo ooto lwongo Mikaya oko waco ne be, “Neningo, inabin dedede tie yamo kiber i kom abaka be ebino bwono yi, ida oti iyam kop acal bala mergi.”

¹⁴ Do Mikaya oko waco be, “Alairo i nying Rwot kakuo be ango abino waco gikame Rwot oyamo na.”

¹⁵ Kakame en etuno kede but abaka Akab, en eko penye be, “Mikaya, benyo, oot suro Ramot arabo oweki?” Mikaya oko dwoko be, “Otunu isurenu, ibinunu bwono yi; Rwot bino mine i cingu.”

¹⁶ Do Akab oko dwoko be, “Ka itie yamo keda i nying Rwot miero iwac kop me ateni; apoore waco ni manoni tien adi?”

¹⁷ Di Mikaya oko waco be, “Aneno di isirikalen me Isirael osasarun i wi moru, bala romini kame ngakwat gi li; di Rwot oko waco be, ‘Jogi li kede ngadwong gi, poore ngat acelacel ot ture kede mulem.’ ”

¹⁸ Akab oko waco ne Yekosapat be, “Mam oudo ango awaco ni be en likame ewaco nango kope abeco, do kwanyo kenekene kope me can?”

¹⁹ Di Mikaya oko meede be, “Nan winy gikame Rwot tie waco! Ango aneno di Rwot tie bedo i kom mere me ajakanut i malo, di imalaikan tie cungo i ngete tuni kede tuca.

²⁰ Di Rwot oko waco be, ‘Ngai kame bino ngalao Akab tetekeny eot Ramot di oko neke iye?’ Di imalaikan oko donyo yamo, man yamo kop ni, maca da yamo kop ca,

²¹ tuno di tipo moro oko ot anyim but Rwot di eko waco be, ‘Ango abino ngale.’

²² “Rwot oko penye be, ‘Ibino ngale benyo?’ “En eko dwoko be, ‘Ango abino ot di ako mino inabin ka Akab ngale.’ “Di Rwot oko waco be, ‘Oti ingale; manono bino twerere.’ ”

²³ Mikaya oko jiko be, “Aso neningo, Rwot otieko keto tipo me angalo i dog inabin ni nogi dedede; en etieko iiko pi mino can poto i komi.”

²⁴ Di enabi Esedekia oko ot but Mikaya di eko bape i wange di epenye be, “Awene en kame tipo ka Rwot owekango kede di eko cako yamo kede in?”

²⁵ Mikaya oko dwoko be, “In ibino ngeno awene inonono i ceng kame in ibino ot pwono kede i agola me tielo.”

²⁶ Di Abaka Akab oko mino cik but ngatic mere acel be, “Mak Mikaya iko dwoke but Amon ngaloc me bomba, kede but Yowasi wot ka abaka,

²⁷ di iko waco negi pi rwake i otkol di oko donyo mine mugati kede pii kenekene tuno di ango adwogo kede mulem.”

²⁸ Mikaya oko waco be, “Ka in iko dwogo kede mulem, udo likame Rwot oyamo kibuta.” Di eko waco be, “Wun jo dedede winyunu gikame ango atieko waco!”

To ka Akab i Ramot

²⁹ Aso, Abaka Akab me Isirael kede Abaka Yekosapat me Yuda oko ot suro Ramot.

³⁰ Di Akab oko waco ne Yekosapat be, “Ango abino bono wanga di ako ot yi, do in ngap ekanso ni me ajakanut.” Aso, abaka me Isirael oko bono wange di eko ot yi.

³¹ Abaka me Siria oudo omio cik but isirikalen ot adek kiwie are, gin en jodongo me cabalan me yi be, “Kur i yiunu kede dano moro ace atitidi amoto adwong, do kenekene kwanyo abaka me Isirael.”

³² Aso kakame gin kiko neno kede Yekosapat, gin kiko waco be, “Ateteni abaka me Isirael inononi.” Gin kiko lokere cako yi kede en. Do kakame en eko kok kede,

³³ gin kiko ngeno be manono oudo likame obedo abaka me Isirael, di kiko jiko yi kede en.

³⁴ Do sirikale moro me Siria oko gweno emal mere atatai, di winyo winyo eko ot cobo Akab i dierediere me nyonyo kame gagao kore kede nyonyo kame gagao kome, kame cal bala abokoya me aporogo. En eko koko but ngat kame riamo cabala mere be, “Lokere odok cen, pien kowana!”

³⁵ Yi oko meede dop kitek i ceng nono, di Abaka Akab ogongere i cabala di nyime opimaun kede isirikalen me Siria. Remo mere oko mol ocokere piny i dud cabala, di do eko to otieno.

³⁶ Tetu esawa kame ceng donyo kede, ngatamoro oko lelemo kikom isirikalen me Isirael be, “Ngat acelacel poore dok i bomba me turgi; ngat acelacel dok i piny gi!”

³⁷ Aso Abaka Akab bin oko to iepone nono. Oko bin tero kome Samaria di oko yike.

³⁸ Bin oko lwoko cabala mere i atapar me Samaria, kakame igwogin oko nango kiye remo mere, kede imalayan oko lwokere iye, bala kame oudo Rwot owaco be bino timere.

³⁹ Kope dedede ace amako gikame Akab otimo, kede ot kame egero kede lak liec, kede bomban dedede kame en egero, kowandiko gi i Itabu me Itatam amako Abakai me Isirael.

⁴⁰ Aso kakame Akab oto kede, wode Akasia oko lunyo wange.

Abaka Yekosapat me Yuda

⁴¹ Yekosapat wot ka Asa bin ocako pugo Yuda i mwaka me ongwon me apugan ka Akab me Isirael.

⁴² Oudo en etie kede mwakini ot adek kiwie kany i kare kame ecako kede pug, di eko pug pi mwakini ot are kiwie kany di ebedo Yerusalem. Nying toto mere oudo Asuba nyar ka Siliki.

⁴³ En eko lubo ekite ka papa mere Asa di likame eparao tenge kiye; oudo ebedo timo gi opoore i nyim Rwot. Do abilan me woro rubangan likame oudo kotuturo, doko da jo oko meede ot mino giayala kede dunyo odok angwe kur i abilan nogo.

⁴⁴ Yekosapat doko da oko kelo mulem i dierediere mere kede abaka me Isirael.

⁴⁵ Gi ace kame Yekosapat otimo, teko mere me yi kame enyuto, kede epone kame eyi kede kowandiko gi i Itabu me Itatam amako Abakai me Yuda.

⁴⁶ Cuo mogo koudo obedo imalayan me tempulo koudo odong anonok mege i kare me apugan ka papa mere Asa, en eko mino gi kidoko li.

⁴⁷ Lobo me Edom oudo li kede abaka; ngat kame lubo tien abaka me Yuda en koudo puge.

⁴⁸ Abaka Yekosapat oko timo imerin kacal bala me Tarusi pi ot Opir omo saabu, do kiko atuturun Esiongeber likame kitwero ot.

⁴⁹ Di Abaka Akasia wot ka Akab oko waco ne Yekosapat be, “Wek jotic nango kwang emeri kede jotic nin,” do Yekosapat oko dagi.

⁵⁰ Yekosapat oko to di oko yike i nget joakwari mege i bomba ka kwaru mere Daudi. Wode Yekoram en oko lunyo wange.

Abaka Akasia me Isirael

⁵¹ Akasia wot ka Akab oko cako pugo Isirael ki Samaria i mwaka me tomon kiwie kanyaare me apugan ka Abaka Yekosapat me Yuda, di eko pugo Isirael pi mwakini are.

⁵² En eko timo gikame rac i nyim Rwot; elubo ikiteso ka papa mere kede toto mere, kede ikiteso ka Yeroboam wot ka Nebat, ngat kame bin omio Isirael odubo.

⁵³ En edonyo woro Baal di etio ne, manono oko wango cuny Rwot Rubanga me Isirael, bala kame papa mere ngat kame en elunyo wange da oudo owango kede cuny Rwot.