1 Abakai 20 - Baibuli I Leb Kumam 2013

Akab Oyi kede Lobo me Siria

¹ Abaka Benekadad me Siria oko coko isirikalen mege karacel; abakai ot adek kiwie are oudo tie gange, di kitie kede asigiran gi kede cabalan gi. En eko ot luko bomba me Samaria di eko sure.

² Di eko cwano ne Abaka Akab me Isirael kop i bomba be, “Benekadad tie waco kaman:

³ Siliba kede saabu nin obedo mega; mon ni abeco kede idwe ni da obedo mega.”

⁴ Abaka me Isirael oko waco be, “Adwong na abaka, bala kame iwaco kede, ango atieko doko meri ribo kede gi dedede kame atie kede.”

⁵ I cen mere Benekadad oko bobo cwano jo but Akab kede kop kame waco be, “Ango oudo acwao ni kop be icwai na siliba kede saabu nin, karacel kede mon ni kede idwe ni.

⁶ Do nan ango abino do cwano jotic na diki tetu esawa noni, di gin kiko bino mono odi kede ude ka jotic ni, di kiko bino kwanyo gimoroni dedede kame yomo cuny gin di kiko tero.”

⁷ Abaka Akab oko lwongo joadongo dedede me lobo mere di eko waco negi be, “Nan nenunu epone kame icuo ni tie mito kelo kede peko; piento en ecwao kop be emito siliba kede saabu na, karacel kede mon na kede idwe na, do ango likame ako dagi mine.”

⁸ Di joadongo kede jo dedede oko dwoko be, “Kur iwiny kop mere, doko da kur iyei.”

⁹ Aso, Akab oko waco ne jo kame Benekadad oudo ooro be, “Wacenu adwong na abaka be ango oudo ayei kop mere me agege, do kop me are ango adagi.” Jo kame oudo kooro nogo oko dok di kiko bobo dwogo kede kop

¹⁰ kame Benekadad owaco be, “Akwao rubangan tim na can akalamo, ka buli sirikale na bino udo apua kame pongo cinge ingei dudubo bomba noni me Samaria.”

¹¹ Abaka Akab oko dwoko be, “Otunu iwacenu kaman: dano likame wakere ka pwodi likame kocopo yi; do kame yi otiek en kamio dano wakere.”

¹² Kop noni oko tuno but Benekadad i esawa kame oudo etie amata kede i kimere, karacel kede abakai ace kame en oudo ekodere kede gi. Di do en eko ciko isirikalen mege pi iikere me suro Samaria, di do kiko ot teere.

¹³ Di enabi moro oko bino waco ne Abaka Akab me Isirael be, “Rwot owaco be, ‘Mam ineno twon jo kame Benekadad tie kede? Ango abino mino gin i cingi tin, di in iko bino ngeno be ango en Rwot.’ ”

¹⁴ Akab oko penye be, “Alu en kame bino yi kede gi?” En eko dwoko be, “Rwot owaco be isirikalen kame tie i loc me ngaloc me adul acelacel en kame bino yi.” Di Akab oko doko penye be, “Do ngai kame bino telo isirikalen abino cako yi?” Enabi oko dwoko ne be, “In.”

¹⁵ Di Akab oko coko awobe dedede kame oudo tie i loc me ngatel me adul acelacel, gin dedede awobe tol are kede ot adek kiwie are (232). Di eko coko isirikalen me Isirael da tutumia kanyaare (7,000).

¹⁶ Gin kiko yai tetu esawa kanyape, di oudo Benekadad tie amera i kimere, en karacel kede abakai ot adek kiwie are kame oudo en ekodere kede gi.

¹⁷ Awobe kame oudo tie i loc me ngatel me buli adul acelacel en oko telo anyim. Jo kame Benekadad oudo ocwao kino piny oko dwoko ne kop be ekodet me isirikalen oudo tie wok ki Samaria.

¹⁸ En eko dwoko be, “Makunu gi di kikuo, akadi ka kibino pi kwano kop me mulem amoto yi.”

¹⁹ Isirikalen awobe koudo tie i loc me ngatel me buli adul acelacel en oko telo asura, di isirikalen me Isirael oko lubo gi.

²⁰ Ngat acelacel kibut gi oko neko dano kame oudo etie yi kede. Isirikalen me Siria oko ringo di isirikalen me Isirael oko donyo wapo gi, do Benekadad oko bwot eringo kede asigira, karacel kede isirikalen ace kame yi ki ngei asigiran.

²¹ Abaka Akab oko ot i yi di eko suro jo kame oudo tio kede asigiran kede cabalan me yi, di eko bwono jo me Siria atwal atwala.

²² Di enabi oko bobo dok but abaka me Isirael di eko waco ne be, “Doki imed pwonyo isirikalen ni bed di kitek, di iko timo iik atek me yi, pien abaka me Siria bino bobo suri cucuto ingei kare me ngico atie bino.”

Siria Otimo Asura me Are

²³ Jotic ka Benekadad oko waco ne be, “Rubangan me jo me Isirael obedo rubangan me wi mori, manono en komio jo me Isirael obwono wa ki wi mori; do ateteni wan obino bwono gi ka oyi kede gi i kakame mori li kiye.

²⁴ Doko da tim kaman: kwany abakai ot adek kiwie are ki tic gi me telo isirikalen, di iko lunyo wang gi kede jodongo me isirikalen.

²⁵ Di iko coko isirikalen di tot rom bala kame bin ikei, di kitie kede asigiran kede cabalan arom aroma kede kame oudo bin in itie kede. Wan obino yi kede jo me Isirael i kakame mori li kiye, di ateteni oko bino bwono gi, pien wan obino bedo tek kalamo gi.”

²⁶ Cucuto di kare me ngico okato, Benekadad oko coko isirikalen me Siria di kiko ot i bomba me Apek pi suro jo me Isirael.

²⁷ Ingei coko isirikalen me Isirael di oko mino gi jamini me yi, gin kiko ot di kiko gero kimere kabedere are kame pimaun kede kakame isirikalen me Siria oudo ocokere iye. Isirikalen me Siria oudo oraramun kunono dedede, do isirikalen me Isirael oudo ineno do bala ikodeta atitino are me diegi.

²⁸ Enabi oko ot but abaka me Isirael di eko waco ne be, “Rwot owaco kaman: pi kite kame jo me Siria owaco kede be, ‘Rwot obedo rubanga me wi mori do likame rubanga me aditot,’ pi manono ango abino mino twon jo nogi dedede i cingi, di in iko bino ngeno be ango en Rwot.”

²⁹ Isirikalen me Siria kede me Isirael oko bedo i kimere gi koudo pimaun pi ceng kanyaare. Di do yi oko cakere i ceng me kanyaare, di jo me Isirael oko neko isirikalen me Siria aoto kede tien, gin tutumia tol acel (100,000) i ceng acel.

³⁰ Jo apat mege kobwot oko ringo odok i bomba me Apek, di apama kame kocelo kede bomba oko poto i kom gi paka neko jo tutumia ot are kiwie kanyaare (27,000). Benekadad da oko ringo di eko donyo i bomba di eko pwono i ot.

³¹ Jotic mege oko waco ne be, “Wan owinyo be abakai me Isirael tie kede kisa; wek wan ongapunu ipukoi i pier wa di otweunu aunoi i ngut wa, cengemogo etwero weko wa likame eneko wa.”

³² Aso gin kiko twetweo ipukoi i pier gi, di kiko twetweo aunoi i ngut gi di kiko ot but abaka me Isirael di kiko waco ne be, “Ngatic ni Benekadad kwao be iwek kuo mere kur ineke.” Akab oko dwoko be, “Benyo, pwodi etie ekuo? Mano ber! En etie bala omina.”

³³ Jotic ka Benekadad oudo tie momoo winyo adwokini aber, aso omio kakame Akab owaco kede be “omina”, gin kiko do koporo kop nono di kiko waco be, “Ateteni Benekadad obedo omini!” Di Akab oko waco be, “Otunu ikelenu buta.” Kakame Benekadad otuno kede, Akab oko lwonge i yi cabala.

³⁴ Benekadad oko waco ne be, “Ango abino dwoko ni bomban kame bin papa na omao kibut papa ni. Doko da in itwero yabo dukini ni Damasiko bala kame papa nada otimo i Samaria.” Akab oko dwoko be, “Ango abino weki ioto pi cikere nogi.” Aso, gin kiko timo isikan di eko weko Benekadad ooto.

Enabi Obunano Akab

³⁵ Rwot oko ciko enabi acel kikom ekodet me inabin pi waco ne enabi ace ngawote pi donge. Do enabi ca oko dagi donge.

³⁶ Di eko waco ne enabi nono be, “Pien in idagi winyo dwan Rwot, cucuto kame in ipokere keda engu bino neki.” Aso kakame enabi kodagi donge nono oyai kede, en eko riamo kede engu di engu oko neke.

³⁷ Enabi nono oko ot but icuo ace di eko waco ne be, “Donga!” Icuo nono oko donge; odonge kitek paka wanakino en.

³⁸ Di enabi nono oko pokere kede, di eko ot daro abaka i yongayo, di etweo wange tetekeny kur twer ngene.

³⁹ Kakame abaka oudo tie beo kede kanono, enabi nono oko lelemo ne abaka be, “Adwong, ango oudo aoto kakame yi oudo odop iye, di sirikale moro oko kelo na ngakwor kame emako di eko waco na be, ‘Kur loni; ka iweke ebwot ibino kei kuo ni, arabo ibino mino cul me sente akaya me siliba tutumia adek (3000).’

⁴⁰ Do kakame ango ako donyo wire kede, en eko lwi eoto.” Di abaka me Isirael oko dwoko ne be, “Poore ebed kamanono, in itieko ngolo kop ni keni.”

⁴¹ Enabi nono oko nyilo egoe koudo eboo kede wange, di abaka oko ngene be en ebedo ngat acel kikom inabin.

⁴² Di eko waco ne abaka be, “Rwot owaco be, ‘Pien in ijalo dano koudo ango aciko be poore aneka ooto, pi manono, in ibino to kawange, kede jo ni da bino to kawang jo mege.’ ”

⁴³ Abaka oko yai dok Samaria di cunye owang, doko da di ening.