1 Abakai 2 - Baibuli I Leb Kumam 2013

Kope ka Daudi me Ajikini but Sulumani

¹ Kakame Daudi oudo oyapuno to kede, en eko ciko wode Sulumani di ewaco ne be,

² “Ango ayapuno to. Bed tek, doko bed kede nwangcuny,

³ di iko timo gikame Rwot Rubanga ni ciko ni. Lub yote mege di igwoko iswilia mege, cik mege, pwony mege kede gikame en emito, bala kame kowandiko kede i iswil ka Musa, tetekeny gi dedede kame in itimo bed ni kiber i kabedere dedede.

⁴ Di do Rwot ko bino mino kop mere cobere, kop kame bin en ewaco i koma be, ‘Ka jo kame lunyo wangi ogwoko yote me kuo gi, di gin kiko bedo jo kame genere i nyima kede cuny gi dedede kede kuo gi dedede, likame in ibino bedo abongo ngat kame lunyo wangi bala abaka me Isirael.’

⁵ “Bobo da in ingeo gikame Joab wot ka Seruya otimo nango, epone kame en eneko kede jotel are me isirikalen me Isirael, Abuneri wot ka Ner, kede Amasa wot ka Yeter. In iyutuno kite kame en elokere neko gi kede i kare me anapakin, pi nyango remo kame oudo oonyo i kare me yi. Gikame en etimo nono otieko mino raco me onyo remo tie i wie.

⁶ Pi mano, in ti kede rieko ni, do kur iweke ebed tuno ti di eko to i mulem.

⁷ “Do tim mwolo but awobe ka Barisilai dano me Gilead, di iko mino gi kibed i kom jo kame camo i wi emesa nin; pien gin bin kitimo nango mwolo i kare kame kiriamo keda di atie ringo tenge kibut omini Abisolom.

⁸ “Ngat acel da bobo tie, en Simei wot ka Gera, dano kame yai i bomba me Bakurim i adul me jo Benjamin. En bin elama kirac twatwal i ceng kame ango oudo aoto kede Makanaim, do kakame en eko bino kede pi riamo keda i ecilet me Yorodan, ango ako kwongere bute i nying Rwot be likame abino neke.

⁹ Pi mano, kur iweke be eli kede raco moro. In dano ariek; in ibino ngeno gikame itimo ne di iko neke edony kede wie atar lwar nono kabedo me jo oto.”

To ka Daudi

¹⁰ Di do Daudi oko to di oko yike i Bomba ka Daudi.

¹¹ Daudi oudo opugo jo me Isirael pi mwakini ot ongwon. Epugo ki bomba me Keburon pi mwakini kanyaare, kede i Yerusalem pi mwakini ot adek kiwie adek.

¹² Sulumani bin oko lunyo wang papa mere Daudi bala abaka, di ajakanut mere oko sipakin di eko doko tek.

To ka Adoniya

¹³ Di do Adoniya wot ka Kagit oko ot but Bateseba toto me Sulumani. Di Bateseba oko penye be, “Bino ni noni me mulem arabo benyo?” En eko gamo be, “Me mulem.”

¹⁴ Di eko medo be, “Ango akwai iyei na yamo kedi.” Bateseba oko gamo be, “Waca kop nono.”

¹⁵ En eko waco be, “In ingeo be ajakanut oudo mera, doko jo dedede me Isirael oudo ngeo kamanono. Do nataman ajakanut otieko lokere di eko doko me ka omina, pien manono oudo en mit ka Rwot.

¹⁶ Aso, nataman ango atie kede kwac acel buti; akwai kur idagi na.” Bateseba oko waco ne be, “Waca kwac ni nono.”

¹⁷ En eko waco be, “Ango akwai ipeny na Abaka Sulumani wek emia Abisagi dako me Sunem bala dako na, ango angeo be likame en ebino dagi nin.”

¹⁸ Bateseba oko waco be, “Manono ber, ango abino yamo kede abaka piri.”

¹⁹ Aso, Bateseba oko ot but abaka Sulumani pi yamo kede pir Adoniya. Abaka oko yai malo pi ot riamo kede, di abaka oko kudo wie piny pi mine wor. Di do eko dok bedo i kom mere me ajakanut, di eko mino kokelo ne toto mere da kom ace me ajakanut, di toto mere oko bedo i bade tetu cam.

²⁰ Bateseba oko waco be, “Ango atie kede kwac atitidi buti; akwai kur idagi na.” Di abaka oko waco ne be, “Toto, wac gikame itie kwano nono, pien ango likame abino dagi ni.”

²¹ En eko waco be, “Wek komi omini Adoniya Abisagi bala dako mere.”

²² Abaka Sulumani oko gamo dog toto mere be, “Pinyo komio in ikwao be ango ami Adoniya Abisagi? Kwai ne kiton ajakanut da do, me wek amie! Bobo da en ebedo omina adwong; kur ikwai pire kenekene, kwai da pi ngasaseredoti Abiata kede pi Joab wot ka Seruya!”

²³ Di do Abaka Sulumani oko kwongere i nying Rwot be, “Akwao Rubanga emia alola atek ka ango likame aneko Adoniya pi kwac mere noni!

²⁴ Pi mano, ango nan akwongere i nying Rwot kakuo, en ngat kame emoka di eko keta i kom me ajakanut ka papa na Daudi, doko en etieko gwoko cikere mere di eko mino ajakanut buta kede ikwae na, ceng atin Adoniya bino to.”

²⁵ Aso, Abaka Sulumani oko mino cik but Benaya wot ka Yekoyada di en eko ot eko neko Adoniya.

Dwoko Abiata Turgi kede to ka Joab

²⁶ Abaka Sulumani oko waco ne ngasaseredoti Abiata be, “Doki Anatot turu. In oudo ipoore to, do ango nataman likame abino neki, pien in oudo en kame igwoko Sanduku me Isikan ka Rwot i kare ka papa na Daudi, doko in inywako kede en can dedede kame en ebeo iye.”

²⁷ Aso, Sulumani bin oko riamo Abiata i tic me ngasaseredoti ka Rwot, di en eko mino kop kame Rwot bin owaco i kom jo me ot ka Eli i Silo ocobere.

²⁸ Kakame Joab oko winyo kede gi kotimere, eko ringo i Eema ka Rwot di eko mako iswongen me alutari. (Joab oudo ogango Adoniya, do likame Abisolom.)

²⁹ Kakame oko waco ne kede Abaka Sulumani be Joab oudo otieko ringo i Eema ka Rwot doko oudo etie i alutari, en eko cwano Benaya wot ka Yekoyada neko Joab.

³⁰ Aso, Benaya oko ot i Eema ka Rwot di eko waco ne Joab be, “Rwot ciki be iwok ooko!” Do en eko waco be, “Li ba, ango abino to kan.” Di do Benaya bobo oko dok but abaka di eko waco ne kop kame Joab oudo owaco.

³¹ Abaka oko gamo doge be, “Tim bala kame en etieko waco, neke di iko yike. Manono bino kwanyo kibuta kede kibut jo me ot ka papa na raco me onyo remo me jo kame Joab oneko abongo tien kop moro.

³² Rwot bino dwoko i wie raco me remo kame en eonyo; pien abongo papa na Daudi ngeno, en eoto suro di eko neko kede epima jo are abeco doko kopoore kalamo en, Abuneri wot ka Ner, ngatel me isirikalen me Isirael, kede Amasa wot ka Yeter, ngatel me isirikalen me Yuda.

³³ Raco me onyo remo gi bino dok i wi Joab kede ikwae mege nakanaka. Do Rwot bino mino mulem bedo tie nakanaka but ikwae ka Daudi kede jo me ode kede i ajakanut mere.”

³⁴ Di do Benaya wot ka Yekoyada oko ot di eko neko Joab, di oko yike i paco mere i nget wi tim.

³⁵ Abaka bin oko mino Benaya odoko ngatel me isirikalen kawang Joab, doko eko keto ngasaseredoti Sadoki kawang Abiata.

To ka Simei

³⁶ Di do abaka oko cwano dano ot lwongo Simei di en eko waco ne be, “Ger odi Yerusalem kan di iko donyo bedo iye, doko kur iyai iye pi ot karamoroni akadi pi kop kame rom nadi.

³⁷ Pien ceng kame in iyai kede me ot, di iko ngolo esamai me Kideron, mito in ingei ateteni be in ibino to; raco me to ni bino dong i wii.”

³⁸ Simei oko waco ne abaka be, “Gikame in iwaco ber; bala kame in adwong na abaka itieko waco, ango abino timo kamanono.” Aso, Simei oko bedo Yerusalem pi kare kalac.

³⁹ Do ingei mwakini adek, ipasoi are ka Simei oko ringo but Abaka Akis wot ka Maka me Gat. Kakame oko waco ne kede Simei be ipasoi mege oudo tie Gat,

⁴⁰ en eko yai di eko bedo i ngei punda mere di eko ot Gat but Abaka Akis, pi mono ipasoi mege. En bin eko udo gin di eko dwoko gi Yerusalem.

⁴¹ Kakame oko waco ne kede Sulumani be Simei oudo oyai ki Yerusalem di eko ot Gat eko dwogo,

⁴² abaka oko cwano dano lwongo Simei di eko penye be, “Benyo, likame ango oudo ami ikwongere i nying Rwot be likame ibino yai donyo ooko me Yerusalem? Benyo, likame oudo ango akwenyaro in be i ceng kame in ibino yai kede di iko ot karamoroni kenekene, in ibino to, di in iko waco na be gikame oudo ango awaco nono ber, in ibino timo kamanono?

⁴³ Pinyo komio in likame igwoko cikere ni but Rwot, doko da iko dagi lubo timo gikame ango oudo aciko ni?”

⁴⁴ Abaka oko waco da ne Simei be, “In ingeo i cunyi keni gikareco dedede kame in bin itimo ne papa na Daudi. Rwot bino dwoko i wii raco nin.

⁴⁵ Do ebino mino ango winyo, doko ebino mino ajakanut ka Daudi cungo di etek nakanaka.”

⁴⁶ Di do abaka oko mino cik but Benaya, di en eko ot di eko neko Simei. Sulumani bin oko mino ajakanut mere oko cungo di etek.