1 Abakai 19 - Baibuli I Leb Kumam 2013

Elia i Moru me Sinai

¹ Akab oko waco ne Jesebel gi dedede kame Elia otimo, kede epone kame eneko kede inabin ka Baal dedede.

² Jesebel oko cwano ngaor but Elia pi waco ne be, “Akwao be miero rubangan tim nango gikarac kalamo manono, ka tuno diki esawa noni oudo pwodi likame ango aneki bala kame ida ineko kede inabin ka Baal.”

³ Lworo oko mako Elia di eko ringo kede ngatic mere Beereseba i adul me Yuda. En eko weko ngatic mere kunono

⁴ di eko ot i wi tim Sapali me ceng acel. Di do eko bedo piny i dud yat moro atie kare kene di eko paro be koto oudo eto. En elego be, “Rwot, eroma do, kwany do kuo na, pien nan ango da arom aroma kede joakwari na kotieko to.”

⁵ Elia oko buto piny i dud yat nono di eko nino. Cucuto malaika ka Rwot oko mule di waco ne be, “Yai malo icami.”

⁶ En eko ngongolo piny di eko neno mugati kede cupa me pii di tie kawie. En eko cam di eko mato pii di doko eko buto.

⁷ Malaika ka Rwot oko bobo dwogo tien me are di oko mule di waco ne be, “Yai malo icami, aso ka li sapali nono bino oli twatwal.”

⁸ Elia oko yai malo di eko cam, kede eko mato pii, di eko udo teko me ot pi ceng ot ongwon tuno i moru me Sinai, en moru ka Rubanga.

⁹ Di bin etuno kunono, en eko donyo i abo moro eko buto iye. Di Rwot oko waco ne Elia be, “Nyo kame itie timo i kan?”

¹⁰ Elia oko dwoko be, “Rwot Rubanga me jo yi, ango abedo keto cunya i komi; do jo me Isirael otieko turo isikan gi kedi, kirereto alutarin ni di kiko neneko inabin ni. Ango kena en adong, nan kitie da mito neka.”

¹¹ Rwot oko waco ne be, “Oti icungi i wi moru i nyima, pien ango ayapuno beo kunono.” Di yamo atek oko buko, di eko bebelo moru kede lela ongingidun, do likame oudo Rwot tie i yamo nono. Ingei yamo buko piny oko yangere, do likame oudo Rwot tie i yangere me piny nono.

¹² Di ingei yangere me piny mac oko bino, do likame oudo Rwot tie i mac nono. Ingei to me mac, dwan me iwewei atitidi oko winyere.

¹³ Kakame Elia owinyo kede dwan nono, en eko umo wange kede egoe mere di eko ot cungo i ekeko me abo. Di dwan moro oko waco ne be, “Elia, nyo kame itie timo kan?”

¹⁴ En eko dwoko be, “Rwot Rubanga me jo yi, ango abedo keto cunya i komi; do jo me Isirael otieko turo isikan gi kedi, kirereto alutarin ni di kiko neneko inabin ni. Ango kena en adong, nan kitie da mito neka.”

¹⁵ Di Rwot oko waco ne be, “Doki i wi tim me Damasiko; ka ituno kunono, wir Kasael edok abaka me Siria.

¹⁶ Doko da iwir Yeku wot ka Nimisi pi doko abaka me Isirael; iko wiro Elisa wot ka Sapat me Abel-mekola pi bedo enabi kame bino lunyo wangi.

¹⁷ Ngat kame bino bwot likame Kasael neko, Yeku en kame bino neke; ngat kame bino bwot likame Yeku neko, Elisa en kame bino neke.

¹⁸ Do abino weko jo tutumia kanyaare (7,000) me Isirael dong, gin jo kalikame kiriondiko woro Baal, kede jo kame dog gi likame obilo noto lem cal mere.”

Kolwongo Elisa

¹⁹ Elia oko yai ki kuno di eko ot, di eko udo Elisa wot ka Sapat di etie pur kede ecuka. Oudo kwei me icukai tie tomon kiwie are, di en oudo etie pur kede ecuka me ajikini. Elia oko beo i ngete di eko gonyo egoe mere me adoka di eko keto i kom Elisa.

²⁰ Elisa oko weko twonin, di eko ringo but Elia di eko waco ne be, “Ber kong aoti anot lem papa na kede toto na pi moto gi be asounu do, di do ango ako bino di ako lubi.” Elia oko dwoko be, “In oti, do yutuno gikame atieko timo ni.”

²¹ Elisa oko dok eko ngongolo twonin mege, di eko moko mac kede ayokoi kame oudo etweo gi kede, di eko tedo gi. En eko mino jo kame oudo en epuro kede gi ringo di kiko camo. Di do en eko ot edonyo lubo Elia, di eko doko ngakonye.