1 Abakai 14 - Baibuli I Leb Kumam 2013

To ka Wot ka Yeroboam

¹ I kare nono tuo oko mako Abija wot ka Yeroboam.

² Yeroboam oko waco ne dako mere be, “Jujulo komi tetekeny kur ngatamoro ngei, di iko ot Silo kakame enabi Akija bedo iye, en ngat kame oudo ewaco be ango apoore doko abaka me Isirael.

³ Ter ne mugati tomon, kede kek mogo kede cupa me mokic; en ebino waco ni gikame bino timere ne atin wa.”

⁴ Dako ka Yeroboam oko timo kamanono, en eoto Silo i paco ka Akija. Akija oudo do likame neno piny pien tio oudo omio wange odoko mwadamwada.

⁵ Do Rwot oko waco ne Akija be, “Dako ka Yeroboam tie bino buti penyo kop i kom atin mere, pien atin nono tuwo.” Di Rwot oko waco ne Akija kop kame epoore dwoko ne. Kakame dako ka Yeroboam otuno kede, en eko mire bala ebedo dano apat.

⁶ Do kakame Akija owinyo kede twomere me tiene kakame oudo etie donyo kede i ekeko, en eko waco ne be, “Woki, dako ka Yeroboam; pinyo komio itie mire be in dano apat? Ango atie kede kop kalikame ber piri.

⁷ Oti iwac ne Yeroboam be Rwot Rubanga me Isirael owaco be, ‘Ango ayeri kikom jo di ako kiarao in idoko ngatel me jo na me Isirael.

⁸ Ango akwanyo ajakanut ki cing ikwae ka Daudi di ako mini. Do likame in ibedo cal kede ngatic na Daudi, ngat kogwoko cik na eko lubo kop na kede cunye dedede, di etimo gikame ber kenekene i wanga.

⁹ Do in itimo gikarac kalamo jopug ace apat kame in ilubo; in itieko daga di iko wango cunya i yore me timo piri cal me rubangan me awora.

¹⁰ Pi manono, ango abino mino gikarac timere i odi. Ango abino neneko ikwae ni acuo dedede, kobedo ipasoi amoto kalikame obedo ipasoi. Abino wearo jo me odi bala kame dano wango kede woyo tuno en tiek pitipit.

¹¹ Jo ni kame bino to i bomba igwogin en kame bino camo; kede jo ni kame bino to i calere winy en kame bino camo. Ango Rwot atieko waco.’ ”

¹² Akija oko waco ne dako ka Yeroboam be, “Pi manono yai iot turi, cucuto di in idonyo i bomba wodi bino to.

¹³ Jo dedede me Isirael bino koke di kiko yike. Piento en kene kikom jo me ot ka Yeroboam en kame kobino yiko, piento en kene kikom jo me ot ka Yeroboam en kame cuny Rwot Rubanga me Isirael yom i kome.

¹⁴ Rwot bino cibo abaka me Isirael oyotoyot, kame bino jiko ot ka Yeroboam.

¹⁵ Rwot bino tidilo Isirael, di kom gi ko donyo miel bala otol kame pure i pii. En ebino puto jo me Isirael ki lobo aber noni kame bin en emio joakwari gi, di eko bino sarakino gi kalamo ecilet me Eupurate, pien gin kiwango cunye i yore me cweno cal me rubanga adako anyinge Asera.

¹⁶ En ebino jalo Isirael pi dub ka Yeroboam kame en etimo, kede kame emio jo me Isirael otimo.”

¹⁷ Di dako ka Yeroboam oko yai edok Tirisa. Cucuto di etuno i paco, atin oko to.

¹⁸ Jo dedede me Isirael oko koke bala kame Rwot oudo owaco ki dog ngatic mere enabi Akija.

To ka Yeroboam

¹⁹ Gi dedede kame Abaka Yeroboam otimo, epone kame eyi kede, kiton epone kame epugo kede, kowandiko gi i Itatam amako Abakai me Isirael.

²⁰ Yeroboam bin opugo bala abaka pi mwakini ot are kiwie are, eko to di oko yike, di wode Nadab oko lunyo wange.

Abaka Rekoboam me Yuda

²¹ Rekoboam wot ka Sulumani oudo tie kede mwakini ot ongwon kiwie acel i kare kame edoko kede ngapug me Yuda, di eko pug pi mwakini tomon kiwie kanyaare di etie Yerusalem, en bomba kame Rwot oudo oyero ki adulion dedede me Isirael pi jo wore kiye. Toto me Rekoboam oudo nyinge Naama, dako me Amon.

²² Jo me Yuda otimo gikarac i nyim Rwot; gin kiwango cunye pi dub kame gin kitimo, dub akalamo kame joakwari gi oudo otimo.

²³ Pien gin kigero abilan me woro rubangan i wi imukuran kede i dud yen koduko, di kiko sisipo ipirin me kide kede cal ka Asera me awora.

²⁴ Doko oudo kitie kede cuo kede mon kame jo buto kede gi i abilan kame kigero nogo. Jo me Yuda oudo timo jamini areco dedede kame jo me lobo nono oudo timo, jo kame Rwot oriamo ki kanono i kare kame jo me Isirael obino kede.

²⁵ I mwaka me kany me apugan ka Rekoboam, Abaka Sisak me Misiri oko suro Yerusalem.

²⁶ En eko tero abar dedede me tempulo kede me paco ka abaka. Doko da eko tero ibukui dedede kame Sulumani oudo otimo kede Saabu.

²⁷ Aso, Abaka Rekoboam oko timo ibukui me nyonyo buronsi, di eko mino gi i cing jo kame daro ekeko me ot ka abaka.

²⁸ Tien acelacel kame Rekoboam oudo tie ot kede i tempulo, jodar oudo mako ibukui nogo i cing gi, do ingei manono oudo kiko dwoko gi i agola me gwoko jame.

²⁹ Gi dedede ace kame Abaka Rekoboam otimo kowandiko gi i Itatam amako Abakai me Yuda.

³⁰ I kare noni dedede Rekoboam kede Yeroboam oko bedo yi nakanaka.

³¹ Rekoboam oko to di oko yike i nget joakwari mege i Bomba ka Daudi. Nying toto mere oudo Naama dako me Amon. Wode anyinge Abijam en oko lunyo wange bala abaka.