1 Abakai 12 - Baibuli I Leb Kumam 2013

Jo me Isirael atie i Bad tetu Malo Ojemo

¹ Rekoboam oko ot Sekem, pien jo dedede me Isirael oudo ocokere kunono pi cibe doko abaka.

² Kakame Yeroboam wot ka Nebat owinyo kede kop noni di oudo etie Misiri kakame oudo eringo iye kibut abaka Sulumani, en eko dong bedo Misiri.

³ Jo me bad tetu malo me Isirael oko lwonge, di Yeroboam kede ekodet me jo me Isirael oko ot but Rekoboam di kiko waco ne be,

⁴ “Papa ni Sulumani bin otero wa kirac, emio wa yeno twon peko. Nan in jajaro peko kame en emio wa yeno nono, di wan oko bino tic nin.”

⁵ En eko waco negi be, “Tiekunu ceng adek di ikounu dwogo buta.” Aso jo oko yai kioto.

⁶ Di abaka Rekoboam oko pepenyo tam kibut joadongo kame oudo mio papa mere Sulumani tam i kare kame oudo ekuo kede be, “Tam nyo kame imianu pi dwoko ne jogi?”

⁷ Gin kiko dwoko ne be, “Ka in imito timo ne jogi tic kiber, dwok negi kop aber i kom gikame kikwai iye, di gin kiko bino tic nin nakanaka kede wor.”

⁸ Do en eko dagi lubo tam kame joadongo omie, di eko ot penyo tam kibut awobe kame en edongo kede gi di nan kiko doko jo kame mie tam.

⁹ En epenyo gi be, “Tam nyo kame imianu pi dwoko ne jo kokwaa pi jajaro negi peko kame nan kitie yeno?”

¹⁰ Gin kiko waco ne be, “Oti iwac ne jo kopenyi nogo be, ‘Lweta atidi dwong kalamo pier papa na.

¹¹ Papa na omio wu yeno peko, do ango abino mino wu yeno peko adwong kalamo. En edao wu kede pobo, do ango abino bungo wu kede ebela me lilim.’ ”

¹² Aso, Yeroboam kede jo apat dedede oko dok but Rekoboam ingei ceng adek, bala kame en oudo ewaco negi.

¹³ Abaka oko yamo kede jo kede dwan ager; en edagi tic kede tam kame joadongo oudo omie,

¹⁴ di eko lokere yamo negi kop kame lubere kede tam kame awobe omie. En ewaco negi be, “Papa na oudo omio wu yeno peko, do ango abino mino wu yeno peko adwong kalamo. En edao wu kede pobo, do ango abino bungo wu kede ebela me lilim.”

¹⁵ Abaka bin likame oko winyo kwac me jo pien manono oudo obedo alokaloka kame Rwot oudo tie kelo pi cobo kop mere kame oudo ewaco ne Yeroboam wot ka Nebat ki dog Akija me Silo.

¹⁶ Kakame jo dedede me Isirael oneno kede be abaka odagi winyo kwac gi, gin kiko dwoko ne abaka be, “Wan oli kede iner moro i ot ka Daudi; likame tie gimoro kame wan otwero lunyo amakere kede wot ka Yese. Jo me Isirael, odokunu i miere wa! Rekoboam do pug jo mege me ot ka Daudi.” Aso, jo me Isirael oko dok i iemai gi.

¹⁷ Di Rekoboam oko donyo pugo jo kame bedo i bomban me Yuda kenekene.

¹⁸ Abaka Rekoboam oko cwano Adoniram, en ngat kame oudo daro jo kame kodio timo tic tetek, but jo me Isirael, do gin kiko didipo en kede kide tuno to. Abaka Rekoboam oko susunyo yito i cabala mere di eko ringo Yerusalem.

¹⁹ Cako i kare nono tuno tin jo me Isirael oko bedo jemo ne apugan me ot ka Daudi.

²⁰ Kakame jo me Isirael owinyo kede be Yeroboam oudo odwogo ki Misiri, gin kiko lwonge i cokere di kiko cibe edoko abaka me Isirael. Likame tie ngatamoro oko doko yei apugan me ot ka Daudi kwanyo kenekene jo me ekeko ka Yuda.

Kop kame Semaya Omurao

²¹ Kakame Rekoboam otuno kede Yerusalem, en eko coko jo dedede me ekeko ka Yuda kede me ka Benjamin, gin dedede isirikalen abeco tutumia tol acel kede ot kanyauni (180,000). En oudo emito ot yi kede atekerin atie i bad tetu malo pi dwoko loc mere.

²² Do Rubanga oko waco ne enabi Semaya

²³ pi ot waco ne Abaka Rekoboam me Yuda, en wot ka Sulumani, kede ne jo dedede me ikekon ka Yuda kede me ka Benjamin, kede ne jo apat dedede be Rwot owaco be,

²⁴ “Kur isurunu joawade wu, gin jo me Isirael; wun dedede dokunu i miere wu, pien gi kotimere obedo iik nango.” Aso, gin kiko yei winyo kop ka Rwot di kiko dok i miere gi.

Yeroboam Olokere Tenge kibut Rubanga

²⁵ Abaka Yeroboam me Isirael oko celo bomba me Sekem i piny me imukuran me Epuraimu di eko donyo bedo iye. Di eko yai ki kanono di bobo eko ot celo bomba me Penuel.

²⁶ Di Yeroboam oko waco kene be, “Ajakanut noni cengemogo romo lokere dok i ot ka Daudi.

²⁷ Ka jo omeede ot nakanaka Yerusalem pi mino Rwot giayala i tempulo, gin cengemogo bobo kibino dok i cing ngadwong gi, en Abaka Rekoboam me Yuda, di kiko bino neka.”

²⁸ Aso, abaka oko tamo i kom kop nono di eko cweno roce are kede saabu. En eko waco ne jo be, “Itiekunu bedo wire ot Yerusalem pi kare koromo. Wun jo me Isirael nan rubangan wu do ige kokwanyo wu ki lobo me Misiri!”

²⁹ En eko cibo acel Betel kede ocelu eko cibo Dan.

³⁰ Manoni oko doko dub, pien jo oko donyo ot woro caljwogi nogi i Betel kede i Dan.

³¹ En bobo eko gero ude me woro rubangan i wi imukuran, di eko yero josaseredoti kikom jo me ikekon apat, do weko kikom Jolebi.

³² Yeroboam oko cibo ceng me kwero ebaga i buto duwe tomon kiwie kany me duwe me kanyauni, di eporere kede ebaga kame oudo kokwero i Yuda. En eko mino giayala i wi alutari i Betel but roce kame oudo ecweo. Eko cibo josaseredoti i kabedere kame en oudo egero i wi imukuran me woro rubangan.

³³ En eko ot i alutari kame oudo etimo Betel, eko mino giayala i buto duwe tomon kiwie kany me duwe me kanyauni, en ceng kame en emoko kede wie kene pi jo me Isirael kwero iye ebaga.