1 Abakai 1 - Baibuli I Leb Kumam 2013

Abaka Daudi i kare me Tio mere

¹ Abaka Daudi oudo oti do twatwal, doko akadi oudo koume kede igoen, likame oudo ewinyo lieto moro.

² Aso, jotic mege oko waco ne be, “Adwong abaka, wek wan omoi atin nyako moro kalikame pwodi ongeo icuo di en eko donyo bedo kedi di egwoki. En ebino buto i ngeti di eobo komi.”

³ Gin kiko donyo mono adul me Isirael dedede pi mito udo nyako acil; kiko udo Abisagi dano me Sunem, di kiko kele but abaka.

⁴ Nyako nono oudo cil twatwal. En bin eko donyo gwoko abaka di etimo ne tice, do abaka likame oko loke edoko dako mere.

Adoniya Otingere kene Bedo Abaka

⁵ Aso, Adoniya wot ka Daudi kame enywalo kede Kagit oko tingere kene di ewaco be, “Ango abino bedo abaka”; en bin eko iiko pire cabalan kede jo kame ringo kede asigiran, kede cuo ot kany kame telo ne yongayo.

⁶ Papa mere oudo likame ocoke pi kop moro cako dongo mere. En bobo da oudo ebedo icuo acil twatwal, doko en kame oudo onywale elubo Abisolom.

⁷ En bin eko winyere kede Joab wot ka Seruya, karacel kede Abiata ngasaseredoti di gin kiko yei gange.

⁸ Do Sadoki ngasaseredoti, kede Benaya wot ka Yekoyada, kede enabi Natan, Simei, Rei, kede isirikalen kame bin daro Daudi oko dagi gango Adoniya.

⁹ Ceng moro acel Adoniya oko mino giayala angola me romini, twonin, kede doke kocwe i wi lela me Sokelet, kame bin tie i nget atan me Enerogel. En bin eko lwongo imiegu mege dedede, awobe ka abaka, kede ijakai me Yuda dedede,

¹⁰ do en likame eko lwongo omin mere Sulumani arabo enabi Natan amoto Benaya akadi isirikalen kame bin daro abaka.

¹¹ Di do Natan oko penyo Bateseba, toto me Sulumani be, “Benyo, in likame iwinyo be Adoniya wot ka Kagit otieko doko abaka do di likame adwong wa abaka Daudi ngeo gimoro iye?

¹² Aso, nataman in bia, wek ango amii tam, tetekeny itwer lako kuo ni kede me ka wodi Sulumani.

¹³ Ot in awakawaka but Abaka Daudi, di iko waco ne be, ‘Adwong na abaka, benyo, likame in oudo ikwongere but ngatic ni di iwaco be wodi Sulumani en kame bino lunyo wangi bala abaka? Pinyo bo komio Adoniya nataman odoko abaka?’

¹⁴ Di do pwodi in itie kunono yamo kede Abaka, ango da abino donyo but wu kunono di ako moko kop kame in iwaco.”

¹⁵ Aso, Bateseba oko ot but abaka i agola mere me buto. Abaka oudo oti twatwal; Abisagi dako me Sunem oudo tie gwoke.

¹⁶ Bateseba oko kudo wie piny di eko mino wor but abaka, di abaka oko penye be, “Nyo kame cunyi tie mito?”

¹⁷ Bateseba oko gamo be, “Adwong na, in oudo ikwongere but ngatic ni i nying Rwot Rubanga ni di iwaco be wodi Sulumani bino lunyo wangi bala abaka.

¹⁸ Do nataman ajoto Adoniya otieko doko abaka, bed bala in adwong na likame ingeo gimoro iye.

¹⁹ En etieko mino giayala angola atot me twonin, doke kocwe, kede romini, di eko lwongo awobe ni dedede, ngasaseredoti Abiata, kede Joab ngatel me isirikalen, do Sulumani ngatic ni en likame elwongo.

²⁰ Do in adwong na abaka, jo dedede me Isirael tie neni pi waco negi ngai en kame bino lunyo wangi bala abaka.

²¹ Ka in likame itimo kamanono, oyotoyot ingei in adwong na abaka to di iko ot wei kede joakwari ni, ango kede woda Sulumani kobino tero wa bala jokolo.”

²² Di pwodi oudo en etie yamo kede abaka, enabi Natan di tuno.

²³ Bin oko waco ne abaka be enabi Natan oudo tie kunono. Kakame en eko donyo kede but abaka, en eko mino abaka wor di ekudo wie piny.

²⁴ Natan oko waco be, “Adwong na abaka, benyo, in itieko waco be Adoniya en kame bino lunyo wangi bala abaka?

²⁵ Pien tin en etieko ot di eko mino giayala atot me twonin, doke kocwe, kede romini, doko etieko lwongo awobe nin dedede, Joab ngatel me isirikalen kede ngasaseredoti Abiata. Gin nataman kitie cam kede amata kede en, di kiwaco be, ‘Abaka Adoniya bed kuo pi kare kalac!’

²⁶ Do en likame eko lwonga, ango ngatic ni, kede ngasaseredoti Sadoki, arabo Benaya amoto ngatic ni Sulumani.

²⁷ Benyo, in adwong na abaka en kame itimo gi noni di likame iko mino ngatic ni ongeo ngat kame bino lunyo wangi?”

²⁸ Abaka Daudi oko waco be, “Lwong Bateseba buta kan.” Bateseba oko bino but abaka di eko cungo i nyime.

²⁹ Abaka oko kwongere di ewaco be, “Akwongere i nying Rwot kakuo, en ngat kame etieko lako kuo na ki peko dedede,

³⁰ bala kame oudo akwongere kede buti i nying Rwot, Rubanga me Isirael be wodi Sulumani bino lunyo wanga bala abaka, tin ango do acobo kwongere nono.”

³¹ Bateseba oko luro wie piny di eko mino abaka wor, di eko waco be, “Ango akwao be adwong na Abaka Daudi bed kuo nakanaka!”

³² Abaka Daudi oko waco be, “Lwongunu na ngasaseredoti Sadoki, enabi Natan, kede Benaya wot ka Yekoyada.” Kakame gin kiko bino kede but abaka,

³³ en eko waco negi be, “Otunu kede jotic na, di ikounu mino woda Sulumani wanano asigira nango amaka, di ikounu tere i atan me Gikon.

³⁴ Kame itununu kunono, ngasaseredoti Sadoki kede enabi Natan bino wiro Sulumani pi bedo abaka me Isirael. Di do ikounu kuto agwara, di jo dedede ko lelemo be, ‘Abaka Sulumani bed kuo pi kare kalac!’

³⁵ Wun ibinunu dwogo di ilubenu di en eko bino bedo i wi kom na me ajakanut. En ebino bedo abaka kame lunyo wanga, pien ango atieko yere pi bedo ngapug me Isirael kede Yuda.”

³⁶ Benaya wot ka Yekoyada oko gamo dog abaka be, “Amen! Ango akwao Rwot, Rubanga ka adwong na abaka emie ebed kamanono.

³⁷ Bala kame Rwot obedo tie kede in adwong na abaka, kamanono da akwae ebed kede Sulumani, di eko mino apugan mere kalamo meri.”

³⁸ Aso, ngasaseredoti Sadoki, enabi Natan, kede Benaya wot ka Yekoyada, kede jo Keret kede jo Pelet, oko mino Sulumani owanano asigira ka Daudi, di gin kiko tere i atan me Gikon.

³⁹ Kakame gin kituno kede kunono, ngasaseredoti Sadoki oko kwanyo tung le kame oudo mo me olibeti tie iye, mo kame en oudo ekwanyo ki Eema ka Rwot, di en eko wiro kede Sulumani. Di do oko kuto agwara, di jo dedede oko lelemo be, “Abaka Sulumani bed kuo pi kare kalac!”

⁴⁰ Di jo dedede oko dok di kilube, di kikuto bilo atot di kidwong kede kilel. Woo me dwan gi oko mino piny oyangere.

⁴¹ Adoniya kede wele mege dedede oudo tie do tieko camo ebaga, di gin kiko winyo woo me dwan jo. Kakame Joab owinyo kede koko me agwara, en eko penyere be, “Pinyo komio woo tie i bomba?”

⁴² Di pwodi oudo en etie yamo, Jonasan wot ka ngasaseredoti Abiata di tuno. Adoniya oko waco ne be, “Donyi i ot, pien in dano aber doko ateteni in itie kelo rwonge aber.”

⁴³ Jonasan oko gamo dog Adoniya be, “Li gire, pien adwong wa Abaka Daudi otieko keto Sulumani pi bedo abaka.

⁴⁴ Abaka otieko mino ngasaseredoti Sadoki, enabi Natan, kede Benaya wot ka Yekoyada, karacel kede jo Keret kede jo Pelet onyamaro en i atan me Gikon. Gin kimie ewanano asigira ka abaka,

⁴⁵ di Sadoki kede Natan oko wire pi bedo abaka. Di do gin kiko yai dwogo kikuno kede kilel adwong. Manono en komio woo nataman tie i bomba. Woo kame iwinyunu nono obedo mergi.

⁴⁶ Sulumani do nataman bedo i wi kom me abaka.

⁴⁷ Medo i wi manono, jotic me abaka oko ot pwono adwong wa Abaka Daudi di kiwaco be, ‘Okwao Rubanga emi nying Sulumani bed iruo kalamo meri, doko emi apugan mere kalamo meri.’ Di Abaka Daudi oko luro wie piny i wi itanda mere pi woro Rubanga

⁴⁸ di eko lego be, ‘Pak bed but Rwot, Rubanga me Isirael, en ngat kame tin emio atina acel kikom idwe na obedo i wi kom na me ajakanut, doko emio ada abedo kuo di ako neno manoni kede wanga.’ ”

⁴⁹ Di do wele ka Adoniya oko tengere yai kede mielkom di kiko sarakin.

⁵⁰ Adoniya, pi lworo Sulumani, oko yai di eko ot mako iswongen me alutari.

⁵¹ Sulumani bin oko winyo be Adoniya oudo tie lwore, kede be oudo etie mako iswongen me alutari di ewaco be, “Mito kong Abaka Sulumani kwongere buta be en likame ebino neka.”

⁵² Sulumani oko dwoko be, “Ka en enyuto be en dano aber, akadi yer wie acel likame kobino mulo; do ka en etie kede cuny arac, ebino to.”

⁵³ Abaka Sulumani oko cwano dano omo Adoniya ki alutari kunono. Adoniya oko bino di eko mino Abaka Sulumani wor, di abaka oko waco ne be, “In ot paco ni.”