Nahúm 1 - Biblían (2007)

¹ Spádómur um Níníve. Bók um vitrun Nahúms frá Elkós.

Dómur Guðs yfir Níníve

² Drottinn er ákaflyndur Guð og heiftrækinn. Drottinn er heiftrækinn og fullur bræði. Drottinn hefnir sín á andstæðingum sínum og er langrækinn við fjendur sína.

³ Drottinn er seinn til reiði og máttugur, hann lætur engum óhegnt. Í fellibyljum og stormi er för hans og skýin eru rykið undan fótum hans.

⁴ Hann hastar á hafið, þurrkar það upp og lætur árnar þverra. Basan og Karmel fölna og blómi Líbanonsfjalls visnar.

⁵ Fjöllin skjálfa fyrir honum og hálsarnir gliðna. Jörðin skelfur fyrir honum, veröldin og allt sem í henni er.

⁶ Hver fær staðist bræði hans og hver þolað heiftarbál hans? Reiði hans hellist yfir sem eldur og björgin klofna fyrir honum.

⁷ Drottinn er góður, athvarf á degi neyðarinnar, hann annast þá sem leita hælis hjá honum,

⁸ jafnvel þegar vatnsflóðið æðir fram. Óvinum sínum gereyðir hann og hrekur þá út í myrkrið.

⁹ Hvað hyggist þér fyrir gegn Drottni? Hann gereyðir. Neyðin kemur eigi öðru sinni.

¹⁰ Eins og menn frávita af drykkju fuðra þeir upp, brenna til ösku eins og flækt þyrnikjarr, líkt og skraufþurr hálmur.

¹¹ Frá þér fór hinn illviljaði sem bruggaði vélráð gegn Drottni.

¹² Svo segir Drottinn: Þótt þeir séu fjölmennir og öflugir þá munu þeir afmáðir verða og farast. Hafi ég þjakað þig áður mun ég ekki þjaka þig framar.

¹³ Og nú brýt ég ok hans af þér og slít sundur fjötra þína.

¹⁴ En ákvörðun Drottins um þig er þessi: Enginn mun erfa nafn þitt, úr útskornum og steyptum skurðgoðum hofa þinna bý ég þér gröf, fyrirlitlega svo sem þú ert.