Míka 1 - Biblían (2007)

¹ Orð Drottins sem kom til Míka frá Móreset á dögum Jótams, Akasar og Hiskía, konunga í Júda, það er honum vitraðist um Samaríu og Jerúsalem.

Guð stígur ofan til dóms

² Heyrið, allar þjóðir. Hlusta þú, veröld, og allt sem í þér er. Drottinn, Guð minn, ber yður sökum, Drottinn vitnar gegn yður úr sínu heilaga musteri.

³ Sjá, Drottinn kemur úr dvalarstað sínum, hann kemur ofan og treður hæðir jarðarinnar.

⁴ Fjöllin bráðna fyrir honum og dalirnir gliðna sem vax fyrir eldi líkt og vatn steypist ofan bratta hlíð.

⁵ Og allt þetta sökum afbrota Jakobs og synda Ísraelsættar. Hver er misgjörð Jakobs? Er það ekki Samaría? Og hver er synd Júda? Er það ekki Jerúsalem?

⁶ Þess vegna geri ég Samaríu að rúst á víðavangi, gróðurreit fyrir vínvið, því að steinum hennar mun ég ryðja niður í dalinn og afhjúpa undirstöður hennar.

⁷ Mölvaðar skulu allar höggmyndir hennar og allur skækjuauður hennar borinn á eld. Ég eyði öllum skurðgoðum hennar því að fyrir hórgjöld eru þau fengin og að hórgjöldum skulu þau aftur verða.

⁸ Vegna þessa harma ég og kveina, geng berfættur og klæðlaus, ýlfra eins og sjakalinn, væli eins og uglan.

⁹ Því að sár Samaríu er ólæknandi, það nær allt til Júda, allt að hliðum þjóðar minnar, allt til Jerúsalem.

¹⁰ Segið ekki frá því í Gat. Grátið ekki. Veltið yður í rykinu í Betleafra.

¹¹ Hverfið burt naktir og smáðir, þér íbúar í Safír. Ekki komast íbúar Saanan undan. Í Bet Haesel hljóma harmakvein, í henni eigið þér enga stoð framar.

¹² Íbúarnir í Marot væntu sér heilla, en hörmungar hefur Drottinn sent allt að hliðum Jerúsalemborgar.

¹³ Spennið hesta fyrir vagnana, þér, íbúar í Lakís. Þar var drýgð höfuðsynd dótturinnar Síonar, hjá yður birtust syndir Ísraels.

¹⁴ Fyrir þá sök verður skilnaður milli yðar og Móreset-Gat. Húsin í Aksív munu bregðast konungum Ísraels líkt og þorrin vatnslind.

¹⁵ Enn sendi ég sigurvegara gegn yður sem í Maresa búið. Og enn mun tign Ísraels hörfa til Adúllam.

¹⁶ Skerðu hár þitt og rakaðu höfuðið vegna barnanna sem áður voru yndi þitt. Gerðu þig nauðasköllótta sem hrægamm því að börnin hafa verið hrakin frá þér í útlegð.