Jeremía 1 - Biblían (2007)

¹ Ræður Jeremía Hilkíasonar sem var einn af prestunum í Anatót í Benjamínslandi.

² Orð Drottins kom til hans á dögum Jósía Amónssonar Júdakonungs, á þrettánda stjórnarári hans.

³ Orð Drottins kom einnig til hans á dögum Jójakíms Jósíasonar, konungs í Júda, allt til loka ellefta stjórnarárs Sedekía Júdakonungs þegar íbúar Jerúsalem voru herleiddir í fimmta mánuðinum.

Köllun Jeremía

⁴ Orð Drottins kom til mín:

⁵ Áður en ég mótaði þig í móðurlífi valdi ég þig. Áður en þú fæddist helgaði ég þig og ákvað að þú yrðir spámaður fyrir þjóðirnar.

⁶ Ég svaraði: „Drottinn minn og Guð. Ég er ekki fær um að tala því að ég er enn svo ungur.“

⁷ Þá sagði Drottinn við mig: „Segðu ekki: Ég er enn svo ungur. Þú skalt fara hvert sem ég sendi þig og boða hvað eina sem ég fel þér.

⁸ Þú skalt ekki óttast þá því að ég er með þér til að bjarga þér,“ segir Drottinn.

⁹ Síðan rétti Drottinn út hönd sína, snerti munn minn og sagði við mig: „Hér með legg ég orð mín þér í munn.

¹⁰ Ég veiti þér vald yfir þjóðum og ríkjum til að uppræta og rífa niður, til að eyða og umturna, til að byggja upp og gróðursetja.“

Fyrri sýn: möndluviðargrein

¹¹ Orð Drottins kom til mín: „Hvað sérðu, Jeremía?“ Ég svaraði: „Ég sé möndluviðargrein.“

¹² Þá sagði Drottinn við mig: „Þú hefur séð rétt því að ég vaki yfir því að orði mínu verði framfylgt.“

Síðari sýn: rjúkandi pottur

¹³ Orð Drottins kom til mín öðru sinni: „Hvað sérðu?“ Ég svaraði: „Ég sé rjúkandi pott sem hallast úr norðri.“

¹⁴ Þá sagði Drottinn við mig: Úr norðri verður böli hellt yfir alla íbúa landsins.

¹⁵ Því sjá: Ég kalla á öll konungsríkin fyrir norðan, segir Drottinn. Þau koma og reisa hvert sitt hásæti utan við borgarhlið Jerúsalem, gegnt borgarmúrum hennar allt umhverfis, og ógna öllum borgum í Júda.

¹⁶ Þá mun ég kveða upp dóm yfir þeim vegna allrar illsku þeirra þegar þeir yfirgáfu mig og færðu öðrum guðum brennifórnir og tilbáðu verk eigin handa.

Hlutverk spámannsins

¹⁷ En sjálfur skalt þú gyrða lendar þínar, ganga fram og boða þeim allt sem ég býð þér. Láttu ekki hugfallast frammi fyrir þeim, ella svipti ég þig hugrekki fyrir augum þeirra.

¹⁸ Í dag geri ég þig að víggirtri borg, að járnsúlu, að virkisvegg úr eir gegn konungunum í Júda og höfðingjum þar, gegn prestunum í Júda og stórbændunum.

¹⁹ Þeir munu ráðast gegn þér en ekki sigra þig því að ég er með þér til að bjarga þér, segir Drottinn.