Hósea 1 - Biblían (2007)

Hórkonan og börn hennar

¹ Orð Drottins sem barst Hósea Beerísyni þegar Ússía, Jótam, Akas og Hiskía voru konungar í Júda og Jeróbóam Jóasson var konungur í Ísrael.

² Drottinn tók nú að tala til Hósea. Drottinn sagði við Hósea: „Farðu og gakktu að eiga hórkonu og eignastu hórbörn því að landið drýgir hór og hverfur frá Drottni.“

³ Þá fór hann og gekk að eiga Gómer Diblaímsdóttur, hún varð þunguð og ól honum son.

⁴ Drottinn sagði við hann: „Láttu hann heita Jesreel því að eftir skamma hríð dreg ég ætt Jehú til ábyrgðar fyrir blóðbaðið í Jesreel og bind enda á konungdæmi Ísraelsmanna.

⁵ Á þeim degi brýt ég boga Ísraels á Jesreelsléttu.“

⁶ Hún varð aftur þunguð og ól dóttur. Drottinn sagði við Hósea: „Gefðu henni nafnið Miskunnarvana því að ég mun hvorki miskunna Ísraelshúsi framar né fyrirgefa því.

⁷ En ég mun miskunna Júdahúsi vegna Drottins, Guðs þess, en ég mun ekki hjálpa því með boga, sverði eða bardaga, hestum eða riddurum, heldur vegna Drottins, Guðs þess.“

⁸ Þegar Gómer hafði hætt að gefa Miskunnarvana brjóst varð hún aftur þunguð og ól son.

⁹ Drottinn sagði: „Láttu hann heita Ekki-lýður-minn því að þér eruð ekki lýður minn og ég verð ekki með yður.“