Zechariah 6 - Yn Vible Casherick 1775 1819

CAB. VI

¹ As hyndaa mee, as hrog mee seose my hooillyn, as yeeagh mee, as cur-my-ner, haink kiare fainee magh eddyr daa slieau, as va ny sleityn sleityn prashey.

² As ayns y chied ainagh va cabbil ruy, as ayns y nah ainagh va cabbil doo.

³ As ayns y trass ainagh va cabbil bane, as ayns y chiarroo ainagh va cabbil glass as doyn.

⁴ Eisht dreggyr mee, as dooyrt mee rish yn ainle va taggloo rhym, Cre t’er ny hoiggal lioroo shoh, my hiarn.

⁵ As dreggyr yn ainle, as dooyrt eh rhym, T’ad shoh kiare geayghyn yn aer, ta goll magh veih fenish Chiarn y slane seihll.

⁶ As ta ny cabbil doo t’ayn, goll magh gys y cheer-twoaie, as ta ny banee goll magh geiyrt orroo; as ta ny cabbil glassey goll magh gys y cheer-jiass.

⁷ As hie ny cabbil doyn magh, as chiare ad dy gholl, as shooyl noon as noal trooid y theihll: as dooyrt eh, Reue-jee, as shooyl-jee noon as noal trooid y theihll. Myr shen hooyl ad noon as noal trooid y theihll.

⁸ Eisht deïe eh orrym, as loayr eh rhym, gra, Cur-my-ner, t’ad shoh ta goll gys y cheer-twoaie er chiunaghey my spyrryd noi yn cheer-twoaie.

⁹ As haink goo yn Chiarn hym’s, gra,

¹⁰ Gow jeusyn jeh’n chappeeys, eer Heldai, Tobijah, as Jedaiah, t’er jeet voish Babylon, as tar uss yn laa cheddin, as immee gys thie Yosiah mac Zephaniah;

¹¹ Eisht gow argid as airh, as jean atteeyn, as soie ad er kione Yoshua, mac Yosedech, yn ard-saggyrt;

¹² As loayr uss rishyn, gra, Myr shoh ta Chiarn ny flaunyssee loayrt, gra, Cur-my-ner yn dooinney ta enmyssit yn BANGLANE, as aasee eh seose ass yn ynnyd echey, as troggee eh chiamble y Chiarn:

¹³ Nee eshyn dy jarroo troggal chiamble y Chiarn, as gymmyrkey yn ghloyr echey, as nee eh soie as reill er e stoyl-reeoil, as bee eh ny haggyrt er y stoyl-reeoil echey, as bee coonceil y chee eddyr ad ny-neesht.

¹⁴ As bee ny atteeyn son imraa da Helem, as Tobijah, as da Jedaiah, as da Hen, mac Zephaniah, ayns chiamble y Chiarn.

¹⁵ As hig joarreeyn veih foddey, as troggee ad chiamble y Chiarn, as bee fys euish, dy vel Chiarn ny flaunyssee er my choyrt hiuish. As hig shoh gy-kione, my vees shiu imneagh dy chur biallys da coraa yn Chiarn y Jee eu.