Zechariah 14 - Yn Vible Casherick 1775 1819

CAB. XIV

¹ Cur-my-ner ta laa yn Chiarn cheet, as bee yn spooilley ayd’s er ny rheynn ayns dty vean.

² Son chaglee-ym ooilley ny ashoonee noi Jerusalem dy chaggey, as bee’n ard-valley er ny ghoaill, as bee ny thieyn er ny roostey, as bee ny mraane goit er-êgin, as hed y derrey lieh jeh’n ard-valley magh ayns cappeeys, as cha bee yn chooid elley jeh’n pobble er ny yiarey jeh veih’n ard-valley.

³ Eisht hed yn Chiarn magh, as nee eh caggey noi ny ashoonee shen, myr ren eh caggey ayns laa yn chah.

⁴ As shassee ny cassyn echey ’sy laa shen er slieau ny oliveyn, ta roish Jerusalem gys y shiar; as nee slieau ny oliveyn scoltey ’sy vean gys y shiar, as gys y sheear, as bee coan feer vooar; as nee’n derrey lieh jeh’n clieau scughey gys y twoaie, as y lieh elley gys y jiass.

⁵ As nee shiu chea gys coan ny sleityn: son nee coan ny sleityn roshtyn gys Azal: dy jarroo nee shiu chea myr ren shiu chea veih’n craa-hallooin, ayns laghyn Uzziah, ree Yudah: as hig y Chiarn my Yee, as ooilley ny nooghyn mârish.

⁶ As hig eh gy-kione ’sy laa shen, nagh bee’n soilshey sollys ny dorraghey.

⁷ Agh bee eh un laa vees er-fys da’n Chiarn, cha nee laa ny oie: agh hig eh gy-kione, dy bee eh sollys ’syn astyr.

⁸ As ayns y laa shen, hed ushtaghyn bio magh veih Jerusalem: yn derrey lieh jeu gys y cheayn har, as y lieh elley jeu gys y cheayn heear: ’sy tourey as ’sy yeurey vees shoh.

⁹ As bee’n Chiarn ny ree harrish y slane seihll: ’sy laa shen vees un Chiarn, as yn ennym echey unnane.

¹⁰ As bee yn slane cheer er ny hyndaa gys thalloo-rea veih Geba gys Rimmon, jiass jeh Jerusalem: as bee eh ayns ard-ghoo as lane dy chummaltee: veih giat Venjamin gys ynnyd y chied yiat gys y yiat corneilagh, as voish toor Hananeel gys doaghyn-feeyney yn ree.

¹¹ As nee sleih cummal ayn, as cha bee eh dy bragh arragh er ny choyrt naardey, agh bee cummaltee Yerusalem ayns slane sauchys.

¹² As shoh vees yn kerraghey, lesh nee yn Chiarn bwoalley ooilley’n pobble, t’er chaggey noi Jerusalem: nee’n, eill oc shymley ersooyl choud as t’ad shassoo er nyn gassyn, as nee ny sooillyn oc lheïe ersooyl ayns nyn ghing, as nee’n chengey oc shirgaghey ayns nyn meeal.

¹³ (As hig eh gy-kione ’sy laa shen, dy bee ard-anvea veih’n Chiarn ny-vud oc, as gowee ad greme dagh fer er laue e naboo, as bee yn laue echey er ny lhiantyn gys laue e naboo.

¹⁴ As nee Judah myrgeddin caggey son Jerusalem; as bee berchys ooilley ny ashoonee mygeayrt er ny haglym cooidjagh, airh as argid, as coamrey ayns palchey vooar).

¹⁵ As shen myr vees doghan y chabbyl, yn vule, yn chamel, as yn assyl, as dy chooilley vaagh vees ayns ny cabbaneyn shoh, myr yn doghan shoh.

¹⁶ As hig eh gy-kione, eer dagh unnane ta faagit jeh ooilley ny ashoonyn, haink noi Jerusalem, dy jed ad seose veih bleïn ry bleïn, dy chur ooashley da’n ree, Chiarn ny flaunyssee, as dy reayll feailley ny cabbaneyn.

¹⁷ As bee eh myr shen, quoi-erbee jeh ooilley kynneeyn ny hooirey nagh jed seose gys Jerusalem, dy ooashlaghey yn ree, Chiarn ny flaunyssee, eer orroosyn cha bee veg y fliaghey.

¹⁸ As mannagh jed kynneeyn Egypt seose, ny cheet, adsyn nagh vel [feme] fliaghey: orroosyn hig yn kerraghey cheddin, ver y Chiarn er ny ashoonee, nagh jig seose dy reayll feailley ny cabbaneyn.

¹⁹ Shoh vees kerraghey Egypt, as kerraghey ooilley ny ashoonee, nagh jig seose dy reayll feailley ny cabbaneyn.

²⁰ Ayns y laa shen vees scruit er streeanyn ny cabbil CASHERICKYS GYS Y CHIARN: as bee ny pooiyt ayns thie yn Chiarn myr ny siyn casherick roish yn altar.

²¹ Dy jarroo bee dy chooilley phot ayns Jerusalem, as ayns Judah casherickys gys Chiarn ny flaunyssee: as hig adsyn ooilley ta ouralley, as nee ad goaill ad, as broie ayndoo: as ayns y laa shen cha bee Canaanite arragh ayns thie Chiarn ny flaunyssee.