Zechariah 12 - Yn Vible Casherick 1775 1819

CAB. XII

¹ Phadeyrys trome goo yn Chiarn son Israel, ta’n Chiarn dy ghra, ta sheeyney magh ny niaughyn, as layal undin ny hooirey, as kiaddey spyrryd dooinney cheu-sthie jeh.

² Cur-my-ner, neem’s Jerusalem ny chappan pyshoonagh da ooilley yn pobble cruin mygeayrt, tra vees ad ’sy chionney-stiagh, chammah noi Judah as noi Jerusalem.

³ As ayns y laa shen neem’s Jerusalem clagh hrome son dy chooilley phobble: bee dagh unnane ta laadey eh-hene lh’ee er ny vroo gys peeshyn, ga dy bee ooilley pobble ny hooirey er nyn jaglym cooidjagh noi eck.

⁴ Ayns y laa shen, ta’n Chiarn dy ghra, bwoaill-ym dy chooilley chabbyl lesh atchim, as yn markiaght lesh keoïd, as foshil-ym my hooillyn er thie Yudah, as bwoaill-ym ooilley cabbil ny ashoonee lesh dellid.

⁵ As nee kiannoortyn Yudah gra ayns nyn gree, Bee cummaltee Yerusalem my niart ayns Chiarn ny flaunyssee yn Jee oc.

⁶ Ayns y laa shen neem’s kiannoortyn Yudah goll-rish chiollagh dy aile mastey’n fuygh, as myr brasnag aile ayns bunney arroo: as nee ad stroie ny ashoonee ooilley mygeayrt, er y laue yesh, as er y laue chiare: as bee cummaltee ayns Jerusalem reesht, ayns y voayl eck hene, eer ayns Jerusalem.

⁷ As nee yn Chiarn myrgeddin sauail cabbaneyn Yudah hoshiaght, nagh jean gloyr thie Ghavid, ny gloyr cummaltee Yerusalem, mooadaghey ad-hene noi Judah.

⁸ Nee’n Chiarn ayns y laa shen fendeil cummaltee Yerusalem: as bee eshyn ta faase ny-vud oc ’sy laa shen goll-rish David; as bee thie Ghavid goll-rish Jee, as myr ainle y Chiarn goll rhymboo.

⁹ As hig eh gy-kione ayns y laa shen, dy beem’s er-chee dy stroie ooilley ny ashoonee hig noi Jerusalem.

¹⁰ As neem’s deayrtey er thie Ghavid, as er cummaltee Yerusalem, spyrryd dy ghrayse as dy phadjeryn, as nee ad jeeaghyn orrym’s t’ad er hoylley, as nee ad dobberan er e hon, myr ta dooinney dobberan son e vac ynrycan, as bee ad ayns sherriuid er e hon, myr dooinney ta ayns sherriuid son e vac shinney.

¹¹ As bee ayns y laa shen dobberan mooar ayns Jerusalem, myr dobberan Hadadrimmon ayns coan Vegiddon.

¹² As nee’n cheer dobberan, dagh lught-thie er-lheh, kynney lught-thie Ghavid er-lheh, as ny mraane oc er-lheh: lught-thie Nathan er-lheh, as ny mraane oc er-lheh:

¹³ Lught-thie Levi er-lheh, as ny mraane oc er-lheh: lught-thie Shimei er-lheh, as ny mraane oc er-lheh:

¹⁴ Dy chooilley lught-thie t’er-mayrn, dagh lught-thie orroo hene, as ny mraane oc orroo hene.