Zechariah 11 - Yn Vible Casherick 1775 1819

CAB. XI

¹ Foshil dty ghorryssyn, O Lebanon, dy vod yn aile ny cedaryn ayd’s y stroie.

² Jean gullal, O villey-juys, son ta’n cedar er duittym; son dy vel ny niartallee er ny spooilley: gull-jee, O shiuish viljyn-darragh Vashan, son ta’n cheyll-feeyney er ny lhieggal.

³ Ta coraa treihys ny bochillyn er ny chlashtyn: son ta’n ghloyr oc er ny spooilley: coraa dy vuirroogh ny lionyn aegey; son ta moyrn Yordan er ny spooilley.

⁴ Myr shoh ta’n Chiarn my Yee dy ghra, Fassee-jee yn chioltane son y skynn.

⁵ T’adsyn my-lhieu ad dy varroo ad, as cha vel ad coontey ad-hene oolee: as t’adsyn ta creck ad, gra, Bannit dy row yn Chiarn, son ta mee berchagh: son cha vel erreeish ec ny bochillyn oc hene orroo.

⁶ Son cha bee’m chymmoil ny-sodjey da cummaltee yn cheer, ta’n Chiarn dy ghra: son cur-my-ner, livrey-yms ny deiney dagh unnane gys laue e naboo, as gys laue e ree, as bwoaillee adsyn y cheer, as cha livrey-ym ad ass nyn laue.

⁷ As fassee-ym shioltane y toyrt-mow, eer shiuish, O reyggyryn treih yn chioltane; as ghow mee daa lorg; yn derrey yeh denmys mee Aalid, as y jeh elley denmys mee Kianglaghyn, as ren mee fassaghey yn chioltane.

⁸ Yiare mee jeh three bochillyn myrgeddin ’syn un vee, as v’adsyn dwoaie my annym’s, as va mish myrgeddin dwoaie yn annym ocsyn.

⁹ Eisht dooyrt mee, Cha goym kiarail sodjey jeu: shen ta geddyn baase, lhig da goll gy-baase: as shen ta dy ve giarit jeh, lhig da ve giarit jeh; as lhig da’n chooid elley gee, dagh unnane feill y cheilley.

¹⁰ As ghow mee my lorg, eer Aalid, as yiare mee ayns jees eh, dy rassey my chonaant va mee er n’yannoo rish ooilley yn pobble.

¹¹ As ve brisht er y laa shen: myr shen hoig reyggyryn treih yn chioltane, ren farkiaght orrym, dy nee goo yn Chiarn ve.

¹² As dooyrt mee roo, My she yn aigney eu eh, cur-jee my leagh dou: as mannagh nee, ny cur-jee: as veihee ad son my phrice jeih peeshyn as feed dy argid.

¹³ As dooyrt y Chiarn rhym, Ceau eh gys y phasheyder: price lowal dy jarroo hug ad orrym! As ghow mee ny jeih peeshyn as feed dy argid, as cheau mee ad gys y phasheyder ayns thie yn Chiarn.

¹⁴ Eisht yiare mee my lorg elley, eer Kianglaghyn, dy vrishey yn chaardys ta eddyr Judah as Israel.

¹⁵ As dooyrt y Chiarn rhym, Gow hood greïnyn yn vochill ommijagh.

¹⁶ Son cur-my-ner, trog-yms seose bochilley ayns y cheer, nagh jean jeeaghyn lurg ny [kirree] cailjey, chamoo shirrey son yn eayn, ny lheihys adsyn ta doghanit, ny gymmyrkey lesh shen ta er-troggloo: agh ee-ys eh feill ny roauyree, as raipee eh ny yngnyn oc ayns peeshyn.

¹⁷ Smerg da’n bochilley liastey, ta treigeil e hioltane! bee yn cliwe er e roih, as er e hooill yesh: nee yn roih echey fargagh, as bee’n sooill yesh echey doo dorraghey.