Zechariah 10 - Yn Vible Casherick 1775 1819

CAB. X

¹ Guee-jee gys y Chiarn son fliaghey ayns traa fliaghey s’jerree ny bleeaney, myr shen nee yn Chiarn bodjallyn sollys, as ver eh daue frassyn fliaghee, da dagh unnane faiyr ayns e vagher.

² Son ta ny jallooyn er loayrt fardalys, as ny fir-obbee er vakin breg, as t’ad er n’insh dreamallyn foalsey: t’ad gerjaghey ayns fardail: shen-y-fa hie ad rhymboo myr shioltane, v’ad seaghnit, er-yn-oyr nagh row bochilley erbee harrystoo.

³ Va my chorree er ny vrasnaghey noi ny bochillyn, as ren mee kerraghey ny goair, son ta Chiarn my flaunyssee er yeeaghyn er e hioltane, thie Yudah, as t’eh er n’yannoo ad myr yn niagh trean ’sy chaggey.

⁴ Magh veihsyn haink yn chorneil, veihsyn haink yn treiney, veihsyn yn bow-chaggee, veihsyn dagh tranlaasagh dy cheilley.

⁵ As bee ad myr deiney niartal, ta stampey sheese nyn noidyn ’sy chaggey myr laagh ny straïdyn, as nee ad caggey, son dy vel y Chiarn ass nyn lieh, as bee ny markee er cabbil nyn haart.

⁶ As neem’s thie Yudah y niartaghey, as saue-yms thie Yoseph, as ver-ym lhiam reesht ad gys nyn ynnyd hene; son ta myghin aym orroo: as bee ad myr nagh beign er n’yiooldey voym ad: son ta mish yn Chiarn y Jee oc, as eaisht-ym roo.

⁷ As bee cloan Ephraim myr dooinney niartal, as gowee yn cree oc boggey myr lesh feeyn: dy jarroo hee yn chloan oc eh, as bee ad gennal, as gowee yn cree oc boggey ayns y Chiarn.

⁸ Ver-ym eam daue, as chaglee-ym ad dy cheilley, son ta mee er chosney reesht ad: as nee ad bishaghey myr t’ad er vishaghey.

⁹ Son spreih-ym ad mastey yn pobble: as cooinee ad orrym ayns cheeraghyn joarree, as nee ad beaghey marish nyn gloan, as chyndaa reesht.

¹⁰ Ver-ym lhiam reesht ad myrgeddin ass cheer Egypt, as chymsee-ym ad ass Assyria, as ver-ym lhiam ad gys cheer Ghilead as Lebanon, as cha bee eh dy liooar daue.

¹¹ As hed eh trooid yn aarkey lesh seaghyn, as bwoaillee eh tonnyn ny marrey, as nee ooilley diunidyn yn awin chyrmagh: as bee moyrn Assyria er ny injillaghey, as bee lorg-reill Egypt er ny scughey.

¹² As neem’s ad y niartaghey ayns y Chiarn, as nee ad shooyl noon as noal ayns e ennym, ta’n Chiarn dy ghra.