Raaghyn Creeney 1 - Yn Vible Casherick 1775 1819

CAB. I

¹ Raaghyn creeney Solomon mac Ghavid ree Israel.

² Dy hoiggal creenaght as ynsagh, dy chur-my-ner ny goan dy hushtey.

³ Dy ghoaill yn ynsagh, dy chreenaght, dy chairys, dy vriwnys, as dy chiartys.

⁴ Dy choyrt keeayll da’n ôney, da’n dooinney aeg, toiggal as feeudys.

⁵ Nee dooinney creeney geaishtagh, as cheet er e hoshiaght ayns ynsagh, as nee dooinney tastagh roshtyn gys coyrleyn creeney.

⁶ Dy hoiggal raa-dorraghey, as y bun echey; goan y vooinjer chreeney, as nyn vocklyn dowin.

⁷ Ta aggle y Chiarn toshiaght tushtey: agh ta ommydanyn soiaghey beg jeh creenaght, as ynsagh.

⁸ My vac, eaisht rish ynsagh dty ayrey, as ny treig uss leigh dty vayrey.

⁹ Son bee ad aalid dy ghrayse da dty chione, as myr boandey airhey mysh dty wannal.

¹⁰ My vac, my ta drogh-yantee dy dty violaghey, ny cur dty aigney lhieu.

¹¹ My jir ad, Tar mârin, lhig dooin lhie cooyl-chlea son fuill, lhig dooin farkiaght gyn-yss, as dy follit son y vooinjer neu-chyndagh, gyn oyr.

¹² Lhig dooin ad y lhuggey seose bio myr yn oaie, as slane myr adsyn ta goll sheese gys ny merriu.

¹³ Yiow mayd dy chooilley cheint dy chooid chostal, lhieenee mayd nyn dhieyn lesh spooilley.

¹⁴ Ceau stiagh dty chronney ny mast’ ain, lhig yn un sporran ’ve ain ooilley.

¹⁵ My vac, ny shooyl uss er y raad mâroo: freill dty chass veih’n chassan oc.

¹⁶ Son ta ny cassyn oc roie gys olk, as jannoo siyr gys deayrtey folley.

¹⁷ Shickyr ayns fardail ta’n lieen er ny skeayley ayns shilley eean erbee.

¹⁸ As t’ad soiaghey ribbaghyn son yn uill oc hene, t’ad lhie cooyl-chlea dy follit noi nyn mioys hene.

¹⁹ Lheid shoh ta raaidyn dagh unnane ta sondagh er cosney, ta goaill ersooyl bioys y vooinjer s’liesh eh.

²⁰ Ta creenaght geamagh cheu-mooie, t’ee troggal seose e coraa ayns ny straidyn.

²¹ T’ee gyllagh ayns yn ynnyd smoo taaghit; ayns fosley ny giattyn: ayns yn ard-valley t’ee fockley magh ny goan eck, gra,

²² Caïd, shiuish vee-hushtee ver shiu rish mee-hushtey? as craidoilee goaill taitnys ayns nyn graid, as ny ommydanyn cur feoh da tushtey?

²³ Chyndaa-jee ec my oghsan: cur-my-ner, deayrt-yms magh my spyrryd erriu, nee’m soilshaghey my ghoan diu.

²⁴ Er-y-fa dy ren mish geamagh, as ren shiuish gobbal; ta mee er heeyney magh my laue, as cha dug dooinney erbee geill da.

²⁵ Agh ta shiu er hoiaghey beg jeh ooilley my choyrle, as cha goghe shiu rish veg jeh my oghsan.

²⁶ Neem’s myrgeddin garaghtee ec ny seaghyn eu, nee’m craid tra hig yn aggle erriu.

²⁷ Tra ta’n aggle cheet erriu myr traartys, as nyn doyrt-mow myr geay-chassee: tra hig chennid as angaish erriu.

²⁸ Eisht nee ad geamagh orrym’s, agh mish cha der ansoor; nee ad m’y hirrey dy moghey, agh cha vow ad mee.

²⁹ Son dy dug ad dwoaie da tushtey, as cha ren ad reih aggle y Chiarn.

³⁰ Cha shirragh ad veg jeh my choyrle: ren ad beg y hoiaghey jeh my oghsan.

³¹ Shen-y-fa nee ad gee jeh mess y raad oc hene, as bee nyn yeeilley oc jeh nyn groutyn hene

³² Son nee shaghrynys y vooinjer vee-cheeayllagh ad-hene y chur naardey, as nee’n maynrys seihltagh ommydanyn ad-hene y stroie.

³³ Agh quoi-erbee eaishtys rhym’s, nee eh cummal dy sauchey, as bee eh ec fea veih aggle yn olk.