Psalmyn 69 - Yn Vible Casherick 1775 1819

PSAL. LXIX

¹ Saue mee, O Yee: son ta ny ushtaghyn er jeet stiagh, dy jarroo gys m’annym.

² Ta mee cummit shickyr ayns y laagh dowin, raad nagh vel grunt erbee: ta mee er jeet ayns ushtaghyn dowiney, myr shen dy vel ny thooillaghyn roie harrym.

³ Ta mee skee lesh geamagh, ta my scoarnagh chirrym: ta my hoilshey dy m’ailleil son farkiaght choud er my Yee.

⁴ Adsyn ta dwoaie oc orrym gyn oyr, t’ad ny shlee na renaigyn my ching: adsyn ta my noidyn, as bailliu mish ta neu-chyndagh y stroie, t’ad niartal.

⁵ Deeck mee daue my reddyn nagh ren mee rieau y ghoaill: Yee, ta fys ayd er my ônid, as cha vel m’oiljyn keillit voïd’s.

⁶ Ny lhig dauesyn ta treishteil aynyd’s, O Hiarn Yee dy heshaghtyn-caggee, v’er nyn naaraghey son y chooish aym’s: ny lhig dauesyn ta dy dty hirrey, v’er nyn goyrt mow my hrooid’s, O Hiarn Yee dy Israel.

⁷ As cre’n-oyr? er y choontey ayd’s ta mee er hurranse oghsan: ta nearey er choodaghey m’eddin.

⁸ Ta mee myr dooinney joarree da my vraaraghyn: dy jarroo myr fer quaagh da cloan my vayrey.

⁹ Son ta’n ghraih jeean t’aym da dty hie dy jarroo er ghuinney mee gys y chree: as ta ny oghsanyn ocsyn hug scammylt dhyt’s, er duittym orrym’s.

¹⁰ Ren mee dobberan as smaghtaghey mee hene lesh trostey: as va shen er ny hyndaa gys my scammylt.

¹¹ Hug mee orrym aanrit-sack myrgeddin: as ren ad craidey moo’m.

¹² T’adsyn ta soie ’sy yiat loayrt m’oï: as ta’n vooinjer veshtal jannoo ronneeaght orrym.

¹³ Agh, Hiarn, ta mee jannoo my phadjer hood’s: ayns traa nee oo soiaghey jeh.

¹⁴ Clasht rhym, O Yee, ayns earroo dty vyghin: dy jarroo ayns firrinys dty haualtys.

¹⁵ Gow mee ass y laagh, nagh jem fo: O lhig dou ve er my livrey vouesyn ta feoh oc orrym, as ass ny ushtaghyn dowin.

¹⁶ Ny lhig da ny thooillaghyn ushtey mee y vaih, chamoo lhig da’n diunid mee y lhuggey seose: as ny lhig da’n ooig e beeal y yeigh orrym.

¹⁷ Clasht rhym, O Hiarn, son ta dty chenjallys-ghraihagh gerjoilagh: chyndaa uss hym’s cordail rish earroo dty vyghinyn,

¹⁸ As ny follee dt’eddin veih dty harvaant, son ta mee ayns seaghyn: O jean siyr, as eaisht rhym.

¹⁹ Tayrn er-gerrey gys m’annym, as saue eh: O livrey mee, kyndagh rish my noidyn.

²⁰ T’ou uss er hoiggal m’oghsan, my nearey, as my vee-onnor: ta my noidyn ooilley ayns dty hilley.

²¹ Ta dt’oghsan er vrishey my chree, ta mee lane dy hrimshey: yeeagh mee son fer ennagh dy ghoaill chymmey orrym, agh cha row dooinney erbee; chamoo hooar mee unnane erbee dy my gherjaghey.

²² Hug ad dou gall dy ee: as tra va mee paagh, hug ad dou vinegar dy iu.

²³ Lhig da’n voayrd oc ve er ny yannoo ny ribbey dy ghoaill ad-hene lesh: as lhig da ny reddyn lhisagh y ve son y foays oc, ve dauesyn oyr tuittym.

²⁴ Lhig da ny sooillyn oc ve er nyn gholley, nagh jean ad fakin: as jean uss dy kinjagh yn dreeym oc y chroymmey sheese.

²⁵ Deayrt magh dt’eulys orroo: as lhig dty yymmoose hrome ad y ghreimmey.

²⁶ Lhig da’n ynnyd-vaghee oc ve follym-faase: as gyn dooinney erbee dy chummal ayns ny cabbaneyn oc;

²⁷ Son t’ad jannoo tranlaase ersyn t’ou er woalley: as ta’n taggloo oc kys oddys ad adsyn y heaghney t’ou uss er lhottey.

²⁸ Lhig daue tuittym veih un pheccah gys peccah elley: as gyn cheet stiagh gys dty ynrickys.

²⁹ Bee ad er ny chrossey ass lioar ny bioee: as cha bee ad scruit mastey’n vooinjer chairagh.

³⁰ Er my hon’s, tra ta mee boght as ayns trimshey: nee dty chooney, O Yee, mish y hroggal seose.

³¹ Nee’m ennym Yee y voylley lesh arrane: as ver-ym ard-voylley da lesh toyrt-booise.

³² Nee shoh myrgeddin yn Chiarn y wooiys: ny share na dow lesh eairkyn as yngnyn.

³³ Ver y vooinjer imlee tastey da shoh, as bee ad gennal: shir-jee lurg Jee, as bee’n annym eu bio.

³⁴ Son ta’n Chiarn clashtyn ny boghtyn: as cha vel eh soiaghey beg jeh e phryssoonee.

³⁵ Lhig da niau as thalloo eh y voylley: yn faarkey as ooilley ny ta gleashaght ayn.

³⁶ Son nee Jee Sion y hauail, as troggee eh ard-valjyn Yudah: dy vod deiney baghey ayns shen, as eh y ghoaill ayns nyn gummal.

³⁷ Nee sluight e harvaantyn myrgeddin y ghoaill eh ayns eiraght: as adsyn ta graihagh er e ennym nee ad baghey ayn.