Psalmyn 46 - Yn Vible Casherick 1775 1819

PSAL. XLVI

¹ She Jee nyn dreishteil as niart: cooney feer faggys ayns seaghyn.

² Shen-y-fa cha gow mayd aggle, ga dy beagh y seihll er ny chraa: as ga dy beagh ny croink er nyn scughey gys mean yn aarkey.

³ Ga dy jinnagh ny ushtaghyn echey freaney as gatt: as ga dy jinnagh ny sleityn craa lesh dorrin y chooid cheddin.

⁴ Nee ushtaghyn y thooilley echey ard-valley Yee y yannoo gennal: ynnyd casherick cabbane-agglish yn Jee smoo ard.

⁵ Ta Jee ayns y vean eck, shen-y-fa cha bee ee er ny scughey: nee Jee cooney lh’ee, as shen dy feer voghey.

⁶ Ta ny ashoonyn goaill lane bea orroo, as ta ny reeriaghtyn er nyn scughey: agh ta Jee er hoilshaghey e choraa, as nee’n seihll lheïe ersooyl.

⁷ Ta’n Chiarn dy heshaght-chaggee flaunys mârin: she Jee Yacob yn chemmyrk ain.

⁸ O tar-jee ayns shoh, as jeeagh-jee er obbraghyn y Chiarn: cre’n traartys t’eh er choyrt lesh er y theihll.

⁹ T’eh cur er caggaghyn dy scuirr ayns ooilley yn seihll: t’eh brishey yn bow, as giarey yn shleiy dy peeshyn, as lostey ny fainaghyn ’syn aile.

¹⁰ Bee-jee feagh eisht, as toig-jee dy vel mish Jee: beem’s er my hoiaghey seose mastey ny ashoonyn, as bee’m er my hoiaghey seose er y thalloo.

¹¹ Ta’n Jee dy heshaght-chaggee flaunys mârin: she Jee Yacob nyn gemmyrk.