Psalmyn 125 - Yn Vible Casherick 1775 1819PSAL. CXXV 1 Bee adsyn ta coyrt nyn dreishteil ayns y Chiarn, dy jarroo myr cronk Sion: nagh vod v’er ny scughey, agh ta shassoo shickyr er son dy bragh. 2 Myr ta ny croink soit dy cruin mygeayrt Jerusalem: dy jarroo myr shen ta’n Chiarn mygeayrt e phobble, veih’n traa shoh magh er son dy bragh. 3 Son cha jig lorg ny mee-chrauee er cronney yn vooinjer chairal: son nagh der y sleih cairal nyn laue gys olkys. 4 Jean mie, O Hiarn: dauesyn ta mie as firrinagh ayns cree. 5 Er son nyn lheid as ta chyndaa reesht gys yn olkys oc hene: leeidee yn Chiarn ad magh marish ny drogh-yantee; agh bee shee er Israel. |
First published in 1775, revised and published by the British and Foreign Bible Society in 1819.
British & Foreign Bible Society