Obadiah 1 - Yn Vible Casherick 1775 1819

CAB. I

¹ Ashlish Obadiah. Shoh myr ta’n Chiarn Jee dy ghra mychione Edom; Ta shin er chlashtyn goo veih’n Chiarn, as ta chaghter er ny choyrt mastey ny ashoonee, Trog-jee erriu, as lhig dooin goll seose noi eck ayns caggey.

² Cur-my-ner, ta mee er n’yannoo oo fardalagh mastey ny ashoonee: ta feer veg er ny hoiaghey jeed.

³ Ta moyrn dty chree er dty volley: uss ta goaill ayns scoltaghyn y chreg, ta cummal ’syn yrjey mooie, ta gra ayns e chree, Quoi ver lesh sheese mee gys y thalloo?

⁴ Ga dy droggagh oo seose oo hene myr yn urley, as soiaghey seose dty edd mastey ny rollageyn, veih shen ver-ym lhiam sheese oo, ta’n Chiarn dy ghra,

⁵ Kys t’ou er dty yiarey jeh! dy darragh maarlee ort, ny roosteyryn ny hoie, nagh jinnagh ad geid derrey veagh nyn saie oc? dy darragh ny teiyderyn feeyney hood, nagh vaagagh ad kuse jeh ny messyn?

⁶ Kys ta cooishyn Esau er nyn veyshtey magh! kys ta ny folliaghtyn echey cheet gys soilshey!

⁷ Ta ooilley dty gheiney-coonee er dty hayrn gys oirr dty chagliagh: ta adsyn v’ayns shee rhyt er dty volley, as er chosney ort: ta dty ghoaldee er hoiaghey ribbey lhottee er dty hon: cha vel veg y tushtey ayn.

⁸ Nagh jean-yms er y laa shen, ta’n Chiarn dy ghra, eer stroie ny deiney creeney ass Edom, as tushtey ass cronk Esau?

⁹ As bee dty gheiney niartal, O Teman, fo atchim, son ooilley cummaltee cronk Esau, t’er ny ve giarit jeh lesh cragh caggee.

¹⁰ Son dty hranlaase noi dty vraar Jacob, bee oo coodit lesh nearey, as er dty yiarey jeh son dy bragh.

¹¹ ’Sy laa hass oo er y cheu elley, ’sy laa ren joarreeyn cur lhieu ersooyl nyn gappee e heshaght-chaggee, as hie deiney quaagh stiagh er e yiattyn, as hilg ad lottyn er Jerusalem, v’ou uss neesht eer myr fer jeusyn.

¹² Agh cha lhisagh oo v’er yeeaghyn er laa dty vraar, ’sy laa haink eh dy ve ny yoarree; chamoo lhisagh oo v’er voggyssagh harrish cloan Yudah ayns laa nyn stroialtys; chamoo v’er loayrt dy mooaralagh ayns laa e heaghyn.

¹³ Cha lhisagh oo v’er n’gholl stiagh er giat my phobble, ayns laa nyn arkys; dy jarroo cha lhisagh oo v’er yeeaghyn er nyn seaghyn ayns laa yn arkys oc; chamoo v’er choyrt laue er nyn gooid, ayns laa nyn arkys.

¹⁴ Chamoo lhisagh oo v’er hassoo ’syn aa-gherrit, dy yiarey jeh adsyn by-leshyn ren scapail; chamoo lhisagh oo v’er livrey seose adsyn by-leshyn va er-mayrn ’sy laa seaghnagh.

¹⁵ Son ta laa yn Chiarn er-gerrey da ooilley ny ashoonee: myr t’ou uss er n’yannoo, bee eh er ny yannoo rhyt, nee dty leagh chyndaa er dty chione hene.

¹⁶ Son myr ta shiu er n’iu er my lieau casherick, myr shen nee ooilley ny ashoonee giu dy kinjagh, dy jarroo, nee ad giu, as sluggey sheese, as cha bee arragh jeu.

¹⁷ Agh ayns cronk Zion vees livrey-ys, as ayns shen vees casherickys, as nee thie Yacob cosney reesht ny cummallyn oc hene.

¹⁸ As bee thie Yacob ny aile, as thie Yoseph ny lossey, as thie Esau son stubble, as ver ad aile ayndoo, as stroie ad; as cha bee veg faagit jeh thie Esau; son ta’n Chiarn er loayrt eh.

¹⁹ As nee mooinjer y jiass goaill ayns nyn gummal cronk Esau; as gowee mooinjer y cheer-rea ny Philistinee: as gowee ad daue hene magheryn Ephraim, as magheryn Samaria, as gowee Benjamin Gilead.

²⁰ As nee sluight cappeeys cloan Israel goaill daue hene ny Canaaniteyn, eer gys Zarephath; as nee cappeeys Yerusalem, t’ayns Sepharad, goaill daue hene ard-valjyn y jiass.

²¹ As hig saualtee seose er cronk Zion, dy vriwnys cronk Esau, as bee yn reeriaght lesh y Chiarn.