Lioar Yob 9 - Yn Vible Casherick 1775 1819

CAB. IX

¹ Eisht dreggyr Job as dooyrt eh,

² Ta fys aym son firrinys dy nee shen myr te: agh kys oddys dooinney ve er ny heyrey fenish Yee?

³ My streeuys eh rish, cha vod eh freggyrt son peccah ayns thousane.

⁴ T’eshyn creeney ayns cree, as niartal ayns troshid: quoi t’er chreoghey eh-hene n’oï, as er vishaghey?

⁵ Ta scughey ny sleityn, as te gyn-yss daue; ta tilgey ad bun-ry-skyn ayns e yymmoose;

⁶ Ta craa yn thalloo ass e ynnyd, as ta ny undinyn eck er-creau;

⁷ Ta cur y ghrian fo harey, as cha vel eh girree; as ta sealal seose ny rollageyn;

⁸ Eh ny-lomarcan ta skeayley magh ny niaughyn, as shooyl er tonnyn ny marrey;

⁹ Eh t’er chroo Arcturus, Orion, as Pleiades, as shamyryn y jiass;

¹⁰ Eh ta jannoo reddyn mooarey erskyn nyn dushtey; eer yindyssyn erskyn-earroo.

¹¹ Cur-my-ner, t’eh goll liorym, as cha vel mee dy akin eh; t’eh myrgeddin goll shagh-ym, as cha voddym goaill baght jeh.

¹² Cur-my-ner, t’eh goaill ersooyl, quoi oddys eh y lhiettal? quoi jir rish, Cre t’ou dy yannoo?

¹³ Mannagh jean Jee e chorree y veeinaghey, nee ny fir-choonee mooaralagh croymmey fo.

¹⁴ Foddey sloo oddym’s eshyn y reggyrt, as reih my ghoan dy phleadeil rishyn.

¹⁵ Dasyn, ga dy beign cairagh, cha voddin cur ansoor; agh yinnin stiagh my accan gys my Vriw.

¹⁶ Dy beign er n’eamagh, as eshyn er my reggyrt; s’coan veign er chredjal dy row eh er chlashtyn my choraa.

¹⁷ Fakin dy vel eh er my vrishey lesh dorrin, as er vishaghey my lhottyn gyn oyr.

¹⁸ Cha lhig eh dou goaill m’ennal, agh t’eh dy my lhieeney lesh sherriuid.

¹⁹ My loayr-ym jeh niart, cur-my-ner, t’eshyn ny s’niartal: ny mychione briwnys, quoi oddys y traa y hoiaghey dy phleadeil my chooish?

²⁰ My ta mee seyrey mee-hene, nee my veeal hene m’y gheyrey: my jir-ym, Ta mee ynrick, nee shen myrgeddin prowal my neu-ynrickys.

²¹ Ga dy beign ynrick, ny-yeih cha jinnin soiaghey jeh my vioys: cha shirrin dy ve ny-sodjey bio.

²² Shoh un red, as ta mee er ghra eh, T’eh stroie yn vooinjer chairagh as ny mee-chrauee cooidjagh.

²³ My ta’n chragh stroie doaltattym, cha vel eh agh soiaghey beg jeh surranse yn vooinjer ôney.

²⁴ Ta’n seihll er ny choyrt ayns laue ny mee-chrauee: t’eh dolley eddinyn ny briwnyn eck; quoi agh eh-hene ta jannoo shoh?

²⁵ Nish ta my laghyn ny s’tappee na post; t’ad chea ersooyl, cha vel ad fakin gerjagh erbee.

²⁶ T’ad er n’gholl shaghey dy bieau myr ny lhongyn; myr yn urley ta ayns siyr son y spooilley.

²⁷ My jir-ym, Neem’s my accan y yarrood, ver-ym my hrimshey dy lhiattee, as mee-hene y gherjaghey;

²⁸ Ta aggle orrym roish ooilley my hrimshey, ta fys aym nagh jean uss goaill rhym dy ve gyn-loght.

²⁹ My ta mee cha olk shen, cre’n-fa eisht ta mee laboragh ayns fardail?

³⁰ My ta mee goonlagh mee-hene lesh ushtey sniaghtee, as niee my laueyn cha glen as oddym;

³¹ Ny-yeih nee oo my hilgey ’sy laagh, as ver m’eaddagh hene dwoaie dou.

³² Son cha nee dooinney eshyn, myr ta mee-hene, mish dy chur ansoor da, as dy darragh shin dy cheilley ayns briwnys.

³³ Chamoo ta fer erbee dy vriwnys eddyr shin, dy chiangley shin gys coardail.

³⁴ Lhig da e smaght y scughey voym, as ny lhig da’n atchim echey mish y agglaghey;

³⁵ Eisht loayrin, as cha goïn aggle roish: agh cha nee shoh myr ta’n chooish aym’s.