Lioar Yob 8 - Yn Vible Casherick 1775 1819

CAB. VIII

¹ Eisht dreggyr Bildad yn Shuhite as dooyrt eh,

² Caïd nee oo loayrt er yn aght shoh? as caïd vees goan dty veeal myr geay-chassee?

³ Vel Jee cur briwnys neu-chorrym? as vel yn Ooilley-niartal cassey cairys?

⁴ My ta dty chloan er n’yannoo peccah n’oï-syn, as my t’eh er yiarey ad jeh son nyn ghrogh-yannoo;

⁵ My yinnagh oo shirrey gys Jee dy leah, as dty aghin y yannoo gys yn Ooilley-niartal;

⁶ Dy beagh oo er ve glen as ynrick; son shickyrys nish veagh eh er ve dooishtagh harryd, as er n’yannoo ynnyd-vaghee dt’ynrickys maynrey.

⁷ Ga dy row dty hoshiaght fardalagh, ny-yeih veagh dty yerrey dy mooar er ny vannaghey.

⁸ Son fênee, ta mee guee ort, jeh’n chenndeeaght, as bee imneagh dy vriaght veih ny shenn-ayryn ocsyn:

⁹ (Son cha vel shinyn agh jeh’n laa jea, as cha vel nyn dushtey agh giare, er-yn-oyr nagh vel nyn laghyn er y thalloo agh myr y scadoo:)

¹⁰ Nagh jean adsyn dt’ynsaghey, as ginsh dhyt, as fockley magh raaghyn creeney nyn gree?

¹¹ Vod y chuin gaase fegooish laagh? vod y chlioagagh gaase gyn ushtey?

¹² Choud as te foast glass, as gyn giarey sheese, te fioghey myr losserey erbee elley.

¹³ Shen myr ta ny raaidyn ocsyn ooilley ta jarrood Jee; as nee treishteil yn chrauee-oalsey cherraghtyn:

¹⁴ E hreishteil vees er ny yiarey jeh, as e yerkal myr feegan y doo-oallee.

¹⁵ Ver eh ’varrant er e hie, agh cha jean eh shassoo; nee eh niartaghey eh, agh cha jean eh farraghtyn.

¹⁶ T’eh glass ayns chiass ny greïney, as ta e vanglane blaaghey ayns e gharey.

¹⁷ Ta ny fraueyn echey skeayley mysh y charnane, as gaase mastey creggyn.

¹⁸ My t’eh dy astyrt eh veih’n ynnyd echey, eisht cha gow e ynnyd rish, gra, Cha nhione dou oo.

¹⁹ Cur-my-ner, shoh gerjagh giare e vea, as veih’n ooir nee joarreeyn troggal ny ynnyd.

²⁰ Cur-my-ner, cha jean Jee tilgey jeh yn dooinney ynrick, chamoo nee eh cooney lesh ny drogh-yantee;

²¹ Derrey t’eh er lhieeney dty veeal lesh garaghtee, as dty veillyn lesh gennallys.

²² Bee dty noidyn er nyn goodaghey lesh nearey; as cha jean ynnyd-vaghee ny mee-chrauee shassoo.