Lioar Yob 7 - Yn Vible Casherick 1775 1819

CAB. VII

¹ Nagh vel traa kiarit da dooinney er y thalloo? nagh vel ny laghyn echey myrgeddin myr laghyn sharvaant failt?

² Myr ta’n charvaant dy jeean geearree yn scadoo, as myr ta’n labree jeeaghyn son leagh e obbyr;

³ Myr shen ta mish êginit dy cheau meeaghyn dy ardalys, as ta oieghyn tooilleilagh er ny oardaghey dou.

⁴ Tra ta mee lhie sheese, ta mee gra, Cuin nee’m girree, as yn oie ve baarit? as ta mee ceaut lesh chyndaa noon as noal son aash, derrey brishey’n laa.

⁵ Ta my eill coodit lesh beishteigyn as crammanyn ooir; ta my chrackan shirgit as dwoaiagh.

⁶ Ta my laghyn ny s’bieau na spaal fidderagh, as t’ad baarit fegooish treishteil.

⁷ O cooinee nagh vel my vea agh geay: cha jean my hooill fakin maynrys arragh.

⁸ Yn sooill t’er my akin cha vaik eh mee arragh: ta dty hooillyn orrym, as cha bee’m ny sodjey bio.

⁹ Myr ta’n bodjal lheïe ersooyl as goll ass shilley; myr shen eshyn ta goll sheese ayns yn oaie, cha jig eh seose arragh.

¹⁰ Cha jyndaa eh reesht gys e hie, chamoo ver e ynnyd enney er arragh.

¹¹ Shen-y-fa ver-yms reamys da my veeal; neem’s loayrt ayns angaish my spyrryd; neem’s gaccan ayns sherriuid my annym.

¹² Nee keayn, ny whale mee, dy vel oo troggal sterrym m’oï?

¹³ Tra ta mee gra, Nee my lhiabbee my gherjaghey, nee my lhiaght my accan y veeinaghey;

¹⁴ Eisht t’ou dy my agglaghey lesh dreamallyn, as dy my heaghney lesh ashlishyn;

¹⁵ Myr shen dy vel m’annym goaill stroialtys myr reih, as baase roish my vea.

¹⁶ Ta mee skee jeh; cha baillym ve foddey bio: lhig lhiam; son ta my laghyn fardalys.

¹⁷ Cre ta dooinney dy by-feeu lhiat streeu rish, as dy hoiaghey dty chree n’oï?

¹⁸ As dy lhieagh oo dty laue er dy chooilley voghrey, as dy smaghtaghey eh fey-ny-laa?

¹⁹ Caïd nagh jean oo m’aagail, ny lhiggey fea dou choud as oddym sluggey my helley?

²⁰ Ta mee er n’yannoo peccah; cre’n lhiasaghey oddym’s y yannoo, O uss Saualtagh deiney? cre’n-fa t’ou er my hoiaghey myr mark dt’oï, myr shen dy vel mee my errey dou hene?

²¹ As cre’n-fa nagh vel oo pardooney my pheccah, as goaill ersooyl my vee-chairys? son nish nee’m cadley ’sy joan; as nee oo shirrey my lurg ’sy voghrey, agh cha bee’m er-mayrn.