Lioar Yob 6 - Yn Vible Casherick 1775 1819

CAB. VI

¹ Agh dreggyr Job as dooyrt eh,

² Oh dy beagh my hrimshey dy slane er ny howse, as my heaghyn troggit seose ayns ny meihaghyn noi-ry-hoi!

³ Son nish veagh eh ny s’trimmey na geinnagh ny marrey: shen-y-fa ta my ghoan plooghit ayns my chree.

⁴ Son ta sideyn yn Ooilley-niartal cheu-sthie jee’m, ta’n pyshoon oc soo seose my spyrryd: ta atchimyn Yee soiaghey ad-hene ayns order-caggee m’oï.

⁵ Vel yn assyl feïe shutternee tra ta faiyr echey? ny vel y dow geamagh harrish e foddyr?

⁶ Vod shen ta neu-vlastal ve eeit gyn sollan? ny cre’n vlass t’ayns fynnican ooh kiark?

⁷ Ny reddyn shoh ta my annym dy yiooldey; t’ad myr my veaghey dobberanagh.

⁸ Oh dy beagh my accan aym! as dy jinnagh Jee cur dou my vian!

⁹ Eer dy gooidsave lesh Jee dy my stroie; dy jinnagh eh lhiggey magh e laue dy my yiarey jeh!

¹⁰ Eisht veagh gerjagh foast my chour; yinnin eer mee-hene y niartaghey ayns my hrimshey: ny lhig da sparail, son cha vel mee er n’obbal goan yn Er-casherick.

¹¹ Cre ta my niart, dy voddym’s cummal rish? as cre ta my yerrey, dooys dy ve foddey beayn?

¹² Vel my niart myr niart claghyn? ny vel m’eill myr prash?

¹³ Nee son nagh vel mee son cooney lhiam pene, dy vel creenaght dy bollagh er my hreigeil?

¹⁴ Dasyn t’ayns seaghyn lhisagh erreeish ve er ny hoilshaghey liorish e charrey; agh ta eshyn cur cooyl rish aggle yn Ooilley-niartal.

¹⁵ Ta my chaarjyn er ghellal dy molteyragh myr awin, as myr ny strooanyn t’ad lheïe ersooyl;

¹⁶ Ta jeeaghyn doo lesh y rio; as ayndoo ta’n sniaghtey follit:

¹⁷ Lesh y bree-hiass t’ad goll naardey; as lesh chiass ny greiney t’ad lheïe ersooyl.

¹⁸ Ta’n choorse-ushtey oc er ny hyndaa noon as noal; t’ad goll ass shilley, as t’ad caillit.

¹⁹ Yeeagh sheshaghtyn Tema er nyn son, va troailtee Sheba farkiaght orroo.

²⁰ V’ad ec kione nyn geiley, son dy row ad mollit ayns nyn dreishteil; haink ad gys shen, as hie nyn dappey voue.

²¹ Son nish, goll-roosyn cha vel shiu veg dooys; ta shiu fakin kys ta mee er my lhieggal, as ta shiu goaill nearey jee’m.

²² Dooyrt mee edyr, Cur-jee lhieu cooney? ny, Cur-jee kemmyrk dou jeh nyn gooid?

²³ Er-nonney, Livrey-jee mee veih laue y noid? ny, Jean-jee m’y eaysley veih laue yn tranlaasagh?

²⁴ Ynsee-jee mee, as bee’m my host; as cur-jee orrym toiggal cre ayns ta mee er ve foiljagh.

²⁵ Cre cha breeoil as ta goan ynrick! agh cre ta’n argane euish prowal orrym?

²⁶ Vel shiu smooinaghtyn dy my gheyrey son my ghoan, as son glare dooinney ta ec kione e cheiley, ta myr y gheay?

²⁷ Dy feer, ta shiu tuittym dy trome ersyn ta seaghnit, as ta shiu cleiy ooig son nyn garrey.

²⁸ Nish er-y-fa shen, lhig-jee fea dou; jeeagh-jee orrym; son cha bee eh gyn-yss diu my ta mee ’syn aggair.

²⁹ Gow-jee aa-smooinaght, ta mee guee erriu, ny cur-jee mee-chairys my lieh; dy jarroo, smooinee-jee er reesht, foddee cairys ’ve ayns my chooish.

³⁰ Vel camlaagys ayns my hengey? nagh vel my heaghyn sharroo gys my vlass?