Lioar Yob 5 - Yn Vible Casherick 1775 1819

CAB. V

¹ Eïe nish, my ta fer erbee ayn dy dty reggyrt; as gys quoi jeh ny ainleyn nee oo chyndaa?

² Son ta sproght marroo yn dooinney ommijagh, as ta troo stroie yn er mee-hushtagh.

³ Ta mee er vakin yn drogh ghooinney goaill fraue: agh dy leah honnick mee mollaght er e hie.

⁴ Ta e chloan foddey veih sauchys, t’ad er nyn gheyrey ’sy yiat, chamoo ta fendeilagh erbee oc.

⁵ Yn fouyr oc ta ny accryssee gee seose, as t’ad dy ghoaill eh veih mastey ny drineyn, as ta’n roosteyr sluggey seose nyn gooid.

⁶ Ga nagh vel trimshey troggal ass yn ooir, ny seaghyn gaase ass y thalloo,

⁷ Ny-yeih ta dooinney er ny ruggey gys seaghyn, myr ta smaylyn yn aile getlagh lesh yn yrjid.

⁸ Gys Jee yinnin’s shirrey, as gys Jee yinnin’s my chooish y hymney;

⁹ Ta jannoo reddyn mooarey, as erskyn nyn dushtey; reddyn yindyssagh erskyn earroo:

¹⁰ Ta cur fliaghey er y thalloo, as deayrtey ushtey er ny magheryn:

¹¹ Dy hroggal seose dy ard adsyn ta injil; dy vod adsyn ta dobberan ve soit ayns sauchys.

¹² T’eh tilgey bun-ry-skyn saaseyn ny croutee, myr shen nagh jarg ad cooilleeney ny t’ad dy ghoaill ayns laue.

¹³ T’eh goaill y vooinjer chluicagh ayns y chialgeyrys oc hene; as cur shaghrynys er coyrle ny camlaagee.

¹⁴ Ta dorraghys cheet orroo ’sy laa, as t’ad rasey son y raad er y vun-laa myr ’syn oie.

¹⁵ Agh t’eh sauail yn voght veih’n chliwe, veih yn veeal ocsyn, as veih laue yn vooinjer niartal.

¹⁶ Myr shen ta treishteil ec y voght, as ta beeal mee-chairys ny host.

¹⁷ Cur-my-ner, s’maynrey ta’n dooinney ta Jee lhie e laue er; shen-y-fa ny jean uss soiaghey beg jeh smaght yn Ooilley-niartal:

¹⁸ Son t’eh jannoo ching, as t’eh coyrt couyr; t’eh bwoalley, as ta ny laueyn echey slaanaghey.

¹⁹ Nee eh uss y livrey ayns shey seaghyn, eer ayns shiaght cha jig olk erbee dty choair.

²⁰ Ayns gortey nee eh uss y livrey veih baase, as ayns caggey veih pooar y chliwe.

²¹ Bee oo keillit veih guin y chengey elgyssagh; cha bee aggle ort roish toyrt-mow tra te cheet.

²² Er traartys as genney cha jean oo agh garaghtee: chamoo gowee oo aggle roish beishtyn ny hooirey.

²³ Son bee oo ayns coardail rish claghyn y vagher; as bee beishtyn feïe ny hooirey ec shee rhyt.

²⁴ As bee fys ayd dy vel dty chabbane ayns shee; as hig oo stiagh ayns dty hie, as cha jed oo er-shaghryn.

²⁵ Nee oo toiggal myrgeddin dy bee dty chloan mooarane, as dty luight myr faiyr y thallooin.

²⁶ Hig oo gys dty oaie ayns slane eash, myr ta toorran arroo cheet stiagh ’syn imbagh cooie.

²⁷ Cur-my-ner shoh, ta shin er gheddyn magh eh, shen myr te; eaisht rish, as gow toiggal jeh son dt’oays hene.