Lioar Yob 42 - Yn Vible Casherick 1775 1819

CAB. XLII

¹ Eisht dreggyr Job y Chiarn, as dooyrt eh,

² Ta fys aym dy vod oo dy chooilley nhee y yannoo, as nagh vod smooinaghtyn erbee ve gyn-yss dhyt.

³ Quoi eh-hene ta goaill er dy hoilshaghey coyrleyn follit? shen-y-fa ta mee er n’ockley magh shen nagh hoig mee; reddyn yindyssagh erskyn my roshtyn, nagh row fys aym orroo.

⁴ Eaisht rhym, ta mee guee ort, as loayr-ym: fên-yms jeed’s, as jean uss y hoilshaghey dooys.

⁵ Cheayll mee jeed’s dy jarroo liorish clashtyn cleayshey; agh nish ta my hooill er dt’akin:

⁶ Shen-y-fa ta dwoaie aym orrym pene, as ta mee goaill arrys ayns joan as leoie.

⁷ As shen myr ve, erreish da’n Chiarn v’er loayrt ny goan shoh rish Job, dy dooyrt y Chiarn rish Eliphaz yn Temanite, Ta my chorree er ny vrasnaghey dt’oï, as noi dty ghaa charrey: son cha vel shiu er loayrt [my-]mychione’s shen ny ta cairagh, myr ta my harvaant Job.

⁸ Shen-y-fa gow-jee nish hiuish shiaght dew as shiaght reaghyn, as immee-jee gys my harvaant Job, as cheb-jee seose er nyn son hene oural-losht; as nee my harvaant Job padjer y ghoaill er nyn son, son eshyn neem’s soiaghey jeh; er-aggle dy dellym riu rere nyn ommijys, ayns wheesh as nagh vel shiu er loayrt my-mychione’s shen ny ta cairagh, myr ta my harvaant Job.

⁹ Myr shen hie Eliphaz yn Temanite, as Bildad yn Shuhite as Zophar yn Naamathite, as ren ad ny va’n Chiarn er harey: ren y Chiarn myrgeddin soiaghey jeh Job.

¹⁰ As ren y Chiarn cappeeys Yob y hyndaa, tra ghow eh padjer son e chaarjyn: myrgeddin hug y Chiarn da Job ghaa wheesh as v’echey roïe.

¹¹ Eisht haink huggey ooilley e vraaraghyn, as ooilley e hayraghyn, as ooilley e ainjyssee, as ghow ad gien mârish ayns e hie; as ghow ad accan jeh, as ren ad eh y gherjaghey son ooilley ny seaghyn va’n Chiarn er choyrt er: hug ad dy chooilley ghooinney da myrgeddin peesh dy argid, as fainey-cleaysh dy airh.

¹² Myr shoh vannee’n Chiarn jerrey bea Yob ny smoo na’n toshiaght: son v’echey kiare thousaneyn jeig keyrragh, as shey thousane camel, as thousane whing dy ghew, as thousane assyl bwoirryn.

¹³ V’echey myrgeddin shiaght mec, as three inneenyn.

¹⁴ As denmys eh ennym yn inneen shinney, Jemima; as yn nah unnane, Kezia; as ennym y trass, Keren-happuch.

¹⁵ As ayns ooilley’n cheer cha row mraane erbee ry-akin cha aalin as inneenyn Yob: as hug nyn ayr daue eiraght mastey nyn mraaraghyn.

¹⁶ Ny lurg shoh va Job bio shiaght-feed bleïn, as honnick eh e vec, as cloan e chlienney, eer kiare sheelogheyn.

¹⁷ Myr shen hooar Job baase ayns shenn eash vie, as lane dy laghyn.