Lioar Yob 41 - Yn Vible Casherick 1775 1819

CAB. XLI

¹ Vod oo Leviathan y hayrn seose lesh croagane? ny’n coyrd t’ou lhiggey sheese y chur trooid e ghruntyn?

² Vod oo dooan y chur ayns ny stroanyn echey? ny’n cheeill echey y hoylley lesh kibbin?

³ Jean eh ymmodee accanyn hood? ny brynneraght rhyt ayns goan meeley?

⁴ Jean eh coardail y yannoo rhyt? jean oo goaill eh son dty harvaant gagh-laa?

⁵ Jean oo cloie rish myr rish ushag? ny cur eh er-eistyr son dty vraane aegey?

⁶ Jean oo gaarlaghey eh son dty ghoaldee? jean ad eh y rheynn mastey ny marchanyn?

⁷ Vod oo yn crackan echey y lhieeney lesh yiarnyn friogagh? ny’n kione echey y lhottey lesh listeryn eeastee?

⁸ Lhie dty laue er my s’loys dhyt, cooinee er y chaggey, as faag voïd eh.

⁹ Cur-my-ner, te ayns fardail dy hreishteil er: nagh beagh fer er ny lhieggey ec yn eer shilley jeh?

¹⁰ Cha by-loys da’n dooinney s’dunnal dy ghoostey eh; quoi eisht ta abyl dy hassoo roym’s?

¹¹ Quoi t’er ve ro-laue rhym ayns kenjallys, dooys dy lhiasaghey da? cre-erbee ta fo yn slane niau, she lhiam’s eh.

¹² Cha jean-ym keiltyn e oltyn, ny e hroshid, ny stoamid cummey e niart.

¹³ Quoi oddys cheu-astan e choamrey y hyndaa? ny quoi oddys cheet huggey lesh streean-volgagh?

¹⁴ Quoi s’loys da dorryssyn e veeal y osley? s’atchimagh ta e eeacklyn ooilley mygeayrt!

¹⁵ Ta e scaailey e voyrn, lhiantyn er y cheilley myr lesh seal shickyr.

¹⁶ T’ad cha chion er y cheilley, nagh vod yn aer sloo cheet eddyr ad.

¹⁷ T’ad sniemmit yn derrey yeh gys y jeh elley, t’ad lhiantyn ry-cheilley, nagh vod ad ve er ny scarrey.

¹⁸ Liorish yn streiyraght echey ta soilshey brishey magh, as ta e hooillyn myr ferrooghyn y voghrey.

¹⁹ T’eh cur magh yn ennal ass e veeal myr strooanyn aile, as myr smarageyn aile lheim mygeayrt.

²⁰ Ass ny stroanyn echey ta jaagh goll magh, myr bree oghe ny coirrey.

²¹ T’eh sheidey seose aile lesh e ennal, as ta bree aileagh goll magh er e veeal.

²² Ayns e wannal ta niart tannaghtyn, as ta toyrt-mow boggyssagh kiongoyrt rish.

²³ Ta fillaghyn yn eill echey sniemmit dy cheilley: t’ad lajer orroo hene; cha vod ad ve er ny vrishey.

²⁴ Ta e chree co-chreoi rish y chreg; eer, co-chreoi rish peesh jeh clagh-laare y wyllin.

²⁵ Tra t’eh troggal seose eh-hene, ta ny treanee fo aggle: son eer atchim t’ad tuittym gys y thalloo.

²⁶ Yn cliwe echeysyn ta dy woalley er, cha vod eh cummal rish; yn shleiy, yn gah, ny’n eilley-broghil.

²⁷ T’eh dy choontey yiarn myr coonlagh, as prash myr fuygh loau.

²⁸ Cha vod y tide cur er-chea: cha vel claghyn-sling huggeysyn agh myr coau.

²⁹ Ta’n gah coontit myr stubble: t’eh jannoo craid jeh baggyrt y shleiy.

³⁰ T’eh lhie er claghyn gyere: t’eh skeayley e oltyn frioganagh er y laagh.

³¹ T’eh cur er y diunid dy vroie myr pot: as yn aarkey dy ve myr pot ooiley.

³² T’eh cur er luddan-mea dy hoilshean ny yeï; heillagh fer yn diunid dy ve lheeah.

³³ Er yn ooir cha vel tuarystal jeh, cretoor nagh vel aggle ayn.

³⁴ T’eh soiaghey beg jeh dy chooilley nhee ard: t’eh ny ree harrish ooilley cloan ny mooaralee.