Lioar Yob 40 - Yn Vible Casherick 1775 1819

CAB. XL

¹ Ny-sodjey, dreggyr y Chiarn Job, as dooyrt eh,

² Jean eshyn ta streeu rish yn Ooilley-niartal goaill er dy ynsaghey eh? eshyn ta geddyn foill rish Jee, lhig da gansoor er y hon.

³ Eisht dreggyr Job y Chiarn, as dooyrt eh,

⁴ Cur-my-ner, ta mee my chretoor treih; cre t’aym dy reggyrt? lhie-ym my laue er my veeal.

⁵ Keayrt ta mee er loayrt, agh cha jean-ym freggyrt; dy jarroo, daa cheayrt, agh cha jem lesh ny-sodjey.

⁶ Eisht dreggyr y Chiarn Job ass y gheay-chassee, as dooyrt eh,

⁷ Kiartee seose dty veeghyn nish myr dooinney: feysht-ym oo, as soilshee uss dooys.

⁸ Jean uss myrgeddin my vriwnys dy ve dyn bree? jean oo mish y gheyrey, dy vod oo-hene ve er dty heyrey?

⁹ Vel roih ayd’s myr t’ec Jee? er-nonney vod oo taarnaghey lesh dty choraa goll-rishyn?

¹⁰ Coamree nish oo-hene lesh ard-ooashley as ooilley-niartallys; as soie oo-hene magh lesh gloyr as aalid.

¹¹ Skeayl mygeayrt-y-mood eulys dty yymmoose; as cur-my-ner dy chooilley hranlaasagh, as lhieg eh.

¹² Jeeagh er dy chooilley vooaralagh, as cur eh sheese dy injil; cur ny mee-chrauee fo-chosh ayns nyn gummal.

¹³ Follee ad ayns y joan dy cheilley, as coodee nyn eddin ayns dorraghys.

¹⁴ Eisht neem’s myrgeddin goaill rhyt dy vod dty laue yesh hene oo y hauail.

¹⁵ Cur-my-ner nish Behemoth, ta mee er chroo mayrt; t’eh gee faiyr myr dow.

¹⁶ Cur-my-ner nish, ta’n niart echey ayns e veeghyn, as e vree ayns imleig e volg.

¹⁷ T’eh troggal e amman myr billey-cedar: ta fehyn e veeghyn er ny sniemmey cooidjagh.

¹⁸ Ta e chraueyn lajer myr prash, as e asnaghyn myr barryn yiarn.

¹⁹ T’eh unnane jeh ard-obbraghyn Yee: cha vod agh cliwe yn Er-croo cheet er-gerrey da.

²⁰ Son shickyrys ta ny sleityn gymmyrkey magh beaghey da, raad ta ooilley maase y vagher goaill nyn soylley.

²¹ T’eh lhie fo scadoo ny biljyn, fo coodagh yn chuirtlagh, as ny curreeyn.

²² T’eh lhie fo scaa ny biljyn choo; ta shellagh ny strooanyn son fastee da.

²³ Cur-my-ner, t’eh giu seose awin ec e chaa: er-lesh hene dy vod eh Jordan y lhuggey seose lesh e veeal.

²⁴ T’eh goaill eh lesh e hooillyn: as lesh e chab t’eh brishey trooid ribbaghyn.