Lioar Yob 4 - Yn Vible Casherick 1775 1819

CAB. IV

¹ Eisht dreggyr Eliphaz yn Temanite, as dooyrt eh,

² My ghoys mayd orrin dy resooney rhyt, nagh jean oo goaill olk rish? agh quoi oddys eh-hene y smaghtaghey veih loayrt?

³ Cur-my-ner, t’ou uss oo-hene er choyrlaghey ymmodee, as er niartaghey ny laueyn faase.

⁴ Ta dty ghoan er chummal seose eshyn va aarloo dy huittym, as t’ou er niartaghey ny glioonyn annoon.

⁵ Agh nish te er jeet dty raad, as t’ou lhag-chreeagh; te er duittym ort, as t’ou seaghnit.

⁶ Nee shoh dty aggle, dty varrant, dty hreishteil ayns Jee, as ynrickys dty raaidyn?

⁷ Smooinee, ta mee guee ort, quoi ren rieau cherraghtyn, as eh gyn-loght? ny cre’n raad va’n vooinjer chairagh er ny yiarey jeh?

⁸ Eer myr ta mee er vakin, dy vel adsyn ta traaue mee-chairys, as cuirr olkys, buinn y lheid cheddin.

⁹ Liorish blest Yee t’ad cherraghtyn, as liorish ennal e yymmoose t’ad er ny choyrt mow.

¹⁰ Ta buirroogh y lion, as coraa’n lion dewil, as feeacklyn ny lionyn aegey, er nyn mrishey.

¹¹ Ta’n chenn lion goll naardey son laccal e chragh, as ta quallianyn y lion lajer er nyn skeayley.

¹² Nish va folliaght er ny hoilshaghey dou, as haink eh myr sannish gys my chlashtyn.

¹³ Myr ayns smooinaghtyn veih ashlishyn yn oie, tra ta cadley trome tuittym er deiney,

¹⁴ Haink aggle orrym, as atchim, hug er ooilley my chraueyn dy ve er-creau.

¹⁵ Eisht hie spyrryd shaghey kiongoyrt rish my eddin; hrog folt my ching:

¹⁶ Hass eh roym, agh cha voddin baght y ghoaill jeh e chummey: va scaan roish my hooillyn; va ooilley kiune, as cheayll mee coraa, gra,

¹⁷ Vod dooinney marvaanagh ve ny s’cairal na Jee? vod dooinney ve ny s’ynrick na e Er-croo?

¹⁸ Cur-my-ner, cha dug eh veg y varrant ayns e hirveishee; as eer ayns ny ainleyn hug eh my-ner fardalys:

¹⁹ Cre-woad smoo ayndoosyn ta cummal ayns thieyn dy chray, ta’n undin oc ’sy joan, t’er ny vroo myr y lhemeen? T’ad goll naardey veih’n voghrey gys yn astyr: t’ad cherraghtyn son dy bragh, fegooish scansh ve jeant jeh.

²⁰ Nagh vel yn ooashley oc lheïe ersooyl? t’ad geddyn baase, eer fegooish tushtey.