Lioar Yob 39 - Yn Vible Casherick 1775 1819

CAB. XXXIX

¹ Vel fys ayd’s cre’n traa ta goair feïe y chreg gymmyrkey? as vel toiggal ayd’s cuin ta ny feeaïhee breh?

² Vod uss goardrail ny meeaghyn t’ad goll; as nee foyd’s ta’n traa daue dy ymmyrkey nyn ingan?

³ T’ad dy chroymmey ad-hene, t’ad breh nyn lheiyee, garveigagh ayns pian.

⁴ Ta nyn lheiyee ayns callin vie, t’ad gaase seose lesh arroo; t’ad cosney roue, as cha vel ad chyndaa huc arragh.

⁵ Quoi t’er chur reamys da’n assyl fadane? ny quoi t’er eaysley kianglaghyn yn assyl oaldey?

⁶ Yn fastee echey ta mee er n’yannoo ’syn aasagh, as y reeastane dy ve e chummal.

⁷ Cha vel eh agh jannoo craid jeh ymmodee yn ard-valley, chamoo t’eh cur geill da coraa yn immanagh.

⁸ Ta’n aber echey trooid slane reamys ny sleityn, as t’eh ronsagh lurg dy chooilley cheint dy ghlassyraght.

⁹ Der oo er yn unicorn dy hirveish oo dy arryltagh, ny tannaghtyn liorish dty chratch?

¹⁰ Vod oo yn unicorn y yokal ’sy whing son traaue? ny jean eh ny coanyn y chleiee er dty hon?

¹¹ Jean oo treishteil er, son dy vel e niart mooar? as jean oo dt’obbyr y aagail da?

¹² Vod oo credjal dy der eshyn lesh thie dty arroo, as chaglym stiagh eh gys dty hoalt?

¹³ Nee uss hug ny skianyn aalin da’n peacock, ny skianyn as fedjagyn da’n ostrich?

¹⁴ Ta faagail ny oohyn eck ’syn ooir, as lhiggey daue guirr ’sy ghenniagh.

¹⁵ As jarrood dy vod y chass ad y vroo, ny’n beisht feïe ad y vrishey.

¹⁶ T’ee creoghit noi e eeanlee, myr nagh beagh ad lh’ee hene: ta’n obbyr eck ayns fardail gyn aggle;

¹⁷ Er-yn-oyr dy vel Jee er n’obbal creenaght jee, chamoo t’eh er yannoo magh ee lesh tushtey.

¹⁸ Tra t’ee troggal seose ee-hene dy ard, cha vel ee agh jannoo craid jeh’n chabbyl as e varkiagh.

¹⁹ Nee uss hug troshid da’n niagh? nee uss ren coamrey e wannal lesh taarnagh?

²⁰ Vod oo aggle y chur ayn, myr ayns y lheimeyder-faiyr? ta gloyr e stroanyn atchimagh.

²¹ T’eh cleiy yn choan lesh e chass, as boggyssagh ayns e niart: t’eh goll er e hoshiaght quail ny deiney-caggee.

²² T’eh craidey mysh aggle, as cha vel atchim bentyn rish; chamoo t’eh cur cooyl da’n chliwe.

²³ Ta’n bolg-side feiyral n’oï, yn shleiy sollys as yn eilley-caggee.

²⁴ T’eh sluggey seose y thalloo lesh eulys, as t’eh er-rouyl; chamoo ta scansh erbee echey jeh sheean y trumpet.

²⁵ T’eh shutternee mastey ny cayrnyn, Ha, ha! as t’eh soaral y chaggey veih foddey, taarnagh ny captanyn, as yn eam caggee.

²⁶ Nee liorish yn chreenaght ayd’s ta’n shawk getlagh, as skeayley magh e skianyn lesh y jiass?

²⁷ Vel yn urley getlagh seose er dty harey’s, as jannoo yn edd eck ’syn yrjid?

²⁸ T’ee soie as cummal er y chreg, er baare ny creggey, as beinn yn eaynee.

²⁹ Veih shen t’ee jeeaghyn mygeayrt son y chragh, as ta ny sooillyn eck cronnaghey foddey jeh.

³⁰ Ta ny eeanlee eck myrgeddin soo seose fuill: as raad ta ny merriu, shen y raad t’eeish.