Lioar Yob 36 - Yn Vible Casherick 1775 1819

CAB. XXXVI

¹ Hie Elihu lesh ny-sodjey, as dooyrt eh,

² Surr dou son tammylt, as soilshee-ym dhyt cre t’aym ny-sodjey dy lhiassaghey ayns lieh Yee.

³ Ver-ym lhiam my hushtey veih foddey, as ver-yms cairys gys lieh my Er-croo.

⁴ Son ayns firrinys cha bee my ghoan foalsey; ga [er-lhiat] dy vel ooilley’n cheeayll ayd hene.

⁵ Cur-my-ner, ta Jee niartal, as cha vel eh soiaghey beg jeh unnane erbee: t’eh pooaral ayns niart as creenaght.

⁶ Cha vel eh coadey bioys ny mee-chrauee; agh t’eh cur cairys da’n voght.

⁷ Cha vel eh scughey e hooillyn veih’n vooinjer chairal; agh marish reeaghyn t’ad er y stoyl-reeoil; dy feer, t’eh dy hickyraghey ad son dy bragh, as t’ad er nyn yrjaghey.

⁸ As my t’ad kianlt ayns geulaghyn, as er ny hionney lesh ny coyrdyn dy heaghyn;

⁹ Eisht t’eh soilshaghey daue nyn obbyr, as nyn ghrogh-yannoo cre wheesh t’ad er ve.

¹⁰ T’eh fosley nyn gleaysh myrgeddin gys ynsagh, as cur daue sarey dy hyndaa veih nyn mee-chairys.

¹¹ My ver ad biallys as shirveish da, nee ad baarail nyn laghyn ayns maynrys, as nyn mleeantyn ayns shee:

¹² Agh mannagh bee ad biallagh, nee ad cherraghtyn liorish y chliwe, as yiow ad baase ayns nyn mee-hushtey.

¹³ Agh ta ny crauee-oalsey ayns cree cur seose jymmoose nyn gour hene; cha vel ad geamagh huggey tra t’eh cur seaghyn orroo:

¹⁴ T’ad geddyn baase ayns nyn aegid, as ta nyn mioys ny mast’ ocsyn ta giarit magh.

¹⁵ T’eh livrey yn voght ayns e heaghyn, as fosley nyn gleayshyn ayns nyn jennid:

¹⁶ Eer myr shen veagh eh er scughey uss ass y chennid gys reamys, raad nagh row chennid erbee; as veagh gien dty voayrd jeant magh lesh slane meeaylys.

¹⁷ Agh t’ou uss er n’yannoo magh slane towse briwnys ny mee-chrauee: shen-y-fa ta briwnys as cairys dy dty ghreimmey.

¹⁸ Fakin dy vel jymmoose dt’oï, cur twoaie nagh bee oo goit ersooyl lesh orraghey baaish: eisht cha bee saase ayns berchys dy chur feaysley dhyt.

¹⁹ Jean eshyn soiaghey jeh dty verchys? Beggan; chamoo jeh airh, ny ooilley pooaraghyn dty niart.

²⁰ Ny shir dorraghys yn oie, tra ta sleih er ny yiarey jeh ass nyn ynnyd.

²¹ Cur twoaie, ny gow taitnys ayns mee-chairys: son shoh t’ou er reih roish seaghyn.

²² Cur-my-ner, ta Jee troggal seose lesh e phooar: quoi ta gynsaghey goll-rishyn?

²³ Quoi t’er n’oardaghey yn raad echeysyn? ny quoi oddys gra, T’ou er n’yannoo mee-chairys?

²⁴ Cooinee dy der oo ard-voylley da son e obbraghyn, ta deiney cur-my-ner.

²⁵ Foddee dy chooilley ghooinney goaill baght jeu; foddee dooinney ad y chronnaghey foddey jeh.

²⁶ Cur-my-ner, ta Jee mooar, as cha vel enney ain er; chamoo oddys earroo ny bleeantyn echey ve er ny ronsagh magh.

²⁷ Son t’eh jannoo myn ny bineyn ushtey: t’ad deayrtey neose fliaghey rere bree yn chay t’er hroggal;

²⁸ Shen ta ny bodjallyn deayrtey as shilley neose dy palchey er cloan ny cruinney.

²⁹ Myrgeddin vod fer erbee toiggal skeayley-magh ny bodjallyn, ny feiyr e chabbane?

³⁰ Cur-my-ner, t’eh skeayley sollyssid e hendreil er-y-skyn, as t’eh dy hyndaa seose grunt ny marrey.

³¹ Son lioroo shoh t’eh dy vriwnys ny ashoonyn; as shirveish beaghey ayns mooarane sonnys.

³² Lesh bodjallyn t’eh coodaghey yn toilshey, as cur sarey da, nagh jean eh soilshean, liorish bodjal cheet eddyr ad.

³³ Ta’n feiyr echey fockley magh cre voish te, ta’n maase myrgeddin gennaghtyn y vree.