Lioar Yob 3 - Yn Vible Casherick 1775 1819

CAB. III

¹ Ny lurg shoh doshil Job e veeal, as ghwee eh da’n laa ruggyr eh.

² As loayr Job, as dooyrt eh,

³ Lhig da’n laa cherraghtyn er va mee er my ruggey, as yn oie ayn ve er ny ghra, Ta lhiannoo-mac er ny yientyn.

⁴ Lhig da’n laa shen ve dorraghys; ny lhig da Jee jeeaghyn er veih’n yrjid, chamoo lhig da soilshey soilshean er.

⁵ Lhig da neeal y dorraghys as scadoo’n vaaish ve er; lhig da bodjal lhie er; lhig da dooid y laa jannoo eh atchimagh.

⁶ As er son yn oie shen, lhig da dorraghys greimmey eh, ny lhig da ve er ny choontey mastey laghyn ny bleeaney, ny lhig da cheet ayns earroo ny meeaghyn.

⁷ Agh lhig da’n oie shen ve trimshagh; ny lhig da coraa erbee dy yennallys ve er ny chlashtyn ayn.

⁸ Lhig daue gwee mollaght da, myr da’n laa er ta’n coraa dy ghobberan hrome er ny chlashtyn.

⁹ Lhig da rollageyn e cho-leayrtys ve fo dorraghys; lhig da jeeaghyn son soilshey, agh ayns fardail, chamoo lhig da fakin ferrooghyn y voghrey:

¹⁰ Er-yn-oyr nagh yeigh eh seose dorryssyn breïn my vayrey, as nagh dollee eh trimshey veih my hooillyn.

¹¹ Cre’n-fa nagh dooar mee baase ayns y vreïn? cre’n-fa nagh scarr mee rish my vioys tra haink mee er y theihll?

¹² Cre’n-fa ren ny glioonyn goaill rhym? ny ny keeaghyn ta mee er yiole?

¹³ Son nish veign my lhie ec my aash; dy kiune veign my chadley ayns shee as ec fea,

¹⁴ Marish reeaghyn as mooaralee yn thallooin, hrog lhiaghtyn daue hene ayns ynnydyn faasagh;

¹⁵ Ny marish princeyn berchagh ayns airh, ren ny thieyn oc y lhieeney lesh argid:

¹⁶ Er-nonney follit myr ymmyrkey roish y traa cha beign ayn; myr mwaneyn nagh vaik rieau y toilshey.

¹⁷ Shen y raad ta ny mee-chrauee scuirr veih tranlaase; as ayns shen ta’n deinagh ec fea.

¹⁸ Shen y raad ta ny pryssoonee goaill nyn aash cooidjagh; cha vel ad clashtyn coraa yn tranlaasagh.

¹⁹ Ta beg as mooar corrym ayns shen; as ta’n charvaant seyr veih e vainshtyr.

²⁰ Cre’n-fa ta soilshey er ny hannaghtyn dasyn ta ayns treihys, as bea dauesyn ta ayns sherriuid anmey?

²¹ Ta goaill foddeeaght son y vaase, as cha vel eh cheet; as cleiy er y hon ny smoo na son berchys follit;

²² Ta ayns lane boggey, as booiagh dy liooar dy gheddyn yn oaie.

²³ Cre’n-fa ta soilshey er ny choyrt da’n dooinney shen ta e raad ayns dorraghys, as eh ta Jee er chruinnaghey mygeayrt lesh seaghyn?

²⁴ Son ta my osnaghyn cheet orrym roish my lhongaghyn, as ta my ghobberan deayrtey magh myr ny ushtaghyn.

²⁵ Son ta shen ny va mee dy mooar ayns aggle roish er jeet orrym, as yn atchim va mee fo er duittym orrym dy trome.

²⁶ Cha row mee ayns sauchys, chamoo va mee ec m’aash, chamoo va mee ec fea; ny-yeih haink seaghyn sodjey my raad.