Lioar Yob 29 - Yn Vible Casherick 1775 1819

CAB. XXIX

¹ Ny-sodjey, hie Job er e hoshiaght lesh e choraa-dorraghey, as dooyrt eh,

² Oh dy beagh mee myr ayns ny meeaghyn t’er n’gholl shaghey, myr ayns ny laghyn tra ren Jee m’y choadey;

³ Tra ren e chainle soilshean er my chione, as tra liorish e hoilshey ren mee gimmeeaght trooid dorraghys;

⁴ Myr va mee ayns laghyn my aegid, tra va ard-chiarail Yee harrish my chabbane;

⁵ Tra va’n Ooilley-niartal foast mârym, tra va my chloan mygeayrt-y-moom;

⁶ Tra ren mee my chesmadyn y ooraghey lesh eeym, as tra ren y chreg deayrtey magh er my hon awinyn dy ooil;

⁷ Tra hie mee magh er y yiat, trooid yn ard-valley, tra hoie mee er y stoyl-briwnys ’sy traid;

⁸ Honnick ny deiney aegey mee, as hie ad dy lhiattee: dirree yn chanstyr, as hass ad seose.

⁹ Va ny princeyn nyn dhost, as hug ad nyn laue er nyn meeal.

¹⁰ Cha daink fockle ass beeal ny deiney ooasle, as ren nyn jengey lhiantyn gys druntyn nyn meeal.

¹¹ Tra ren y chleaysh m’y chlashtyn, eisht vannee eh mee; as tra honnick yn sooill mee, dymmyrk eh feanish dou:

¹² Er-yn-oyr dy livrey mee yn boght er e accan, yn chloan gyn ayr, as eshyn va gyn cooney.

¹³ Haink orrym’s y bannaght echeysyn va aarloo dy herraghtyn: as hug mee er cree yn ven-treoghe dy ghoaill arrane son boggey.

¹⁴ Hug mee cairys moom, as ve my choamrey: va my vriwnys myr coamrey ooasle orrym, as myr attey reeoil.

¹⁵ Va mee sooillyn da’n doal, as cassyn va mee da’n chroobagh.

¹⁶ Va mee my ayr da’n voght: as y chooish doillee ronsee mee magh.

¹⁷ As vrish mee cab y vee-chrauee, as phluck mee yn spooilley ass e eeacklyn.

¹⁸ Eisht dooyrt mee rhym pene, Yioym baase ayns my edd, as bee my laghyn er ny vishaghey myr y ghenniagh.

¹⁹ Va my fraue er ny skeayley magh liorish ny ushtaghyn, as lhie yn druight fud-ny-hoie er my vanglane.

²⁰ Va my ghloyr aalin orrym, as va my vhow er ny niartaghey ayns my laue.

²¹ Rhym’s ren deiney geaishtagh, as farkiaght, as v’ad nyn dhost ec my choyrle.

²² Lurg my ghoan cha loayr ad reesht; as ren my ghlare shilley myr y druight orroo.

²³ As ren ad farkiaght er my hon myr son y fliaghey; as doshil ad nyn meeal dy lhean myr son fliaghey yn jerrey bleeaney.

²⁴ My va mee gennal mâroo, s’coan v’ad dy chredjal eh; as soilshey my eddin cha lhig ad sheese.

²⁵ Hug mee rhymboo nyn raad, as hoie mee myr yn ard-er ny mast’ oc, as va mee myr ree ayns y cheshaght-chaggee, myr fer ta gerjaghey ny trimshee.