Lioar Yob 26 - Yn Vible Casherick 1775 1819

CAB. XXVI

¹ Agh dreggyr Job as dooyrt eh,

² Kys t’ou er chooney leshyn ta fegooish pooar? kys t’ou sauail yn roih gyn-niart?

³ Kys t’ou er choyrlaghey eshyn ta gyn creenaght? as kys t’ou dy slane er hoilshaghey yn chooish myr te?

⁴ Quoi da t’ou er n’ockley magh dty ghoan? as quoi’n spyrryd haink voïd?

⁵ Va ny tranlaasee niartal ’sy chenn earish er nyn stroie fo ny ushtaghyn, marish ny cummaltee elley.

⁶ Ta niurin foshlit kiongoyrt rish, as toyrt-mow gyn coodagh.

⁷ T’eh sheeyney magh yn twoaie harrish y feaynid vooar, as t’eh cummal seose yn seihll er y folmid.

⁸ T’eh kiangley seose ny ushtaghyn ayns e vodjallyn chiu, as cha vel y bodjal er ny scoltey foue.

⁹ T’eh coodaghey ynnyd e eanish, as skeayley bodjal harrish.

¹⁰ T’eh er hoiaghey cagliagh da ny ushtaghyn, derrey ta’n laa as yn oie cheet dy cheilley.

¹¹ Ta pillaryn yn aer er-creau, as fo atchim ec e oghsan.

¹² T’eh dy rheynn yn aarkey liorish e phooar, as liorish e hushtey t’eh cur haart ny mooaralee.

¹³ Liorish e Spyrryd t’eh er choamrey ny niaughyn; e laue t’er chummey yn ard-nieu camlaagagh.

¹⁴ Cur-my-ner, cha vel ad shoh agh ayrn giare jeh ny raaidyn echey; agh cre cha beg ta nyn dushtey jeh e obbraghyn? as taarnagh e phooar quoi oddys toiggal?