Lioar Yob 24 - Yn Vible Casherick 1775 1819

CAB. XXIV

¹ Fakin nagh vel ny traaghyn keillit veih’n Ooilley-niartal, cre’n-fa nagh vel adsyn oc ta enney er cur geill da e laghyn?

² Ta paart scughey ny cagleeyn; t’ad liorish laue lajer goaill ersooyl shioltaneyn, as beaghey orroo.

³ T’ad geiyrt ersooyl assyl y chloan gyn ayr, t’ad goaill dow yn ven-treoghe son gioal.

⁴ T’ad cur yn voght er-shaghryn ass y raad: ta ymmyrchee yn thallooin follaghey ad-hene cooidjagh.

⁵ Cur-my-ner, myr ny assylyn feïe ’syn aasagh, shen myr t’ad goll magh gys nyn obbyr, girree dy moghey son spooilley: ta’n aasagh gymmyrkey mess daue hene as da nyn gloan.

⁶ T’ad buinn dagh fer e arroo hene ’sy vagher, as t’ad chaglym stiagh fouyr ny mee-chrauee.

⁷ Cha vel ad cur aaght ny eaddagh da’n rooisht, myr shen nagh vel coodagh oc veih’n feayraght;

⁸ T’ad fluigh lesh frassyn ny sleityn, as t’ad lhie rish y chreg son fastee;

⁹ T’ad raipey yn chloan gyn ayr veih’n cheeagh, as goaill gioal veih’n voght;

¹⁰ T’ad cur er goll rooisht gyn coamrey, as goaill ersooyl y vunney veih ny accryssee;

¹¹ Ta jannoo ooil cheu-sthie jeh nyn voallaghyn, as stampey ny pressyn-feeyney oc, as surranse paays.

¹² Ta deiney gaccan veih’n ard-valley, as ta’n annym ocsyn ta guint geamagh dy ard; ny-yeih cha vel Jee cur ommijys nyn lieh.

¹³ Shoh ad ta dwoaie oc er y toilshey; cha nhione daue ny raaidyn echey, chamoo t’ad tannaghtyn ayns ny cassanyn echey.

¹⁴ Ta’n dunver, girree ’sy vadran, dy ghunverys yn boght as ymmyrchagh, as ayns yn oie t’eh myr maarliagh.

¹⁵ Myrgeddin ta sooill y vaarderagh farkiaght son y cho-leayrtys, gra, Cha jean sooill erbee m’y akin; as t’eh caghlaa cummey e eddin.

¹⁶ Ayns y dorraghys t’ad cleiy trooid ny thieyn, v’ad er chowraghey daue hene ’sy laa: cha nhione daue yn soilshey.

¹⁷ Son ta’n voghrey dauesyn eer myr scadoo’n vaaish: my nee fer enney y chur orroo, t’ad ayns atchimyn scadoo’n vaaish.

¹⁸ T’eh bieau myr ny ushtaghyn; ta mollaght lhiantyn gys e chronney er y thalloo; cha vow eh soylley ny garaghyn-feeyney.

¹⁹ Ta fowan as chiass chyrmaghey seose ny ushtaghyn sniaghtee: myr shen ta’n oaie adsyn t’er n’yannoo peccah.

²⁰ Nee’n vreïn eshyn y yarrood; nee’n beishteig beaghey dy blaystal er: cha bee imraa sodjey jeh; as bee mee-chraueeaght er ny vrishey myr billey.

²¹ T’eh cur drogh ghellal da’n ven ghennish nagh vel gymmyrkey; chamoo t’eh jannoo mie erbee da’n ven-treoghe.

²² T’eh tayrn myrgeddin huggey yn vooinjer niartal lesh e phooar: t’eh girree seose, as cha vel dooinney erbee shickyr jeh e vioys.

²³ Ga dy vel eh jeeaghyn er hene dy ve ayns sauchys, as cur e varrant er; ny-yeih ta e hooillyn er nyn raaidyn.

²⁴ T’ad troggit seose son tammylt, agh t’ad goit ersooyl, as lhie dy injil; t’ad giarit sheese, myr ooilley nyn lheid, as buinnit myr ny jeeassyn arroo.

²⁵ As nish mannagh vel eh myr shoh, quoi nee breagerey jee’m, as my ghlare dy ve gyn ymmyd?