Lioar Yob 23 - Yn Vible Casherick 1775 1819

CAB. XXIII

¹ Eisht dreggyr Job as dooyrt eh,

² Eer jiu hene ta my accan sharroo; ta my ghuin ny s’diuney na my osnaghyn.

³ Oh dy beagh fys aym c’raad yiow’n magh eh! dy heet gys eer stoyl e vriwnys!

⁴ Yinnin my chooish y hoiaghey magh kiongoyrt rish, as lhieeney my veeal lesh resoonyn fondagh.

⁵ Veagh fys aym eisht cre’n ansoor veagh aym, as toiggal cre yiarragh eh rhym.

⁶ Jean eh pleadeil m’oï ayns mooadys e niart? Cha jinnagh eh; agh m’y niartaghey.

⁷ Ayns shen oddagh yn dooinney cairagh resooney rish; myr shoh veign er my heyrey maghey shen veih my vriw.

⁸ Cur-my-ner, ta mee goll er my hoshiaght, agh cha vel eh ayns shen; as jeeaghyn my yeï, agh cha voddym cur-my-ner eh.

⁹ Er y laue chiare, raad t’eh gobbraghey, agh cha vel baght aym jeh: t’eh follaghey eh-hene er y laue yesh, nagh voddym shilley y gheddyn jeh.

¹⁰ Agh shione dasyn my ymmyrkey: tra t’eh er my phrowal, hig-ym magh myr airh.

¹¹ Ta my chass er reayll e chesmadyn; gys e raad ta mee er chummal, as cha vel mee er hreigeil eh.

¹² Chamoo ta mee er hyndaa veih slattys e veillyn; ta mee er hoiaghey ny smoo jeh goan e veeal na jeh my veaghey ymmyrchagh.

¹³ Agh t’eshyn jeh’n un aigney, as quoi oddys eh y hyndaa? as shen ta’n annym echey geearree, eer myr shen t’eh dy yannoo.

¹⁴ Son t’eh cooilleeney shen ta kiarit er my hon: as ymmodee lheid ny reddyn ta mârish.

¹⁵ Shen-y-fa ta mee seaghnit kiongoyrt rish; tra ta mee smooinaghtyn er, ta mee ayns aggle roish.

¹⁶ Son ta Jee jannoo my chree meiygh, as ta’n Ooilley-niartal dy my heaghney.

¹⁷ Er-yn-oyr nagh row mee er ny yiarey jeh roish y dorraghys, chamoo t’eh er skeayley’n dorraghys veih m’eddin.