Lioar Yob 21 - Yn Vible Casherick 1775 1819

CAB. XXI

¹ Agh dreggyr Job as dooyrt eh,

² Eaisht-jee dy tastagh rish my ghoan, as jean-jee myr shoh m’y gherjaghey.

³ Lhig-jee dou loayrt; as eisht craid-jee nyn saie.

⁴ Er my hon’s, vel m’accan gys dooinney? as abbyr dy beagh eh, cre’n-fa nagh lhisagh my spyrryd ve seaghnit?

⁵ Jeeagh-jee orrym, as gow-jee yindys, as cur-jee nyn laue er nyn meeal.

⁶ Eer tra ta mee cooinaghtyn er, te dy m’y agglaghey, as ta my eill er-creau.

⁷ Kys te dy vel ny mee-chrauee beayn, cheet dy ve shenn, as niartal ayns pooar?

⁸ T’ad fakin yn sheel oc bishaghey mâroo, as nyn sluight kiongoyrt rish nyn sooillyn.

⁹ Ta ny thieyn oc sauchey veih aggle, chamoo ta slatt Yee orroo.

¹⁰ Ta’n tarroo oc trean, as cha vel eh failleil; ta’n voa oc breh, as cha vel ee tilgey e lheiy.

¹¹ T’ad cur magh yn vooinjer veggey oc myr shioltane, as ta nyn gloan daunsin.

¹² T’ad goaill y timbrel as y chlaasagh, as t’ad gennal ec kiaull yn organ.

¹³ T’ad baarail nyn laghyn ayns sonnys, as ayns y tullogh goll sheese gys yn oaie.

¹⁴ Shen-y-fa t’ad gra rish Jee, Faag voïd shin; son cha vel shin shirrey tushtey dty raaidyn.

¹⁵ Cre ta’n Ooilley-niartal, dy jinnagh shin eshyn y hirveish? as cre’n vondeish veagh eh dooin, dy ghoaill padjer huggey?

¹⁶ Cur-my-ner, cha vel y vaynrys oc ’sy laue oc hene: ta coyrle ny mee-chrauee foddey voym.

¹⁷ Cre cha mennick ta cainle ny mee-chrauee er ny chur ass! cre cha leah ta’n toyrt-mow oc cheet orroo! ta Jee rheynn magh trimshey ayns e yymmoose.

¹⁸ T’ad myr y stubble roish y gheay, as myr y coau ta’n sterrym dy heebey ersooyl.

¹⁹ Ta Jee stoyral seose e vee-chairys cour e chloan: gowee eh cooilleeney er, as nee eh gennaghtyn eh.

²⁰ Ver e hooillyn hene my-ner e hoyrt-mow, as iu-ee eh jeh jymmoose yn Ooilley-niartal.

²¹ Son cre’n taitnys t’echey ayns e hie vees ny lurg, tra ta earroo ny meeaghyn echey er ny yiarey jeh ’sy vean?

²² Quoi nee gynsaghey tushtey da Jee? fakin dy nee eshyn ta briwnys yn vooinjer syrjey.

²³ Ta fer geddyn baase ayns mean e niart, ayns slane aash as shee.

²⁴ Ta ny siyn echey roie harrish lesh bainney, as ny craueyn echey er ny ooraghey lesh smuir.

²⁵ As ta fer elley geddyn baase ayns angaish e annym, as cha vel eh dy bragh gee lesh gerjagh.

²⁶ Nee ad lhie sheese co-laik ’sy joan, as coodee ny beishteigyn ad.

²⁷ Cur-my-ner, ta fys aym er ny smooinaghtyn eu, as er ny croutyn ta shiu dy aggairagh kiarail m’oï.

²⁸ Son ta shiu gra, C’raad ta thie yn phrince? as cre’n erree t’er cummallyn ny mee-chrauee?

²⁹ Nagh vel shiu er vriaght jeusyn ta goll er y raad? as nagh nhione diu ny cowraghyn oc,

³⁰ Dy vel ny mee-chrauee er ny reayll gys laa ny briwnys? bee ad er ny chur lhieu magh ayns laa’n jymmoose.

³¹ Quoi nee soilshagh e raad da gys e eddin? as quoi nee eh y chooilleeney son shen ny t’eh er n’yannoo?

³² Ny-yeih bee eh er ny chur lesh gys yn oaie, as nee eh tannaghtyn ayns lhiaght ny hooirey.

³³ Bee foaidyn y choan millish da, as hed dy chooilley ghooinney geiyrt er, myr t’adsyn erskyn earroo hie roish.

³⁴ Kys eisht ta shiu dy my gherjaghey ayns fardail, fakin dy vel foalsaght ayns ny ansooryn eu?