Lioar Yob 2 - Yn Vible Casherick 1775 1819

CAB. II

¹ Reesht va laa dy row, tra haink ainleyn Yee dy hassoo stiagh fenish y Chiarn, dy daink Satan myrgeddin ny mast’ oc, as hass eh stiagh fenish y Chiarn.

² As dooyrt y Chiarn rish Satan, Cre veih t’ou uss er jeet? As dreggyr Satan y Chiarn, as dooyrt eh, Veih rouail noon as noal, as veih gimmeeaght huggey as veih er feaï-ny-cruinney.

³ As dooyrt y Chiarn rish y drogh-spyrryd, Vel oo er ghoaill tastey jeh my harvaant Job, nagh vel fer erbee goll-rish er y thalloo, dooinney slane ynrick as jeeragh, fer ta goaill aggle roish Jee, as shaghney olk? as foast t’eh cummal shickyr e ynrickys, ga dy ren uss m’y ghreinnaghey n’oï, dy stroie eh gyn oyr.

⁴ As dreggyr Satan y Chiarn, as dooyrt eh, Crackan son crackan; eer ooilley ny t’ec dooinney ver eh son e vioys hene.

⁵ Agh sheeyn magh dty laue nish, as benn rish y chraue as yn eill echey, as nee eh dt’oltooaney gys dty eddin.

⁶ As dooyrt y Chiarn rish Satan, Cur-my-ner, t’eh ayns dty laue; agh ny gow e vioys.

⁷ Myr shen hie Satan magh veih fenish y Chiarn, as ren eh Job y woalley lesh askaidyn yngyragh, veih boyn e choshey gys mullagh e chione.

⁸ As ghow eh shlig chrockan dy screebey eh-hene; as hoie eh sheese fud y leoie.

⁹ Eisht dooyrt e ven-heshey rish, Vel oo foast shassoo er dty ynrickys? Guee gys Jee dy ghoaill dty vioys.

¹⁰ Agh dooyrt eh r’ee, T’ou uss loayrt myr unnane jeh ny mraane mee-hushtagh. Cre shoh! jean mayd mie y ghoaill ec laue Yee, as nagh gow mayd rish seaghyn? Lesh ooilley shoh, cha daink drogh ockle ass beeal Yob.

¹¹ Nish tra cheayll three caarjyn Yob jeh ooilley ny seaghyn shoh v’er daghyrt da, haink ad dagh fer jeu veih e ynnyd hene; Eliphaz yn Temanite, as Bildad y Shuhite, as Zophar yn Naamathite: son v’ad er choardail ry-cheilley dy heet dy ghobberan mârish, as dy gherjaghey eh.

¹² As tra hrog ad seose nyn sooillyn foddey jeh, as s’coan dy dug ad enney er, hrog ad seose nyn goraa as cheayn ad; as raip ad dagh fer e choamrey, as spreih ad joan seose ’syn aer er nyn ghing.

¹³ Myr shen hoie ad sheese mârish er y thalloo shiaght laghyn as shiaght oieghyn, as cha loayr fer jeu fockle rish: son honnick ad dy row e hrimshey feer trome.