Lioar Yob 19 - Yn Vible Casherick 1775 1819

CAB. XIX

¹ Eisht dreggyr Job as dooyrt eh,

² Caïd nee shiu m’annym y heaghney, as brishey my chree lesh nyn ghoan?

³ Shimmey ta ny keayrtyn ta shiu er my oltooaney: nagh vel nearey erriu dy hionney cha trome orrym?

⁴ As abbyr dy vel mee fo marranys, ta my varranys lhie orrym pene.

⁵ Ga dy vel shiu foast shassoo magh m’oï, as lhiassaghey orrym my oltooan;

⁶ Toig-jee nish dy nee Jee ta er my lhieggal, as er my ghoaill ayns e lieen.

⁷ Cur-my-ner, ta mee plaiynt noi mee-chairys, agh cha vel mee er my chlashtyn; ta mee geamagh dy ard, agh cha vel feaysley my chour.

⁸ T’eh er yeigh seose my raad, nagh voddym geddyn harrish, as t’eh er skeayley dorraghys roish my chassyn.

⁹ T’eh er my roostey jeh my ghloyr, as er n’ghoaill yn attey jeh my chione.

¹⁰ T’eh er my stroie er dy chooilley heu, as ta mee rea: as my hreishteil t’eh er yiarey sheese myr billey.

¹¹ T’eh myrgeddin er ghreesaghey e chorree m’oï, as t’eh er ghellal rhym myr rish e noid.

¹² Ta sheshaght ny roosteyryn cheet cooidjagh, as jannoo raad daue hene m’oï, as campal cruin mygeayrt my chabbane.

¹³ T’eh er scughey my vraaraghyn foddey voym, as ta my eer ainjyssee jannoo quaagh jee’m.

¹⁴ Ta my gheiney-mooinjer er my hreigeil, as ta my chaarjyn dooie er my yarrood.

¹⁵ Ta mooinjer my hie hene, as my harvaantyn, jannoo joarree jee’m: ta mee myr fer quaagh ’sy chilley oc.

¹⁶ Deïe mee er my harvaant, agh cha ren eh my reggyrt; ghuee mee er dy jeean lesh my veeal.

¹⁷ Ta m’ennal dwoaiagh da my ven-heshey hene, ga dy ghuee mee urree er graih chloan my chorp hene.

¹⁸ Ren ny eer cloan veggey gannidys orrym; dirree mee seose, as loayr ad m’oï.

¹⁹ Hug ooilley my henn chaarjyn dwoaie dou; as t’adsyn bare bynney lhiam er jyndaa m’oï.

²⁰ Ta my chraueyn brishey trooid my chrackan as m’eill, as s’coan ta mee er scapail lesh crackan er my ghruntyn.

²¹ Gow-jee chymmey jee’m, gow-jee chymmey jee’m, O shiuish my chaarjyn; son ta laue Yee er ventyn rhym.

²² My ta Jee er lhie e laue orrym, cre s’lhiass diuish? as nagh s’lioar diu fakin cre ta mee surranse ayns my eill?

²³ Oh dy beagh my ghoan nish scruit! oh dy beagh ad recordit ayns lioar!

²⁴ Dy beagh ad grainnit lesh pen yiarn as leoaie ayns y chreg er son dy bragh!

²⁵ Son ta fys aym dy vel my Haualtagh bio, as dy jean eh shassoo ec y laa jerrinagh er y thalloo:

²⁶ As ga, lurg my chrackan, dy der ny beishteigyn mow yn corp shoh, ny-yeih ayns my eill neem’s Jee y akin:

²⁷ Eshyn neem’s fakin er my hon hene, as ver my hooillyn my-ner eh, as cha nee fer erbee elley er my hon; ga dy vel my veeghyn goll naardey cheu-sthie jee’m.

²⁸ Agh lhisagh shiuish gra, Cre’n-fa ta shin jannoo tranlaase er, fakin dy vel bun y chooish er ny gheddyn aynym pene?

²⁹ Bee-jee ayns aggle roish y chliwe: son ta jymmoose cur lesh marish kerraghey’n chliwe, dy vod fys ’ve eu dy vel briwnys ry-heet.