Lioar Yob 18 - Yn Vible Casherick 1775 1819

CAB. XVIII

¹ Eisht dreggyr Bildad y Shuhite as dooyrt eh.

² Caïd nagh bee jerrey er nyn ghoan? fuirree-jee erriu, as ny lurg shen nee mayd loayrt.

³ Cre’n-fa ta shin coontit myr maase, as jeh beggan feeu ayns nyn shilley?

⁴ T’eh raipey eh-hene ayns e chorree: vel yn thalloo dy ve treigit er dty hon’s? as y chreg dy ve scughit ass e lhiaght?

⁵ Bee soilshey yn vee-chrauee eer er ny vooghey, as cha jean bree yn aile echey soilshean.

⁶ Bee’n soilshey dorraghey ayns e chabbane, as bee e chainle er ny chur ass marish hene.

⁷ Bee kesmadyn e niart er ny hionney, as ver e choyrle hene er dy huittym.

⁸ Son t’eh goit ayns lieen liorish e chassyn hene; t’eh shooyl er y ribbey.

⁹ Bee e voyn goit ’sy trap, as yiow’n roosteyr barriaght er.

¹⁰ Ta’n ribbey soit er e hon er y thalloo, as y trap roish er y raad.

¹¹ Bee aggle atchimagh er veih dy chooilley ard, as cur er goaill gys e voynyn.

¹² Nee’n niart echey goll neeu, as bee toyrt-mow chion ec e lhiattee.

¹³ Nee eh niart e challin y stroie: nee mac shinney’n vaaish e niart y chur fo-chosh.

¹⁴ Bee yn shickyrys echey astyrit ass e chabbane, as ver eh lesh eh gys ree ny atchim.

¹⁵ Nee shen tannaghtyn ayns e chabbane, er-yn-oyr nagh vel eh nish lesh hene: bee brimstone er ny skeayley er e chummal.

¹⁶ Bee ny fraueyn echey fioghit veih heese, as heose bee e vanglane er ny yiarey jeh.

¹⁷ Nee e chooinaghtyn cherraghtyn veih’n thalloo, as cha bee imraa erbee jeh ’sy traid.

¹⁸ Bee eh er ny eiyrt veih soilshey gys dorraghys, as er ny imman ass y theihll.

¹⁹ Cha bee echey mac ny sluight mastey e phobble, ny dooinney er-mayrn ayns e chummallyn.

²⁰ Nee adsyn hig ny yeï yindys y ghoaill jeh laa e hoyrt-mow; v’adsyn honnick eh lhieent lesh atchim.

²¹ Shoh’n erree hig er ynnydyn-vaghee ny mee-chrauee, as shoh myr vees y cronney echeysyn nagh nhione da Jee.