Lioar Yob 16 - Yn Vible Casherick 1775 1819

CAB. XVI

¹ Eisht dreggyr Job as dooyrt eh,

² Ta mee er chlashtyn dy liooar jeh’n ghlare shoh: s’treih ny fir-gherjee shiu ooilley!

³ Bee jerrey eddyr er goan floutagh? ny cre’n daanys t’aynyd dy choyrt ansoor?

⁴ Oddin’s myrgeddin loayrt myr ta shiuish: dy beagh yn annym euish ayns stayd m’annym’s, oddin’s eisht gra dy liooar nyn ’oï, as my chione y chraa erriu.

⁵ Agh yinnin shiu y niartaghey lesh my veeal, as nyn drimshey y veeinaghey lesh bree my ghoan.

⁶ Ga dy vel mee loayrt, cha vel my hrimshey er ny lhaggaghey; as my ta mee my host, cre’n aash te dou?

⁷ Agh nish t’eh er my yannoo deinagh: t’ou er skeayley ooilley my heshaght.

⁸ As t’ou er my choodaghey lesh craplagyn, ta feanish m’oï: as ta’n shangid, ta ry-akin orrym, gymmyrkey feanish gys my eddin.

⁹ Ta my noid dy my raipey ayns e eulys; t’eh snaggeraght orrym lesh e eeacklyn; ta e hooill shleeuit orrym.

¹⁰ T’ad er vlakey orrym lesh nyn meeal: t’ad er my woalley er y lieckan dy naareydagh; t’ad er haglym ad-hene cooidjagh m’oï.

¹¹ Ta Jee er my livrey seose gys ny mee-chrauee, as er my cheau ayns laueyn drogh-yantee.

¹² Va mee ec m’aash, agh t’eh er my vrishey veih-my-cheilley: t’eh myrgeddin er my ghoaill er y wannal, as er my chraa ayns peeshyn, as er my hoiaghey seose son mark.

¹³ Ta ny sideyryn echey er my chruinnaghey mygeayrt; t’eh scoltey my aaraghyn veih-my-cheilley gyn myghin erbee; t’eh deayrtey magh my ghall er y thalloo.

¹⁴ T’eh dy my vrishey lesh brishey er brishey; t’eh roie orrym myr dooinney caggee.

¹⁵ Ta mee er whaaley aanrit-sack er my chrackan, as ta my ooashley er ny choodaghey ’sy joan.

¹⁶ Ta my eddin gatt lesh keayney, as er ferroogh my hooillyn ta scadoo yn vaaish.

¹⁷ Cha nee son mee-chairys erbee ayns my laueyn: ta my phadjer myrgeddin ynrick.

¹⁸ O halloo, ny jean uss my uill y cheiltyn, as ny lhig da my eam ve er ny lhiettal.

¹⁹ As nish, cur-my-ner, ta m’eanish ayns niau, as my recortys ’syn yrjid.

²⁰ Ta my chaarjyn craidey moom; agh ta my hooill deayrtey magh jeïr gys Jee.

²¹ Oh dy voddagh dooinney pleadeil son dooinney rish Jee, myr ta dooinney pleadeil son e naboo!

²² Tra vees earroo giare my vleeantyn ec kione, eisht hem y raad veih nagh vel chyndaa.