Lioar Yob 13 - Yn Vible Casherick 1775 1819

CAB. XIII

¹ Cur-my-ner, ta my hooill er vakin ooilley shoh, ta my chleaysh er chlashtyn as er hoiggal eh.

² Shen ny ta fys euish er, ta fys aym’s er myrgeddin: cha vel mee veg ergooyl riu.

³ Shickyr rish yn Ooilley-niartal baillym’s loayrt, as dy phleadeil my chooish fenish Yee.

⁴ Agh cha vel shiuish agh cooiney breagyn; ta shiu ooilley fir-lhee gyn foaynoo.

⁵ O dy beagh shiu ooilley-cooidjagh nyn dhost! as veagh shiu eisht goit son deiney creeney.

⁶ Clasht-jee nish rish ny t’aym dy ghra, as eaisht-jee rish pleadeil my veillyn.

⁷ Jean shiuish loayrt dy aggairagh ayns lieh Yee? as taggloo dy molteyragh er e hon?

⁸ Vod shiuish soiaghey jeh’n persoon echey? nee shiuish oddys pleadeil ayns lieh Yee?

⁹ Bee eh son y vondeish eu briaght dy ve jeant erriu? ny, myr ta dooinney brynneraght rish dooinney, vel shiuish myr shen brynneraght rishyn?

¹⁰ Nee eh son shickyrys shiu y cherraghey, my ta shiu gy-follit soiagh jeh persoonyn.

¹¹ Nagh der yn ard-ooashley echeysyn aggle erriu? as nagh jean yn atchim echey tuittym erriu?

¹² Ta ny raaghyn eu myr y joan, as nyn girp myr kirp dy chray.

¹³ Bee-jee nyn dhost, as lhig-jee fea dou, dy voddym loayrt, lhig cre saillish cheet orrym.

¹⁴ Cre’n-fa ta pian my eill cur orrym snaggeraght lesh my eeacklyn, as dy vel my vioys ayns my laue?

¹⁵ Ga dy marr eh mee, ny-yeih treishtin ayn: agh neem’s my ynrickys y yannoo mie kiongoyrt rish.

¹⁶ Eshyn neesht vees my haualtys: son cha jig yn crauee-oalsey ny enish.

¹⁷ Clasht-jee dy imneagh rish my ghoan as my chooish lesh nyn gleayshyn.

¹⁸ Cur-my-ner nish, ta mee er n’yannoo magh my chooish; ta fys aym dy bee’m er my heyrey.

¹⁹ Quoi eh nee pleadeil m’oï? son dy beign my host, veagh eh baase dou.

²⁰ Agh ny jean daa red rhym; eisht cha jean-ym mee-hene y ollaghey voïd.

²¹ Jean dty smaght y scughey foddey voym; as ny lhig da dty atchim mish y agglaghey:

²² Eisht eïe uss, as neem’s freggyrt; er-nonney, lhig dooys loayrt, as jean uss gansoor.

²³ Cre wheesh as ta my vee-chairys as my pheccaghyn? soilshee dou my ghrogh-yannoo, as my loght.

²⁴ Cre’n-fa t’ou follaghey dty eddin, as dy m’y ghoaill son noid?

²⁵ Jean oo broo duillag ta eiyrit noon as noal? as jed oo geiyrt er y stubble chirrym?

²⁶ Son t’ou scrieu sheese reddyn sharroo m’oï, as dy my cherraghey son loghtyn m’aegid.

²⁷ T’ou cur my chassyn neesht ayns ny stockyn, as sooill ghyere ayd er ooilley my raaidyn; t’ou cur cowrey myrgeddin er boynyn my choshey.

²⁸ As ta mee goll naardey myr red loau, myr garmad ta eeit lesh y lhemeen.