Lioar Yob 12 - Yn Vible Casherick 1775 1819

CAB. XII

¹ As dreggyr Job as dooyrt eh,

² Gyn dooyt shiu hene sleih creeney’n theihll, as yiow ooilley’n chreenaght baase mêriu.

³ Agh ta tushtey aym’s chammah as t’euish; cha vel mee veg ergooyl riu: eer, quoi eh nagh vel toiggal ooilley shoh?

⁴ Ta mish myr fer t’ec e naboo ayns faghid, ta geamagh gys Jee, as t’eh dy reggyrt eh: ta’n dooinney slane ynrick ayns faghid eu.

⁵ Eshyn ta aarloo dy skyrraghtyn, t’eh myr lamp t’er n’gholl ass ayns ny smooinaghtyn echeysyn ta ec aash.

⁶ Ta cabbaneyn ny roosteyryn bishaghey, as t’adsyn ta brasnaghey Jee ayns sauchys; gys ny laueyn oc ta Jee cur stiagh dy palchey.

⁷ Agh fênee nish jeh maase y vagher, as nee ad dty ynsaghey; as jeh eeanlee’n aer, as nee ad ginsh dhyt:

⁸ Er-nonney, loayr rish y thalloo, as nee eh dty ynsaghey; as rish eeastyn ny marrey, as ver ad toiggal dhyt.

⁹ Quoi eh nagh vel fys echey liorish ooilley shoh, dy nee laue Yee t’er n’yannoo eh?

¹⁰ Ayns e laue ta bioys dy chooilley chretoor, as ennal ooilley sheelnaue.

¹¹ Nagh vel y chleaysh prowal goan, as y beeal blastyn bee?

¹² Marish y chenndeeaght ta creenaght; as ayns lhiurid laghyn ta tushtey.

¹³ Marish Jee ta creenaght as niart, dasyn ta bentyn coyrle as tushtey.

¹⁴ Cur-my-ner, t’eh lhieggal sheese, as cha vod eh ve troggit reesht; t’eh jeigh seose dooinney, as cha vel fosley ny chour.

¹⁵ Cur-my-ner, t’eh lhiettal ny ushtaghyn, as t’ad chyrmit seose; myrgeddin t’eh lhiggey’n raad daue, as t’ad lhieeney harrish y thalloo.

¹⁶ Mârishyn ta niart as creenaght: ta’n er-mollit as y molteyr fo e reill.

¹⁷ T’eh cur shaghrynys er creenaght ny fir-choyrlee, as jannoo ny briwnyn giare-cheeayllagh.

¹⁸ T’eh brishey geulaghyn reeaghyn, as niartaghey nyn meeghyn lesh cryss.

¹⁹ T’eh leeideil princeyn ersooyl spooillit, as tilgey sheese y vooinjer niartal.

²⁰ T’eh jannoo gyn bree glare ny fir-choyrlee, as cur shaghrynys er tushtey’n chenndeeaght.

²¹ T’eh deayrtey magh nearey er princeyn, as t’eh lhaggaghey niart ny treanee.

²² T’eh cur er folliaghtyn y dorraghys dy heet rish, as cur lesh gys soilshey scadoo’n vaaish.

²³ T’eh bishaghey ny ashoonyn, as dy stroie ad reesht: t’eh sheeyney magh nyn ardjyn, as dy hionney ad reesht.

²⁴ T’eh goaill ersooyl cree mooaralee yn thallooin, as cur orroo dy rouail ayns yn aasagh raad nagh vel cassan erbee.

²⁵ T’ad rasey ’sy dorraghys fegooish soilshey, as t’eh cur orroo dy leaystey myr dooinney meshtal.