Lioar Yob 11 - Yn Vible Casherick 1775 1819

CAB. XI

¹ Eisht dreggyr Zophar yn Naamathite as dooyrt eh,

² Nagh vel ansoor dy ve er ny choyrt dasyn ta goaill rouyr taggloo er? as vel y beealerey dy v’er ny heyrey?

³ Vel dty vreagyn dy choyrt deiney nyn dhost? as tra t’ou dty oalserey, vel dooinney erbee dy chur oo gys nearey?

⁴ Son t’ou er ghra, Ta m’ymmyrkey-bea ynrick, as ta mee glen ayns dty hilley.

⁵ Agh oh dy jinnagh Jee loayrt, as e veillyn y osley dt’oï;

⁶ As dy jinnagh eh soilshaghey dhyt folliaghtyn dty cheeayll hene, dy vel ad dooble gys ny t’er ny akin! Toig, er-y-fa shen, dy vel Jee er chur ort foddey sloo na ta dty pheccaghyn dy hoilchin.

⁷ Vod uss liorish ronsaghey geddyn magh Jee? vod slane toiggal ’ve ayd jeh folliaghtyn yn Ooilley-niartal?

⁸ T’eh ny syrjey na niau; cre oddys oo y yannoo? ny s’diuney na niurin; cre’n tushtey oddys ’ve ayd jeh?

⁹ Ta’n towse echey ny s’lhiurey na’n thalloo, as ny shlea na’n aarkey.

¹⁰ My t’eh giarey jeh, as jeigh seose deiney, ny tayrn dy cheilley; quoi eisht oddys eh y lhiettal?

¹¹ Son shione da fardalys deiney: t’eh fakin olkys myrgeddin: nagh jean eh er-y-fa shen smooinaghtyn er?

¹² Son baillish dooinney donney ve coontit creeney, ga dy vel eh er ny ruggey myr lhiy yn assyl fadane.

¹³ My nee oo dty chree y chiartaghey, as dty laueyn y heeyney seose huggeysyn;

¹⁴ My ta mee-chairys ayns dty laue, scugh foddey voïd eh, as ny lhig da olkys tannaghtyn ayns dty chabbaneyn.

¹⁵ Son eisht nee oo dty eddin y hroggal seose gyn cron; bee oo ayns sauchys, as cha bee aggle ort:

¹⁶ Son nee oo dty heaghyn y yarrood, as gimraa orroo myr er ushtaghyn ta roie shaghey.

¹⁷ As bee dty vea ny sollys na’n vun-laa; nee dty hoilshey brishey magh myr y voghrey.

¹⁸ As bee oo ec shee, son dy vel dty hreishteil ayns Jee; nee oo dy feer cleiy mygeayrt-y-mood, as bee dty chummal ayns sauchys,

¹⁹ Nee oo myrgeddin lhie sheese, as cha der dooinney erbee aggle ort; dy feer, nee ymmodee shirrey hood son cooney.

²⁰ Agh nee sooillyn y vee-chrauee failleil, as cha jean ad scapail, as bee nyn dreishteil myr yn ennal baaish.